苦惱中..突如其來的電話offer,你會接受嗎？

晞晞爸b

唔好意思又來煩到各位..
事關前幾日突然收到救世軍（唔講邊間分校喇）主任打來話有K1全日班插班位，叫我地父母帶小朋友去見見校長，我問佢是否是interview,佢話不是，佢話校長只係想約見一見我地及小朋友。佢全程好客氣，有問必答，上課情況及學費等等都一一解答我。

問題來了，究竟接唔接受呢個Offer好？

以下是初步分析：

接受-
1.救世軍嘅名額好少，先到先得，我係2年前入表，當時已經算好遅入表，排200幾十號，一早已打定輸數。突然有插班位，好難得，唔讀好似好嘥..
2.小班制，師生比例1：11，教育局規定1：15，老師有愛心及耐性
3.基督教學校
4.蒙特梭利教學，唔太谷
5.德育、規矩、禮貌、獨立自主係呢個學校辦學宗旨
6.不商業化

不接受-
1.學術太淺，小一怕跟不上 & K1冇NET


苦惱-
由於囝囝現時讀緊果間（非名幼）K1係教深一年，屬催谷型，上午國際班由西人做班主任，英文好d，囝囝暫時跟得到，返學返得好開心，我太太擔心如果轉學校小朋友唔知適應否，而教太淺又驚囝囝悶，囝囝英文字母A~Z已識哂，而聽講救世軍要去到K3先教哂A~Z（如有錯請各位家長指正，謝謝！）又驚升小一要追得很辛苦..
囝囝現時讀緊果間西人班主任剛開學時曾打來向我投訴我囝囝上堂時坐唔定四圍走，並告知我 SCHOOL 不等於 PLAY. 坦白講，西人班主任老師要趕進度我可以理解，但我完全唔認同 佢理論SCHOOL 不等於 PLAY.  雖則囝囝呢幾個禮拜已改進好多，連果位西人班主任都同我講佢進步好多，上堂已經可以坐定定。 但我已經對呢間催谷學校既老師有保留..我想囝囝能培養好德育先，愉快學習，藉著PLAY去學習及啟發佢探索事物既興趣及好奇心，建立自信心。

如果你係我，你會否接受呢個offer?有冇過來人及救世軍家長用家可以俾d意見？萬分感激！謝謝！

tra5212

晞晞爸b,我記得你個仔同我個仔一樣大，都係11月細仔，我同你一樣留在原校升k1，本身考到第二間，不過都係尊重阿仔決定，佢鐘意依家呢間就讀呢間，帶佢去新學校睇過，問佢讀呢間好唔好，佢會話唔好，我係讀xxx幼稚園，叫佢轉黎新嗰間讀，佢會話佢鐘意佢自己間幼稚園，所以信佢，始終係佢讀，佢擇都好應該

cherrycsw

Support !

小朋友親身感受去揀幼稚園係最好的!
我個仔N班時係讀救X軍的, 之後K轉了某英文私幼.
依間私幼係啊仔揀的, 佢好鍾意有OUTDOOR 設施, 而且佢話救X軍番全日好辛苦, 令佢冇乜時間係屋企玩.
當年社工朋友話我傻, 點可以比一個兩歲多既小朋友自己揀學校 , 但我話番學0個個係佢, 唔係我, 當然要比佢自己揀間鐘意架啦.
依家啊仔K3, 面對考小一, 間間直資/私校都考得好深, 就算啊仔讀已程度深的私幼, 由於冇去補乜補物, 都有部份INTERVIEW既問題唔識, 我真係唔知如果當年留係救X軍, 今日點去應付直資/私校小一面試..............
不過如果當年留係救X軍, 德育培訓方面應該好過依家.........針係冇兩頭利....

fheung

Elau719

原帖由 晞晞爸b 於 13-10-05 發表
唔好意思各位，呢幾日病到死死下，加上公司搬寫字樓，未能即時回覆及向各位報告最終決定，現在向各位講聲  ...

