你地如果聽到小朋友咁講....

tobbie

某日,小兒放學返屋企,做做下功課,無啦啦同我講....

小兒:今日有個老師同我講話畫班好悶,叫我不如唔好參加啦~
我:個老師有無教過你架?
小兒:無啊!
我:仔啊,媽咪幫你報呢個班,係因為你愈來愈大個仔,媽媽想你接觸多D唔同既野,試下玩上學期,如果覺我接觸唔鐘意就下學期報其他野啦~好唔好?
小兒:嗯~好啦!

第二日,小兒又做做下功課又講~

小兒:媽媽,今日老師又同我講叫我唔好玩畫班喎!佢仲同我講$4XX好貴架,你不如唔好參加畫班啦~留返D錢食漢堡包仲好過啦~

我:個老師叫咩老師啊?
小兒:唔知啵!
我:個老師無教過你架?
小兒:無啊!
我:個老師無啦啦過嚟同你講啊?
小兒:係啊!

我第二日去學校問,個老師話我仔仔同佢講唔鐘意畫畫,所以佢先咁我仔講呢D野,
但我反問老師,我仔鐘唔鐘意畫畫同$4XX係兩回事,
另一位主任都在場,就搭咀講~:個老師個意思都係想同小朋友講,如果唔鐘意玩就唔好晒錢!

同埋我唔知佢點同仔講,個老師又話我個仔同佢講,佢上畫畫班會伏係度,會搞同學

我:咁都唔係咁樣同個小朋友咁樣講野架嘛~我小朋友連續兩日返屋企做做下功課就同我講!

主任:家長,你不如返屋企同仔仔再了解件事先!
-------------------------------------------
個畫班叫兒童創意畫班(除左畫畫,仲會有手工做)
我仔都鐘意做小手工!係唔鐘意畫畫!
咁我仔唔鐘意畫畫,不如叫我仔唔好上視藝堂啦!!!!
-------------------------------------
返到屋企,我問啊仔
我:仔,你搵畫班個老師講你唔鐘意畫畫啊?
小兒:係老師小息搵我傾!
我:個老師無啦啦搵你傾畫班D野??
小兒:係啊!
我:唔係你搵個老師講?
小兒:係個老師自己搵我傾架!
我:老師話你同佢講你唔鐘意畫畫,話會上堂搞同學,會伏係枱度訓覺?
小兒:我無話搞同學,我淨係話會伏係度!
我:仔,媽媽幫你報畫班,係想你試下接觸唔同既野!但呢個班,唔係淨係畫畫,都會有手工做架!你會唔會都想試下?
小兒:係唔係玩完唔鐘意,可以唔玩啊?
我:係!媽媽只係想你咩都試下,唔好樣樣野未試,就乜都話唔鐘意!

(我仔食野都係咁,未食過叫佢咬啖都唔會試,要迫佢試左第一口,好食就會繼續食,唔好食,我就唔會再迫佢食,因為起碼佢叫試過嘛)

但個老師一日又係咁,兩日又係咁....又話個畫班好悶,又話個畫班好貴!想點啊?我比唔起咩??
作為家長,我都希望想個仔仲細試下接觸唔同既野...

I_O_U_baby

wan_sosin 發表於 15-10-9 13:32
我同你諗法一樣，其實係個細路借老師過橋！

心有靈犀

wan_sosin

原帖由 I_O_U_baby 於 15-10-09 發表
我只聽到小朋友係想講佢唔鍾意上.
仲要講兩次媽媽都GET 唔到,
第日有乜事都唔會再同媽媽講 ...

