馬會X曼聯 培訓校隊教練 紅魔鬼教同學仔踢波（Kelly Chu）

elbar

       Kelly身邊有唔少紅魔鬼擁躉，馬會噚日宣佈同英格蘭勁旅曼聯再度合作，引入專業嘅國際足球訓練方法，培訓第二批校隊教練，亦為中小學同學仔提供為期半年嘅足球發展計劃，將來更唔排除有機會同曼聯傳奇球星交流，小妹都好羨慕！

        新一屆「賽馬會學界足球發展計劃」，培訓校隊教練同學校老師，今屆有三位學校教練得到曼聯足球學校教練資格，成為第二批得到呢個殊榮嘅香港教練，可以喺世界各地嘅曼聯足球學校任教，由計劃開始至今，共有七位參與計劃嘅教練獲得曼聯頒發呢項資格，都咪話唔巴閉！

　　另外，今屆計劃首次由中學擴展至小學，共有十二間中學同六間小學參加，以後不同年紀嘅同學仔，都可以接受專業培訓喇！過去兩年，馬會曾經安排多位曼聯傳奇球星訪港，小妹打聽到，大會正研究將來安排更多球星嚟香港，咁就大人小朋友都開心。


Kelly Chu