對，小朋友感覺最重要所以明天有些學校open day我都會同小朋友去感覺一下，多謝分享

晞晞爸b

唔好意思各位，呢幾日病到死死下，加上公司搬寫字樓，未能即時回覆及向各位報告最終決定，現在向各位講聲 ＂多謝＂ &  ＂對唔住＂！
再次多謝關心我囝囝嘅朋友，謝謝你們的寶貴意見，另外要講對唔住，因為咁遲先覆（有些仲未得閒覆）。

最終決定係留返原校。

可能你地睇完以下（有點長篇）會明白我這決定有幾難...：

講真，囝囝現在讀緊果間英記並非什麼名幼，而救世軍也並非名幼，但經過今次事件之後，我又學咗野及瞭解咗自己小朋友多咗，算是意外收穫吧...

事關九月尾某日中午收到救世軍主任打電話來話有位插班K1嘅時候，我心情好厄然，因為自從八月中旬英記開學後，因為某些原因（請恕我不便多說了，也請各位不要PM問我令我難做，謝謝），讓我開始去認真思考是否該讓我仔仔轉換一個比較開心、老師比較有愛心，冇咁谷的學校。

咁啱收到救世軍打來，好像見到一線龧光，因為完全冇諗過救世軍有位，尤其等咗2年幾，而救世軍出名蒙特梭利教學，老師有愛心，小班教學、開心學習。而K1全日班正合我意，於是我跟我太太當日下午即刻停止手頭上既工作，二話不說即刻飛的趕過去學校實際睇下環境。主任很客氣介紹學校給我們認識，我們見到小朋友們上課好開心，也對學校留下更好印象。

當天回家路上，我太太和我一直在思考及討論到底應該如何去抉擇，當然，老師愛心、小班制、課程淺可能上小一會追得比較辛苦等這些問題我們都一一諗過，最後我們覺得對我們來說，以上這些都係其次，最最最緊要係囝囝自己嘅感受，ie佢是否會鍾意 & 適應新環境。

於是過2日帶囝囝親自去救世軍，校長見囝囝之餘我們也可藉此從旁觀察囝囝到底喜歡唔喜歡新環境。果日上到去，一入門口，已察覺唔對路，囝囝已含住包眼淚忍住，雖然校長好有耐性及愛心問佢而佢亦有答問題，但好明顯見到佢驚& 唔鍾意。校長全程好有愛心及耐性，令我很感動及感激。但當晚囝囝瞓覺喊，前後三、四次喊醒，可能佢都sense到要轉校而唔開心。

我同我太太都覺得，小朋友嘅感覺最真，只要佢開心就好。而好明顯見到囝囝日日返英記係笑住返學，呢樣野先至係最重要。

隔日上午我太太即時打去俾救世軍校長，向佢say sorry,因為真係唔好意思麻煩咗主任及校長，亦唔想hold住嘅位，快d放返出來俾下一位等緊嘅小朋友..

經過今次，真正見識到救世軍主任及校長真係好有heart & 愛心，可惜囝囝冇此福份...

在我們父母不停報十幾二十幾間幼稚園嘅時候，也許我們也該認真去考慮孩子們的感受，那最真的感覺...

KittyMelody1

CREATION 發表於 13-10-3 22:07
都未必，我有朋友佢囝囝讀救世軍4年，可以考入英華小學。

咁你又有無問佢父母有問起背後發功? 單純靠學校真係好難相信....舉個例吧, 英華小學考既有好深下既串字, 救世軍跟本唔會默/串咁深既字....

liaosee

我係過來人，我囡讀嗰間救世軍真係好淺好淺，係我囡高班下學期，我先幫佢報咗出邊學英文同珠算，我囡今年9月升小一，做功課都係吃力，聽講其他同學仔仲誇張!

lingan

晞晞爸B，今日才看到你的帖，好奇一問，阿仔有決定未?

虎B

我都有朋友個仔讀救世軍，入咗st Paul co Ed

CREATION

KittyMelody1 發表-9-30 17:50
好開心知道你小朋友終於都坐定定上堂, 唔使再罸企咁慘...

救世軍都係好學校, 但佢既課程真係同現實脫哂節 ...

都未必，我有朋友佢囝囝讀救世軍4年，可以考入英華小學。

hflam

原帖由 晞晞爸b 於 13-09-29 發表
唔好意思又來煩到各位..
事關前幾日突然收到救世軍（唔講邊間分校喇）主任打來話有K1全日班插班位，叫我地 ...

