給ADHD小朋友的父母親一些情、一些事

肥師奶傲雪

希望大家花小小時間，耐性，睇下呢個ADHD媽媽同女兒既故事，或者對你或你既子女有幫助

先簡單介紹下自己和自己的小朋友，現職part-time文員，單親媽咪，領綜援補助，女兒今年快十歲，由二年級開始確診睇ADHD到而家兩年多，由每日分兩次食Ritalin 合共10MG到現在每日食一粒Concerta 54MG，一直睇政府醫生。

幼稚園時，活動教學，沒太多功課，返學好似去遊樂場咁，女兒返學好開心，每日都好期待返學；到上小學，到保良局學校讀書，功課超多，女兒開始唔想返學，返到學校亦都成日攪其他同學，老師察覺到，學校安排佢見中大臨床心理學家，臨床心理學家見左佢幾次之後，就寫左封信比佢排醫院見醫生。

二年班，終於排到隊睇醫生，一開始醫生會開Ritalin10mg每日早午食加一粒開胃藥比佢食，但係到中午時份，女兒唔想食，因為怕同學見到，驚比人話，好抗拒，而且效果唔明顯，然後我地覆診時同醫生講，醫生就開Concerta 27mg加開胃藥比佢食，都係唔多夠，每次覆診逐小逐小加藥，到現在四年班加到食Concerta 54mg，食得好好，無副作用，雖然個人係定左，但都仲好似問題多多，但又唔知出o係邊度。

由佢一出世開始到二年班畢業，我都係一個全職媽媽，做美容院，工作不定時，同佢好少接觸，亦甚少親子時間。到佢二年班畢業時，原本之前一路都係婆婆湊佢，有一日婆婆同我講：『我頂你個女唔順喇！你自己湊番佢啦！』我把心一橫辭左份工，全職湊女。開始時，好吃力，我發覺佢咩人都唔怕，唔識尊重長輩，更甚者試過老師鬧佢幾句，佢一腳伸左落老師隻腳度，可謂膽大包天！屋企人對佢既打打鬧鬧已成習慣，全無悔意，家人投訴，學校見家長有如家常便飯，究竟出左咩問題會令到個小朋友咁大鑊呢？呢兩年我一直在思考呢個問題。

在我全職湊女期間，開頭我曾經打佢，等佢學識服從，肯聽人講野，唔可以亂發脾氣，教佢日常生活應做既事，再慢慢從自己成長時遇到既問題去代入佢度，ADHD有好多案例係遺傳既，我屋企係三代遺傳，我、我爸爸細個時都係ADHD，好多佢遇到既問題我都曾經遇過，所以好容易我可以代入到佢既角色去諗每一件事，有時會打電話去同教佢既老師傾下偈，了解下佢o係學校既生活係點。

今年我安排左佢去打排球，佢打左半年，好鍾意，以前我讀書時都係排球隊，近排我終於的起心肝買左個波返屋企，一有時間就同佢落街霸球場練波，佢好開心，我地可以一練練三個鐘，打到隻手腫晒都笑得好開心，我觀察佢打波時有咩問題，一步一步去教佢點做到，比好多鼓勵佢，甚至乎考試期間，我話比佢知溫完書陪佢落去練波，佢就好聽話去溫書，毫無怨言。

我屋企係一個奇怪既地方，因為我媽媽係個全職師奶，好多時好多三姑六婆在我家出出入入，我發覺佢既親朋戚友成日持住自己係長輩鬧我個女，但係我媽媽只會陪笑，從來都唔會撐我個女一句，一係同埋人地一齊鬧佢，我開始發覺好有問題。發覺要做番D野，開始時我無刻意同我個女講，但當一有人話佢時我即時撐佢，撐完佢我再私下同佢講番點解人地要咁話你，你咁做究竟有咩問題，會點樣影響到人，再比多一個訊息佢，你阿媽都未教你，幾時輪到三姑六婆出聲！你只需要聽媽咪話就得勒，其他人講既野，你可以唔使理，但你要講番比我聽，等我去同你分釋番件事。

