本帖最後由 Mother_Joyce 於 14-11-29 00:12 編輯
啱啱有jm話呢part亂碼，宜家有無亂吖？thx!
喺BK都遊蕩咗幾乎3年，一直都係睇帖唔復帖，從playgroup到報考PN到最近嘅報考K1，都係喺BK偷師嘅，如果唔系呢排出現一D我覺得比較過分嘅言論，我估我會繼續潛水落去。
我系明慧嘅真正用家，宜家小朋友讀緊北角嘅國際班，PN，上午班。所以我講嘅，都只可以系我喺北角校區嘅見聞同感受，太子系點，我就唔知道喇。我描述嘅內容，系從2013年我幫小朋友報名PN，到宜家呢個moment，今日，啱啱參加完家長會。
2012年，我估所有龍B嘅爸爸媽媽都經歷過PN報名嘅折磨，有一部分嘅學校，就算唔需要通宵排隊，都要一早起身排隊，就係為咗可以攞一個籌去面試，或者攞到先到先得嘅機會。但係明慧提供一大段長時間去比我哋報名，只要系Deadline之前，你交曬D材料比佢，就OK喇，我已經好appreciate. 喺面試之前，學校會邀請家長去開一個家長會。留意開BK嘅家長會記得，好多人都狂插校長，話佢用好多時間講留位費講錢，話佢商業化無愛心鐘意show off，blablabla，基本上，年年都有咁嘅留言。但係你哋有無諗過，宜家有幾多怪獸家長，自己hold住幾個offer，又唔放出來，令到苦苦等待嘅其他爸爸媽媽好擔憂，亦令到學校無咁順暢咁安排下一年嘅新生呢？宜家BK都出現好多POST，呼籲各位家長放返D offer出來，點解陳校長喺家長會入邊，用多D時間呼籲各位，如果唔想take呢個offer，就請盡早放出來，就比大家插呢？其實，如果你真系有心有好多疑問想同校長交流，都可以系會議結束之後問校長架，起碼我就係咁，我有問咗校長幾個問題，佢都好有耐性咁回答我，一直答到我無嘢問為止，呢個過程中，無任何嘅唔耐煩同埋趕我走嘅意思。
到面試，一個家長會被安排喺同校長一間房，一邊填問卷，一邊同校長“交流”，基本上考你一心二用先得。另一個家長就會陪小朋友入班房，大概有20 pair，大家一齊唱歌跳舞。然後，再入另一間房，4-6位小朋友一組,group in，大概就疊下積木，認下水果，指下眼耳口鼻，喂下公仔食嘢咁，無問家長問題。至於D媽咪話咁樣in好倉促，其實我都系咁覺得架，但系事實系，呢個就係遊戲嘅規則。每間學校都有自己嘅一套interview小朋友嘅標準同方法，如果你想有offer，與其抱怨，不如睇下點樣可以做得更好。當年，我老公入房填問卷，我有提醒過佢，儘量寫快D寫多D，佢一攞到份卷，就系咁答系咁答。而我一直都有教小朋友唱好多歌，個日啱啱好，D歌全部都係識嘅，所以小朋友都好投入。小組面試，玩嘅遊戲都係小朋友平時系屋企比較有興趣嘅，再加上我個組，有兩個小朋友一直喊一直喊，我個女就好淡定咁系度完成指令。
所以面試呢家嘢，除咗要有準備，都係要有運數。大家都從PN in到K1，無可能呢個咁簡單嘅道理都唔知道架。其實我想講比最近話明慧歧視佢嘅個位家長聽。一來，天外有天，人外有人，自己當然就覺得自己嘅小朋友好叻，事實上，仲有D大B更加叻，差一個月就差好多架啦。二來，點解有D人平平無奇，偏偏咁富貴？因為人哋好運，中六合彩啊嘛。。。咁請問，你可以怪邊個？如果，你真系覺得學校歧視你或者你小朋友而且令你覺得好唔舒服嘅，你可以去平機會去為自己爭取個公義，我相信香港目前，仲系一個法治嘅社會。
之後，我攞咗國際班嘅AM offer，就無再in其它學校，一心一意等開學喇。接落來我可以講下關於學校嘅嘢。
有人話明慧好商業化，從攞到offer到宜家讀緊書，咁耐以來同學校嘅交手，我又唔系好覺得，舉例（為咗寫呢個Post我專門翻箱倒櫃揾返D收費通知出來）：
學費：3,600每個月，交12期。 因為明慧嘅假期比較短，所以交12期。再加上小班教學，每個班1姨姨1廣東話老師1外籍老師（我女女班嘅，系一位講英式英文好好聽嘅老師，我好中意聽佢講野），師生比例好好，我覺得值得。
上學期書簿雜費：Total 2,740，我覺得好抵—— - 書本：每個禮拜都有一兩本新書帶返來，學完嘅，老師會印一個taught字，就可以放喺屋企唔帶返學校，書嘅質量都好好，而且多元化，中文英文同埋有D感官嘅書都有。 - 練習冊：有歌曲集有art file仲有唔同嘅親子作業。 - 手工勞作：時不時都有D作品帶返來，入邊有唔同材質嘅嘢。 - 茶點：有麵包有餅有粥啊麥皮啊之類嘅仲有juice，反正我女女都好鍾意食學校嘅嘢。 - 校服：用金綸公司。如果有爬BK嘅家長應該都知道，金綸比較貴D，但系質量唔錯。呢個學校無硬性規定，你自己去其它地方訂造都得。 - 其它：有書包、杯、毛巾盒 - 學校會定期有主題party同生日會，多數時候，都唔需要家長準備食物去。
旅遊：11月頭去咗黃金海岸，大人130蚊，小朋友唔洗100（揾唔到張通告），主要系交通，有個導遊叔叔，一人送一條毛巾。開頭我都覺得貴，後來參加咗之後，我覺得可以接受，因為整個安排都好好又舒服。
除此之外，就無其它收費喇，又無叫我哋參加咩班買D乜，我真系唔明白，點解D人話呢間學校商業化呢？（字數太多，下文繼續）
| 
發表於 14-11-28 22:36