其實我阿女間學校在家長講座中，個NET都話佢地會在遊戲中學習。所以你阿仔間學校話返學唔係玩係好有問題。學校系happy school...唔多功課反而可能系機遇，你可以有空間教自己想教的野。我認為學習最重要係過程而非結果。所以你真係要考慮清楚你是否看學校能否令你個仔學深一年的知識就夠。(利申:我太遲知SA要早報，所以無同阿女報，你個仔果間，唔好介意，系我的black list中，因我的同事們個個對呢間都評價不好)

sweetiedragon

Take care! Add oil!

helenchanz

晞晞爸b 發表於 13-10-1 00:34
非常感謝各位爸爸媽媽的中肯意見及熱心，有好幾位甚至PM我學校的情況及你們的意見，也很感謝有位媽媽留電話 ...

我冇經驗但認同!"我們更重視的是囝囝的親身感受及體驗"!!

晞晞爸b

非常感謝各位爸爸媽媽的中肯意見及熱心，有好幾位甚至PM我學校的情況及你們的意見，也很感謝有位媽媽留電話號碼給我歡迎我查詢她意見，真心感謝各位、我很感動及感激你們，不論是公開回帖或PM我的爸爸媽媽，謝謝你們！字𥚃行間我感到你們的關心及祝福！謝謝你們帶給我的溫暖！也謝謝BK有這個平台！

由於近排公司忙搬寫字樓，我累的終於病了，請原諒我不一一回覆各位，對不起..

今天和太太一齊帶囝囝去見了救世軍的校長，果然校長很有heart.很有愛心，看的出她很愛每個小孩，我很感動，尤其在我曾經寫了八封求位信給KM及LH而人家完全不理我之強烈對比下，救世軍校長的誠懇及愛心真讓我感動到想哭。

無論如何，我太太和我都覺得要由囝囝自己去決定及感受，所以一定要藉由他自己親自去學校感受下才是最真實的。對我太太及我來說，學術深淺雖然重要，但我們更重視的是囝囝的親身感受及體驗，試著以他的角度去看這件事，他是否喜歡這新環境才是我們比較考慮的問題。

再次謝謝各位！能認識你們真好！謝謝！

BBilly

原帖由 晞晞爸b 於 13-09-29 發表
唔好意思又來煩到各位..
事關前幾日突然收到救世軍（唔講邊間分校喇）主任打來話有K1全日班插班位，叫我地 ...

晞晞爸b, 先前有睇過你d posts, 知道你仔仔讀邊間...我朋友個case 同你相似，之前讀同一間kindergarten PN 班，返學很happy. K 班轉了同區的學券學校，半年只有2本書，程度太淺啦，而家小朋友吾鍾意返學，因為d野一早已教過晒，返學就變得好悶，仲成日問媽咪：「係咪因為自己吾乖，所以教師吾教新的知識比佢？」。So 真係要三思！

陳皮爸媽

好簡單，邊間適合小朋友？
請用小孩子角度來看、不存在嘥不嘥，谷不谷的問題、有D小孩子好谷得！

KittyMelody1

晞晞爸b 發表於 13-9-29 17:26
唔好意思又來煩到各位..
事關前幾日突然收到救世軍（唔講邊間分校喇）主任打來話有K1全日班插班位，叫我地 ...

好開心知道你小朋友終於都坐定定上堂, 唔使再罸企咁慘...

救世軍都係好學校, 但佢既課程真係同現實脫哂節 (E.G. K3先教哂A-Z), 幾相信呢個原因, 太多家長走,你先會有機會插班....我覺得好睇你想仔仔將來入什麼小學, 唔好話一線名校, 就算好昔通既私立/直資小學d入學面試, 全部考好深下既學術問題....如果好似你形容.----->K3先教哂A-Z, 真係可以唔使考....當然, 如果你一心讀官/津校, 想小朋友愉快學習既, 又夠分就唔使煩學術啦...有時針無兩頭利架...

vnghk0001

排左2年只不過係入表排啫，冇乜可唔可惜架。

xoshan1025

原帖由 mamath 於 13-09-30 發表
我沒有經驗, 只是從你的個案而言, 若小朋友讀得ok, 不討厭上學, 應可以留在原校接受學術training.  不太知 ...

認同!
再者學校要求學生坐定定，好正常!救世軍都會!
既然小朋友有改善，即係受教，一動不如一靜!