我亦都對佢賞罰分明，當佢做得好時，我會讚佢，做得好好時，我會買小禮物比佢，當佢做得唔好時，我會責怪佢，而家我已經唔需要打佢，自從我地行左賞罰制度之後，我用海洋公園既海豚黎形容佢，當訓練員對海豚比指令時，海豚做得好，訓練員會比條魚佢獎勵佢做得好，海豚做得唔好，就唔會比獎勵，你都係媽咪條小海豚，你做得好時，媽咪點都會撐你，獎勵你，你做得唔好呢？媽咪就唔撐你架喇！佢一聽到媽咪唔撐佢，竟然即刻喊左出黎，我突然諗起自己同自己媽咪以前既關係，我媽從來都唔撐過我，由細到大我只記得一次學校見家長時佢撐過我，一直都無支持或鼓勵過我任何野，無論我一件事做得幾好，孝試全班考第三都無獎勵過我讚過我，仲要話我都唔知係咪出貓既，果一刻，我至知道原來父母既支持係幾咁重要。

有一日，由於我既安排不周，明明放假但要返學校練波，但因為我唔記得左返左工，唔記得提佢返去練波，所以打電話返學校搵老師同佢講女兒返唔到黎，跟手就問下佢佢打波打成點，同同學相處成點，問下老師知唔知佢ADHD，老師竟然話唔覺佢係喎，反而覺得佢有小小自閉！我奇怪，再問多D，老師話佢唔係好識同同學相處，成日唔同人講野，雖然練波好積極，但同人夾唔到，我諗左好耐，點解ADHD會變左做自閉？我又代入佢個角色，嘗試去諗下點解細個時會唔同人講野，比人覺得自己自閉。

終於我搵到一個同佢講呢個TOPIC既機會，我問佢係咪o係學校比人岐視，佢點一點頭，我問佢係幾時開始既，佢話原來係二年班，有一次佢唔知點同個班長嘈，跟住佢推開個班長，然後個班長同人講話我個女打佢，當呢件事在同學之間傳開去之後，其他同學就開始唔睬佢，甚至乎出言侮辱，慢慢佢就開始在學校唔出聲，唔同人講野，成日自己同自己玩。

一個小朋友，o係學校每一日都過得唔開心，返到屋企又成日比人鬧，究竟係佢既壓力大定係我地呢d全職媽媽大呢?大人們返工返得唔開心，可以唔撈，小朋友讀一間小學、甚至中學，如無意外一讀就六年，佢完全無得選擇，但係轉校又係咪可以解決到問題呢?如果佢自身既問題無解決過，就算父母知到佢受委屈，幫佢轉校，但根本問題未解決，佢去到邊都一樣會受人岐視。

要放棄工作，做全職師奶確實不易，ADHD既小朋友比一般小朋友需要更多父母既愛心、支持、指導、耐性，小朋友唔一定需要物質去獎勵，父母既支持、體諒、耐性先係關鍵。我地要細心留意、觀察佢地，有時我地大人既言語細路仔未必會明白。

舉個例:我發現佢好容易比其他事情吸引住而忘記自已做緊乜，好似食飯掛住睇電視而唔記得爬飯，開頭我淨係同佢講，要專心做好每年事，但係每次同佢講完，成效不大。反覆思量下再問下佢，你明唔明白咩叫專心D?原來佢唔明，亦都唔知道點樣可以專心D，專心D有咩好處佢亦唔知道。

小朋友遇到問題，佢未必會同你講，因為未建立信任，父母要做既係挑通眼眉，睇穿佢既每一個行為、動作，佢講大話我地唔可以扮唔知，一定要比佢知道我知道你講大話，但又唔可以鬧佢，要了解佢點解講大話，佢唔講，你比三個以上既答案佢問佢係邊個答案，細路仔當你一講中佢心事佢就會認，然後再同佢分釋問題當中好與壞，如果只用責備態度去同佢分釋，佢只會覺得同你講都係比你鬧架啦！講唔講都係比人鬧，不如唔講，你亦失去左佢對你既信任。

