辦家長日收回條 科大被嘲小學雞 學生會長：宜改辦開放日

elbar

■科大學生會會長石毅俊

【隔牆對論】

大學生「小學生化」，直升機家長、怪獸家長大舉入侵大學，科大明日首辦「家長日」，有逾千名家長簽回條表明出席。港大、嶺大和教院等院校也有類似活動，從事中、大學生輔導工作的理大學生輔導主任崔日雄指，外國院校也有家長日，不足為奇，有助家長了解子女的大學生活；科大學生會會長石毅俊則認為，「家長日」之名易與中小學的家長日混淆，令外界有誤解，認為應改成開放日，由學生決定是否邀家長參加。大學之道，在明明德，父母不知先後，子女豈能近道？　

記：《蘋果》記者
石：科大學生會會長石毅俊                                                                                                        
                                                                                                                                                                                                     科大入口迴旋處有一個大型地標，是一個紅色日規，科大人俗稱其為「火雞」。校方舉行家長日消息曝光，被譏將「小學雞」文化引入大學。明日的活動主要是參觀實驗室和宿舍，各學院將講解課程和教學方法。石毅俊表示，學生會曾質疑校方舉行家長日的必要性，並認為家長日之名令人以為是派成績表、見老師。

記：科大明日首次舉行家長日，不少學生不表贊同，網民又譏諷大學中學化，你認為是否校方失誤？

石：名稱上有誤導，因為家長日普遍係指中學家長日派成績表。港大都有類似活動，但係叫家長資訊日，令公眾知道同中學嗰種家長日唔同，科大就冇考慮呢方面，變咗公眾以為係咪大學生拎成績表，家長同教授傾偈。

記：家長日邀請信附有家長回條，要家長答覆會否出席，是否另一個錯？

石：學生會邀請嘉賓參加活動，都會發出邀請卡畀佢哋，等佢哋回覆會否出席。我屋企都收到家長日邀請卡，但要家長簽回條，令人覺得好中小學。我覺得校方成個處理手法都係好中學諗法：舉行家長日，跟住我畀回條家長簽。

記：學生會一早知悉校方舉行家長日，有否提出反對？

石：早前與校方傾過家長日存在意義，科大校園開放畀大眾，連圖書館都可以入，學生都可自己帶家長入嚟參觀，所以質疑係咪有需要搞家長日。校方話收到一啲家長寄信、電郵嚟查詢子女情況，主要係學術方面，既然需求同供應同時存在，不如都舉辦一次家長日。


■科大明舉辦家長日，學生及教育界代表均期望，校方能讓家長了解大學與中學學習模式的分別。

記：科大最終沒有取消家長日，可以如何作出補救？

石：首先一定要改名，減少誤導性。聽日嘅活動同畀中學生嘅資訊日差唔多，都有展板同導賞團，帶家長參觀吓校園設施、實驗室、宿舍環境，介紹學生畢業出路等等。如果性質同入學資訊日差不多，可以改成開放日，開放畀公眾，唔係只針對家長，各界人士都可以參加，因為有其他人都會想嚟科大。

家長入到嚟，校方應同佢哋講係時候放手，好似話如果你哋發現仔女成個禮拜或成個月冇返屋企係正常，因為大學（生活）係好獨立，好多活動同學習，如果咁講嘅話，出嚟效果就好唔同。如果係勸家長放手，（學生）反而鼓勵大學咁做。
記：有否聽過科大有怪獸家長？情況是否普遍？

石：從校方方面聽到，學生考得唔多好，有家長寄信畀教授查詢原因或者要求加分，不過只係小部份。有啲家長好緊張仔女，為仔女抱不平，覺得成績咁樣會唔會係教授問題，但有啲係過咗位，學生係可以自己處理到成績、個人發展，要負最大責任。

有見到新學年家長幫手搬入宿舍，係多嘅，最主要原因係多嘢，所以我覺得合理。如果每日爸爸媽媽都跟住佢，就好有問題。

記：你認為為何現今家長會如此緊張子女讀大學？

石：係精英文化帶出結果，𠵱家有講怕「輸在起跑線」，家長都知道要不斷培養子女，由3歲開始學英語拼音、小學要考到八級鋼琴，好好裝備自己，等我哋一出社會就係精英。所以父母會幫我哋鋪排，但會令青少年少咗嘗試機會，等到大學先至學獨立，家長應該放手。

