怎樣教導女兒?

bennyeva

我囡又係完美主義得很，因為我自己都係咁嘅性格，所以好早就留意到佢嘅固執同要求高令到佢有脾氣。

建議你第一係教佢點去表達自己，語言或動作都得，資優小朋友對自己要求高但動作上未可以配合到，會好嬲自己。所以我地先會平伏佢心情，講「媽咪明白你」，佢一般好快就收聲，之後將佢心入面嘅説話講一次出來「寶寶唔開心，因為寶寶唔夠高，攞唔到放喺枱上面個碗碗」慢慢佢想表達出來，自然會識用講去表達。表現同理心，「媽咪細個嗰時教試過，於是我問婆婆…」

同時我會每日都講好多德育、EQ嘅故事書，佢會開始知道咩係對與錯，發脾氣幫唔到自己的。

再教佢點去控制自己情緒，如深呼吸等。最緊要係身教，我會喺佢面前示範，想發脾氣就行開一陣深呼吸。其實個囡係自己一面鏡，為左個囡，我自己脾氣都好左好多

我都係上左呢版了解多左先明白，其實小朋友係唔係資優都好，好嘅育兒嘅方法係通行的，資優或者會更快更好咁吸收你講嘅野，好似我囡就因為自己有興趣，佢好想表達自己諗法同講故事比公仔聽，所以而家語言能力不錯。

另提提你，三歲前小朋友不建議睇電視，3-4歲亦唔超過15分鐘。電視電腦智能電話可免則免吧。

阿女爸爸

支持身教！

Lam3Tai

可以0係規範(即校規、家規...)下有創意。
不過話說回頭，作家長都要做個role-model，無論態度處事等。有時見到家長們對工人姐姐好唔客氣，既為家中常見一員，呢個影響都唔少。

阿女爸爸

學校有校規，
屋企有家規。（可以是好輕鬆！）

認同！

2.5歲真係好細個。聽你咁講你個小朋友都好有創意。值得鼓勵！只係學校未能配合。反而可以同個小朋友講唔同地方有唔同規則，可能佢獲益更多。

lillymarie

我會不停地提小朋友要聽老師指示，在學校要守規矩。同時解釋給小朋友聽，老師要他先坐好才有得玩。

基本上在學校的事交給老師處理。

學校有校規。
屋企有家規。（可以是好輕鬆！）

小朋友好快就會明白屋企和學校是不一樣的地方。不必担心，只要讓她明白你和老師是對她在學校的行為要求是站在同一陣線就夠了。

阿女爸爸

處理情感及情緒問題比學術更重要。依家好多小朋友講說話都唔會理會其他人感受，自己睇到都心裡一沉。但再諗下好多時大人講說話都無理會或體諒小朋友嘅感受。

Lam3Tai

其實是否資優，行為情緒問題都需要處理，否則再叻都假。我小朋友都比老師反映過佢無數次，我0既方向都係有錯就糾正，唯有解釋解釋再解釋。評估只係數字，資料會當作更了解小朋友想法0既途徑。

阿女爸爸

EQ方面，有了小朋友先覺得自己EQ係咁低。自從知道自己係咁嘅時候，一火起時必會問自己做緊咩野，同埋同自己講小朋友做錯嘅野根本係一件小事。


至於小朋友動作大，我估計好多時佢地係太開心，同唔識就力，我亦會解為缺乏同理心。面對此情況，我便會嘗試叫佢調轉身份諗下。so far都ok.

lillymarie

老師也在幫助你教好女兒。不合作不守規矩，會影響她將來的待人接物態度。

小貓貓兔

又唔使太緊張, 好多行為問題大下大下, 佢明多左事理左就會消失, 對呢類小朋友要多包容, 唔好要佢樣樣達到要求, 日常生活冇大問題就已OK。大人遷就佢多少少, 同時多同佢講道理, 佢聽得多會潛移默化。就算4, 5歲都仲係好細, 最緊要親子關係好, 其他事都好辦。

阿女爸爸

2.5歲其實好細個，成日發脾氣亦都可能係正常。始終佢地對所有野都可能覺得好新奇，或者可以講係以前未遇過，又唔識表達，因為唔識講，甚至表達唔到，所以先會忟憎及發脾氣。你有無試過遊戲治療？如果你真係接受唔到佢嘅行為，你可以試一試。始終對於咁細個小朋友，遊戲係唯一溝通橋樑。

阿女爸爸

有機會係資優。一般資優都係因為智商高，其他方面未能配合，好容易會發忟憎。但資優評估年齡最小要六歲，可能你要忍耐一下。
如你選擇從EQ着手，可以試下同佢玩一d有關表達情感嘅遊戲，令佢認識自己嘅情緒，從而教佢如何疏導自己的情緒。

torunpoland

如有統感問題, 可以試找建基兒童發展中心的職業治療師幫下手.

http://www.fundamentals.com.hk/