中學小學合辦課後託管 受益者回饋做小導師

elbar

已升中三嘅許歡歡（中），讀小學時接受過課後託管補習服務，𠵱家大個咗就回饋社區，返小學做小導師教學弟學妹。



【明報專訊】元朗天水圍有唔少雙職父母家庭，佢哋日間都要返工，未必照顧到仔女，天水圍伯裘書院和潮陽百欣小學就獲基金資助成立「晴天計劃」，開放兩所校舍，利用校園推行各項活動，並由義工導師包括中學生，教導小學生做功課，睇住班細路仔，減輕區內雙職家長壓力。


始於2008年 減輕雙職家長壓力


聖誕節前夕，一班大專義工仲為受託管嘅學生喺潮陽百欣小學開派對。呢項計劃始於2008年，做出咗成績，好似𠵱家升讀中三嘅許歡歡，就係潮陽百欣小學畢業生，曾經都係託管計劃嘅受惠者。佢話當年教導佢嘅中學生，「好像親哥哥、親姊姊一樣，他們願意利用私人時間教導我們，令我很感動」。許歡歡自去年9月起，放學後返小學當義工導師，教導師弟師妹。


「晴天計劃」統籌主任麥家慇就話，託管服務想減輕雙職家長壓力，並教導小朋友同人相處，而多年來唔少曾受託管嘅同學都會返嚟幫手做義工，希望回饋社會。