記：多間大學都舉行家長日或類近活動，有否擔心影響外界對大學生印象？

石：從自由角度睇，學生有自由，家長都有自由了解子女，呢個無衝突。不過另一角度睇，院校搞家長日係咪會令人覺得大學生冇自理能力，呢個係我哋關注。

青少年慣咗做「低頭族」，少同屋企人溝通，令到家長可能透過呢個渠道，去了解仔女。但家長會否將照顧中學生、小學生文化帶到大學，係潛在令人擔心嘅問題。

記：你父母明日會否出席家長日？

石：佢哋唔會出席。舊年我都有帶爸爸媽媽入嚟睇吓宿舍，同佢哋講吓上堂情況，但冇帶去見教授。佢哋睇完話幾好呀、幾特別。我覺得向父母交代，係作為成年人責任。自己帶家長入嚟，唔可以當係小學雞文化。

elbar

面試獲聘　僱主見母「即叮」

http://news.mingpao.com/20130930/gca2.htm


直升機家長除跟隨子女進入大學，部分「港童大學生」晉身職場後，「直升機」父母仍在他們頭頂盤旋，令僱主氣結。有母親見任職中醫的女兒跌傷沒告假、仍然上班，每日在診所日坐多個小時向僱主抗議；亦曾有大學畢業生面試過關，但僱主隨即發現其母在外面等候，二話不說將她「叮走」。

女帶傷上班 母上門靜坐

中醫診所負責人陳小姐憶述，診所內一名大學畢業不久的中醫師，一次因跌傷要坐輪椅上班。因中醫師多坐在房內診整，甚少走動，腳部受傷對工作影響實不大，但該名中醫師的母親卻不滿僱主要求其女兒帶傷上班，連續數天每日坐在診所多個小時以示抗議。

陳小姐說：「她（中醫師）若要請假，只要交醫生紙就可以，但她沒有交，也沒請假。」診所職員難以理解那名母親「代女出頭」的行為，只能置諸不理；其女後來則因人事問題辭職。

中原人力資源顧問公司董事總經理周綺萍亦表示，曾有女大學畢業生應聘某會計公司，該公司高層面試完，本打算聘請她，卻發其母在公司外等候，僱主質疑她要由母親陪同前往面試場地、不夠獨立，最終改變心意不予聘請。

elbar

科大家長日　內地父母奔港代子「出頭」　港家長憂女兒住宿舍越軌

http://news.mingpao.com/20130930/gca1.htm


「養兒一百歲，長憂九十九」是父母的心聲。科技大學首次舉辦「家長日」，吸引約3000人到場，有家長直言擔心女兒住宿舍會亂搞男女關係，亦有內地父母遠道而來，代兒子投訴宿舍噪音，還有港媽自認恐防女兒在宿舍吃不好、住不慣，頻頻送湯水給她；科大學務長譚嘉因則建議家長放手讓學生自行處理問題。

科大：發回條旨在計人數

科大首辦「家長日」，日前向家長發出邀請函時附有回條，確認家長出席，其後被學生上傳至社交網站，引起網民熱烈討論。有網民嘲笑大學生也要如中學生般簽回條，是「大學幼稚化」；科大學務長譚嘉因昨表示，要求學生交回條只是想準確預計家長人數，而舉辦家長日是基於過往很多家長有此訴求，又強調全世界大學也有辦家長日。

媽媽隔數日送湯到宿舍

大學和中學最大分別，是大部分大學生都有住宿機會，科大更保證每名學生可住宿一個學期，惟有家長擔心子女不慣住舍宿。居於馬鞍山的陳太，每隔數日便會帶湯水給就讀商學院二年級、入住科大宿舍的女兒，雖然陳太是全職工作，要趁上班前後送湯水，每次來回約花2小時，但為了女兒仍不辭勞苦。

有家長則在宿舍概座談會上，表示憂慮大學宿舍男女同層，會容易出現越軌行為，舍監楊霖龍回應，男女應學習和異性相處。

來自廣州的楊先生及太太則擔心兒子的睡眠質素，楊太指兒子以往晚上10時便要休息，但宿生往往吵至凌晨2時，兒子曾向樓層負責人投訴不果，原本公務繁忙的楊氏夫婦，遂專程來港參加家長日，向宿舍舍監反映。舍監楊霖龍回應，若學生遇困難，應積極與其他宿生溝通，並自行解決，這才是大學生住宿的意義。他又笑言，每年都有家長過分緊張，甚至帶傭人及家人到子女房間打掃，他希望大學生可透過宿舍生活學懂獨立自理。

譚嘉因亦透露，過往有零星家長代子女向校方投訴或求情，如希望子女可繼續住宿。他寄語家長，若關心子女可加強溝通，但子女遇到困難時，應放手讓他們處理。

還有家長代子女打探前途問題，已退休的夏先生昨偕同太太及兒子到場，其間與生命科學學系教授交流，夏同學對研究生課程感興趣，但表現害羞，全程未有發言，而是由父母代為詢問。

