院校亂收留位費 教局放任招民怨（太陽報太一叮）

elbar

孔夫子話，「因材施教，有教無類」，可惜香港早就冇呢支歌仔唱咯。只要睇吓自資院校開到成行成市，教學質素及經營手法備受詬病，就知道教育早就淪為一盤生意，學校已經變身學店，話係「因財施教，有錢無類」就差唔多。

冇誇張o架，本港資助大學學位爭崩頭，即使分數達到入學門檻，一樣有大把學生被拒諸門外。為咗買個保險，唔少學生都會喺聯招放榜前報讀自資課程「補底」，點知呢種買保險心理竟然成為自資院校另類搵錢途徑，真係唔到你唔服。

係咁嘅，現時報讀自資院校必須繳交約五千元留位費，部分院校仲會喺短時間內要求學生繳交首期學費添，簡直未見官先打八十。畀錢都係其次，最慘係學生即使最後獲得大學取錄，放棄自資院校學位，都不獲退回留位費及學費。有個案出動到家境清貧、父母失業甚至破產為理由，一樣無情講，涉款最大嘅個案更高達五萬七千多元，你話咁樣同趁火打劫有乜分別吖？

冇錯，大部分院校都自稱有退款安排，查實只有獲得八間資助大學取錄嘅學生至可以獲發部分退款，擺明取巧啫。淨係舊年咋，全港自資院校合共收取逾一億五千萬元留位費，而拒絕退還嘅「淨袋」留位費亦接近二千萬元，加埋學費等收入，整體累積盈餘超過四十億元，簡直肥到襪都着唔到，令人咋舌。

大家可能會問，乜教育局無規管嘅咩？冇錯嘞，自資院校話就話受《專上學院條例》監管，但由於自負盈虧，行政及財政運作同無王管冇分別。正如立法會議員話齋，自資院校嘅退款機制欠透明，對學生唔公平，教育局一味袖手旁觀，根本係不負責任。咁又係呀，家陣連幼稚園都設有學費上限喇，有乜理由自資院校收費可以亂咁嚟喎。

講起自資院校無王管亂象，大家一定記得，兩年前嶺南大學社區學院及持續進修學院爆出超額收生醜聞，當時教育局係威係勢話要研究規管自資院校，結果研究復研究，到家陣都係得個吉。所以話，無良學店誤人子弟，教育局絕對係助紂為虐。

一日最衰都係前朝貪曾政府，發展所謂教育產業，其實將教育當係一門生意，先至埋下今日嘅禍根。可能教育局都知衰啩，聲稱會同自資院校商討協調收費問題，咁就講多無謂，行動最實際喇，叮！

elbar

自資院校留位費　貴夾難退促改善


王國興（中）指，自資院校要求學生於等待成績覆核及聯招補選結果即繳首期學費，有「趁火打劫」之嫌。

文憑試考生在聯招放榜前大多會報讀自資課程「打底」，惟院校索取高昂留位費，若要退款更困難重重。有立法會議員昨日聯同三名學生和家長代表，約見教育局副秘書長盧世雄，要求局方加強監管自資課程收取的留位費，並設立完善退款機制。教育局在會上承諾會與自資院校商討增加條款的透明度，讓有意報讀的學生清楚知道退款權利，盼下學年收生時有所改善。

一般高達五千元

立法會議員王國興指，自資院校的留位費一般高達五千元，且大多在學生仍等待成績覆核及聯招補選結果階段便要求學生繳付首期學費，金額由兩萬至四萬元不等，收費政策有「趁火打劫」之嫌。王續指，只有經聯招而獲資助學士學位課程取錄的考生才可獲全數或部分退款，對其他循非聯招途徑取得學位的同學不公平，而院校「特殊情況」下退款的定義亦不清晰，曾有家長以失業、破產為由申請退款，亦未獲受理，當中涉款最大宗的個案高達五萬七千五百元。王國興稱會在下年度立法會教育事務委員會提出有關問題跟進。

教育局回覆指，自資專上院校在學術發展及行政管理上享有高度自主權，然而局方會向院校反映就有關留位費安排收到的意見，與院校保持溝通，以進一步加強對學生的支援。自資高等教育聯盟主席阮博文稱，並無收到聯盟院校拒發還留位費的投訴，若學生有疑問可向聯盟求助。