選名校（左丁山）

elbar

女律師A去完紐約過年，放假之後，中午在威靈頓街頭與左丁山相遇，剛好左丁山出街前收到一位朋友電話詢問：「喂，我個靚女升中一，現就讀佢阿媽間母校（著名九龍女校也），應該可以原校升中，但又接到山頂國際學校取錄下學期升中一嘅通知信，老婆當堂十五十六，點揀好，你幫我問吓得唔得？」朋友大把身家，送佢位靚女千金去全世界邊間寄宿學校都可以，但唔捨得噃，人地仔女入到是但一間學校都高興到發燒，佢就話覺得頭痛㖭，似乎有啲晒命。


見到女律師就啱嘞，佢就在那一間九龍名女校畢業，牛津深造，唔問佢問邊個？女律師話：「你又確係問啱人，因為我嘅死黨個女就係在那一間著名國際學校讀書嘅，明年可能入牛劍。嗱，今時唔同往日，我未必大力推薦我嘅母校，母校為咗成績，要求多多，期望學生有補習先生跟到實，又分精英/非精英班，女孩子若非性格堅強夠tough嘅，都幾難捱，捱得掂嘅，位位都係精英。但唔好以為轉去國際學校讀IB就寬鬆啲噃，我死黨個女同其他同學一樣，又係有補習先生跟住，星期六日就上補習堂，而且國際學校嘅中文比較麻麻，死黨要特別加強女兒中文訓練，唔准女兒與佢通訊（WhatsApp，email）用英文，一定要寫中文，又教女兒讀張愛玲小說，真係用心良苦，我就戥世姪女辛苦嘞。咁樣講啦，讀國際學校就冇咁多規律，容易混埋同學到蘭桂坊，讀女名校就比較悶，叫你朋友諗清楚先。」原來在名校讀書咁辛苦，不如去英國寄宿學校算啦，女律師又警告：「又未必，女兒早熟，性格外向，生得靚，去英國讀寄宿學校，如果我係媽咪，幾百個唔放心，在香港睇實佢仲好，我在英國讀書工作近七八年，見過不少富家仔女玩到儍咗，邊度係讀書㗎？現今有不少寄宿學校因有大量華人學生入讀，將佢地編入同一宿舍，搞到佢地連英語都講得唔好！」左丁山聽到眼睩睩，以此回報朋友。佢話：「咁咪要問車公？」嘻嘻，not a bad idea。
  


左丁山

shadeslayer

原帖由 elbar 於 15-02-27 發表
女律師A去完紐約過年，放假之後，中午在威靈頓街頭與左丁山相遇，剛好左丁山出街前收到一位朋友電話詢問： ...

呢個世界，沒有完美的工作，伴侶，情人，也沒有完美的學校。