學友社輔導中心總幹事列豪章提醒家長，大學生已是成人，對子女過分寵愛反會影響其成長；干預子女生活愈多，子女處理問題的能力愈低，家長應重新檢視管教模式。

elbar

理大輔導主任：提醒父母放手






■理工大學學生輔導主任崔日雄

【隔牆對論】

記：《蘋果》記者
崔：理工大學學生輔導主任崔日雄



中文大學校長沈祖堯曾經說：「人生應該是浪漫的，做大學生應該是浪漫的。」跨進大學校門儼如一場「成人禮」，年輕學子換走單調校服，掙脫嚴苛校規，在大學呼吸自由，追尋夢想。然而這幅浪漫圖畫的角落，卻有爸媽正在幫新生揹書包。科大今年首創「家長日」，外界迴響甚大，但崔日雄指出，大學為家長舉辦迎新活動由來已久，並非新鮮事。

記：大學為新生家長舉辦迎新活動是否普遍？是否越來越多家長參加？

崔：呢類活動一向都有，外國好多大學都會搞呢類家長活動，唔算好奇特，亦係理工大學嘅傳統。我哋每年開學禮都邀請家長參加，可以見吓仔女嘅老師，了解校園設施，聽學生分享讀大學嘅情況，因為同中學好唔同，校方希望令家長明白大學生活係點，了解仔女讀大學後學習方式或會有轉變。

參加開學禮嘅人數一向平穩，唔見得忽然多咗，反而越來越多家長主動參加資訊日，或者畀準新生嘅輔導講座，以往呢類活動只有一成家長，近年增加到一半，有啲自己嚟，有啲帶埋仔女喺身邊。

有報道指今年9月湧現大批「怪獸家長」入侵大學校園，替「小學雞」大學生子女揹書包，上學管接管送，甚至結伴參加O-Camp。部份學校因新生尚未成年，須經家長簽發回條批准，才能參加學生活動。

記：以往大學生予外界印象是獨立自主的成年人，父母甚少過問其校園生活。為何現在的父母如此積極「返學」？

崔：我認為有幾方面因素。首先呢代人嘅仔女數量普遍比較少，家長自然緊張啲；以前入到大學嘅都係精英，𠵱家學位多咗，入到大學唔代表係好特別嘅事，有啲家長會對仔女能力有懷疑，成日擔心「佢得唔得㗎？掂唔掂㗎？」加上仔女考少咗公開試，少咗歷
練，所以家長好想參與多啲，幫仔女做決定，否則唔放心仔女獨自返大學。

記：這類家長有何共通點？緊張到何種程度？

崔：家長會諗定幫個仔揀乜嘢科，向學校問得好仔細應該點做，（站在家長）隔籬個仔個樣多數比較乖，唔出聲。有家長甚至幫新生reg埋科（入學後挑選及登記學分課程），唔滿意reg科安排又會投訴。

其實咁樣做對培養仔女獨立性唔係幾好，我哋會建議家長同學生溝通咗先。呢類家長未必知仔女想要乜嘢，好多時我哋單獨同個學生傾，就發現佢原來有諗法，唔鍾意家長嗰套，只係冇講出嚟。家長只會覺得橫掂仔女冇意見，不如自己幫佢決定。久而久之，學生就會覺得家長幫我搞掂晒，唔使自己諗，更加依賴家長，冇辦法成長，好似惡性循環。

記：類似家長日的活動會否助長「怪獸家長」或「小學雞」現象？大學如何處理這類家長？

崔：家長獲邀出席開學禮，感覺受尊重，係好正常嘅學校儀式、活動。如果開學只係搞一次家長日，問題唔大，有平台畀家長同子女加強溝通唔係壞事。問題係表達方式同埋調整家長心態。

活動目的要帶出一個訊息：仔女已經大個、成長，唔好用中學角度睇佢哋。例如我哋搵學生分享，有時提到大學生傾功課可能要通宵，咁家長就唔會問點解個仔成日咁夜返。家長亦需要明白，學校係直接面對學生，家長唔應該代仔女接觸學校。無論新生夠唔夠18歲，入得大學，我哋都當佢係大人，發成績單、約見，都係直接搵個學生，唔會好似中學咁見家長。呢啲方式，同中學好唔同，我哋希望家長都了解到當中分別。

記：有何建議給大學新生家長？

崔：家長唔應該乜嘢都管，要畀機會仔女成長獨立，大學生應該係處事成熟嘅人，家長唔可能成世跟住佢返學、返工。我哋會鼓勵家長同仔女傾多啲，了解佢哋諗法，大家一齊分析先做決定，而唔係幫仔女做決定。家長要諗吓，你嘅所謂溝通，有冇鼓勵仔女講多啲？畀佢做抉擇之後會唔會又質疑番佢轉頭？其實好多學生唔介意聽父母意見，因為父母可能都係過來人、讀過大學，但係佢哋想係做最後決定嗰個人。𠵱家個問題唔係你敢唔敢放手，而係你一定要咁做。