教院5校徽出爐 網上聽意見

elbar

【明報專訊】香港教育學院獲准正名大學，早排仲提出修改法例後會改名為「香港教育大學」及「The Education University of Hong Kong」，而教院嘅工作小組噚日就向師生及校友發電郵，拋出5款新校徽logo諮詢大家意見。


第一款設計跟𠵱家一樣，只係改咗個名；至於第二至第四款，設計概念有啲相近，但第五款就有啲似中學校徽，盾形標誌裏面有中文「厚德日新」4個字，並有拉丁文「Educere」字樣，教院話呢個字係大概解作培育、引領嘅意思。


至於「厚德」與「日新」，翻查資料係分別出自《周易》和《禮記‧大學》，意為有大德可承擔重任，且不斷自我完善 ，每日進步創新。


教院工作小組話， 呢5款logo，已經過校董會審核，由今日至29號喺網上做意見調查，呼籲師生校友提出意見，校董會將會聽大家意見再做決定。睇番5款設計，5款都係用綠葉概念，只不過第五款嘅綠葉有個盾牌形包住。


太陽喻崇高 綠葉象徵前院校


教院𠵱家嘅校徽，喺視覺形象上表現咗學院嘅英文縮寫IE。5片綠葉上面有一金黃色太陽，綠葉代表5間前院校﹕羅富國師範學院、葛量洪師範學院、柏立基師範學院、香港工商師範學院同語文教育學院。教院簡介，綠葉同時亦象徵青年人嘅理想、成長、活力同健康，孕育萬物嘅太陽則象徵崇高目標、卓越水平、生命力量、燦爛成果、團結精神同成功。