由一年班開始，女兒中、英、數、常四科從未合格過，默書更堪稱雞包王！我無迫佢讀書，個人覺得讀書係好講興趣同天份既，由我開始接手湊佢時，我發覺佢成日交白卷，我開頭仲有打佢時就兇佢，再交白卷你就知味道，慢慢見到佢就算唔合格，都將所有問題空格填上，再讚下佢，比小小獎勵佢。今日我收到考試成續表，兩科七十分以上，一科九十分，雖然英文還未合格，但我已心足，教壞一個人三日，教好一個人三年，我用左年半時間已經有咁既成續，已感到無憾。

之前講過，我地家係三代遺傳ADHD，我爸爸細個時因為屋企窮，同埋麻麻教佢唔掂，送佢入赤柱航海學校寄讀，以前既赤航，係專比問題少年入去住既，一日打交打到飛起，爸爸年少時亦都係飛型青年；而我，亦因為單親家庭長大，父母離異後我同姐姐跟媽媽、媽媽既屋企人住，媽媽掛住搵食，學校無朋友，屋企無人理，我亦都曾為村童，問題少年，我實不想第三代ADHD女兒跟我們前兩代一樣，變成問題兒童。ADHD既小朋友，會比一般小朋友聰明，因為佢地古靈精怪，想法多多，如父母不加以指點，好易走上歪路，我地做父母既，只希望兒女踏上正途，ADHD兒童重點不在藥，在於父母能給予多少關懷、多少愛。

雖然呢篇野長篇小小，但都希望幫到仍在困惑苦惱既父母。

2008bb1314

好感動! 每代父母教育子女都不同, 感同身受! 好媽媽一同努力加油!  

suki363

睇完，喊咗，身同感受。仔仔細個嗰陣，我好有心機教佢，唔會打唔會鬧，佢做錯野發脾氣我都會同佢企埋一邊拖住佢雙手慢慢同佢解釋講道理，人地話佢曳，我會同嗰個人講佢唔係曳係活潑。唔知幾時開始我開始冇耐性，開始鬧，開始打，到依家我直頭唔想理佢，唔想啋佢，一開口就鬧，佢好似做咩都唔順眼，尤其依家多咗個妹，好似想放棄佢咁。睇完我都問咗自己一句，點解會攪成咁。

HopeLJ

多謝鼓勵，給了很多正能量。

gigilaw806

好感動，多謝分享。

這條路很漫長，大家都要加油呀！

ahjoechan

多謝分享，又學到野，这令我更清楚，不是我兒不勁，而且作為母親的我不懂。

zhfl729

作为父母，我们只能好好去照顾这类型的小朋友！大家共勉！！

hha

我個仔三歲，雖然未曾幫佢做評估，但上BK多都懷疑佢係ADHD/A仔。
佢好多時都控制唔到情緒去尖叫大喊、打人，有時連我自己都失埋EQ，去打佢咀，或好粗鲁咁抱佢去罰企。
我知我咁樣罰佢唔係好方法，但我好失敗有時都發洩喺佢身上。
多謝你的文章，令我再一次檢討自己，你真係一個好好好媽媽，你女女好幸福！

咩咩聲(仔仔)

好感動

anixon

多謝分享, 真令人震奮!
的確....小小的人仔,
無論佢幾難撹, 佢都只係一個人仔,
佢需要的, 與其他孩子也是一樣~

囝囝mama

回復 肥師奶傲雪 的帖子

好感動!!真是好媽媽,加油!!!!

ricohui

好感動……完全講中我而家受到既困擾，我會繼續努力去做。

MATINLONG

好感動！睇到眼濕濕！

Ms.Mak

thanks!!!!

pollybell

好有同感:excited　

Chickee

回復 肥師奶傲雪 的帖子

你真係一位好媽媽, 全心全意去幫助你的小朋友, 佢一定感受到你的愛。
加油！

ta.ta

傲雪，
多謝您分享經歷，令大家有機會反思教導子女在于關愛，你字裡行間對女兒的愛，令我好感動，相信你的女兒必不行歪路，成才的路旨日可待。

ababymami

一個好媽媽！很有心去分享你的經驗，且不斷反思，又代入兒女的角度去幫助解決她的問題，值得學習！