我同你諗法一樣，其實係個細路借老師過橋！

I_O_U_baby

我只聽到小朋友係想講佢唔鍾意上.
仲要講兩次媽媽都GET 唔到,
第日有乜事都唔會再同媽媽講

CatEgg

小朋友幾年級?
畫畫係幾講天份同興趣，如果小朋友鍾意畫畫，在家都會畫，又或者要畫畫的功課會做得好靚。
比我唔會再同老師糾纏落去，因我想小朋友在校有好日子過。當小朋友再提唔想再畫，會講，今期報了名，鍾唔鍾意都要上。否則下次小朋友話唔鍾意返學就可以唔返?

siden

我唔覺得老師有乜大問題。

邊有老師咁得閒八掛無啦啦自己捉個細路講埋啲咁嘢？

當中小朋友表達了什麼，若你盡信小朋友説辭，也無話可說了。

tommyxsarah

我相老師講野多d

其實有時小朋友係屋企 一個樣
學校一個樣

你仔仔一早講左佢伏係度上堂
講真有興趣就唔會伏係度

$4xx 多唔多 少唔少
留$ 買漢堡包係比喻
唔想學 就真係唔好 曬$$

老師其實一般好有經驗 一睇就知邊d 小朋友有興趣 邊d 無

Yanamami

係!媽媽只係想你咩都試下,唔好樣樣野未試,就乜都話唔鐘意!

(我仔食野都係咁,未食過叫佢咬啖都唔會試,要迫佢試左第一口,好食就會繼續食,唔好食,我就唔會再迫佢食,因為起碼佢叫試過嘛)
*******************************

我諗楼主係想訓練仔仔唔好未曾未就話唔钟意，样样都試左先講~点知个老師破坏佢大計，所以唔多满意……

睇完以上既，我諗楼主仔仔真係唔鈡意上，又怕mami唔开心……

HaYi

課後興趣班好多時是外來老師教, 可能同你個仔談的是負責課外活動的老師, 可能聽到小朋友同其它人說"我不喜歡畫班, 去到就只會訓在那兒", 才同佢說有起此事, 并警惕小朋友不可如此, 因既浪費左家長的錢, 亦會不尊重上堂的老師及同學...
我不能相信一個毫無關係的老師會介入某一同學課外活動的事, 好得閒咩.  

當然如果得知此老師真的是無關事的多事老師, 更可以不理, 想去就去吧. 反正亦只是幾堂.  

GreenMaDad

我親耳聽過一小一生跟我小朋友説了一會後說:"你千祈吾好話俾我阿媽知".   之後我慢慢發覺她媽媽真的不知道那小朋友曵的事, 所以我也常提醒自己，小朋友跟我們說的可能已被歪曲。   

rean_chau

其實教到有學生伏係度對老師黎講都係一個挫折，而且係要抽先有機會，即係學位緊張。其實上落去都無乜意思，細既無興趣，老師無心機教佢，上落去都係繼續伏係度。

longlokma

那位老師可能是負責處理畫班事務呢！

而且你仔講明会伏係度，咁其實会影響其他同学上堂情緒的，某程度已經是擾亂課堂秩序。

校內興趣班，始終要遵守規矩，不是如校外的给了学費就可以隨便上或不上的

Yanamami

羅生门~

MrBeast

小兒:係唔係玩完唔鐘意,可以唔玩啊?

其實都已loud n clear，不如問下佢想玩乜，or switch center.

ronniedad

原帖由 2boba 於 15-10-03 發表
上興趣班上到無哂興趣，為乜？如果小朋友同我講無興趣，相信我會停咗佢。



  ...

無法同意更多

2boba

上興趣班上到無哂興趣，為乜？如果小朋友同我講無興趣，相信我會停咗佢。

kayi0556

發現小朋友冇興趣， 就梗係講唔好浪費錢
老師可能只見到你囝伏係度， 唔跟住做， 叫過佢， 佢話唔鐘意， 所以佢覺得唔好浪費錢， 亦都提醒小朋友咁係浪費錢的行為

longyiuma

原帖由 tobbie 於 15-10-03 發表
唔係話老師關心有問題,而係呢個老師連繽兩日講到4XX咁貴,留返嚟買漢堡包食仲好過啦~好難令我唔覺得個老師既 ...

所以你有無諗過個老師咁多學生唔去關心淨係關心你仔會唔會係你仔有d咩表演左出黎？佢係唔係講d唔講d?