怎麼辦..?

HahaB

4歲女兒近日出現了不尋的情緒問題, 於是我打去小童群益會, 諗住同姑娘傾下, 看看是否有兒童焦慮症....
點知, 姑娘聽完一大輪, 又問完一大堆問題後, 就話阿女應該係屬於資優.....
正正因為她的思想比實際年齡大, 才會諗得太多...出現了不必要的憂慮...
我真係從無想過....阿女會有機會是資優....我承認她是聰明..個腦都算轉得快
但不至於係有D咩獨特的過人之處.........
是我對"資優"真的太不認識嗎......?
但現在女兒....有情緒問題了...

她一向也是很多心事....很愛思考及發問...(但其實很多正常孩子也是這樣...不是嗎?)
但近日, 她經常為了自己的"思考"而煩惱, 甚至哭泣...
係完全無法釋懷果種.....(其實..資優...會這樣嗎?)
她會無端端想, 人老了怎樣, 死了去那, 上天堂後, 又會怎樣...
然後開始諗...上左天堂後, 她的公仔...床仔...甚至係成間屋...
會點算...可否帶埋上去天堂.......
然後愈諗自己就愈擔心....跟住就喊....

至於在學校, 老師說她很聰明, 是一個完全不用擔心的小朋友...
好乖好守紀律........甚至會要求別的同學守紀律..
是一個好幫手...個個老師都讚她...........
學習亦從無問題..........
不過.......阿女同我講, 她很喜歡老師, 很喜歡同學, 很喜歡學校....
但偏偏就係不喜歡返學..........因為返學好悶.......
她說老師常常重複....令她很悶...然後會開始覺得好眼瞓...
然後會開始諗起媽媽...諗起細佬....之後會好想放學..........跟住...就會忍唔住喊.........
還有.....她說有時因為自己諗緊媽媽...
然後完全聽唔到老師講咩.....(我估係遊緊魂吧...)
之後老師要佢地做課堂練習, 佢唔知要做咩.........
但好奇怪.......老師話佢係做到的, 雖然唔係第一個交功課, 但總是頭幾個完成的.....
偏偏阿女話........佢其實係唔識做....佢仲堅持...自己係聽唔明老師講乜...
.咁..究竟當中發生左咩事...
阿女有時講到自己好叻咁, 老師教一兩次佢就識, 所以開始覺得悶...
但係, 佢有時又形容自己「其實都係乜都唔識」...
因為老師話要做咩, 佢完全唔知...又唔知老師講咩......
(我都唔知......咁即係點...識定唔識, 明定唔明...但老師明明話睇唔出佢有咩問題...)
阿女而家好唔想返學.......點算...?
在學校明明好開心, 老師話佢上堂又好有反應...
而阿女自己都話, 佢有時諗諗下野, 都會回答老師問題既.......
我實在...好懊惱, 佢日日話唔想返學...
成日叫我諗辦法...同老師講...令上堂有趣D...........
我可以怎樣............好迷茫........

還有, 她常常給自己一些"目標"........
例如要自己在聖誕前完成唔咬手指的任務...(佢成日咬手指的..).
但當佢做不到..唔小心咬了一下,
佢就無端同我講對唔住.......
但我從來無鬧佢, 無迫佢做任何戒手指行動..
只係同佢講過, 咬手指容易有細菌, 同埋手指仔會唔靚...(無誇大去嚇佢, 無鬧佢的...)
佢就自己SET個咁既目標俾自己..
最慘係...當發現自己做不到...就喊哂同我道歉...
我同佢講..唔緊要的, 慢慢來...唔駛急..
但佢就係想堅持..............

現在的她, 很易哭, 每朝返學, 就想喊...
但佢每次眼紅紅, 鼻紅紅時,
就好努力咁忍住...忍住唔喊..
佢仲要不停咁提自己:「我知道唔應該喊架, 我會忍住架...」...
睇見佢咁...好心痛...
為什麼她不可以是一個無憂無慮的小孩...
為什麼4歲人仔...要咁辛苦自己, 想喊唔敢喊,
遇到小小趣事, 還會裝得比任何人都高興...係好明顯裝出來.....誇張左的......

唉........我唔知佢係咪資優 , 我只係知道, 我好憂心...
我無可能等到佢6歲同佢做評估..
我需要解決佢現在的情緒問題...個姑娘都建議我同佢睇精神科....
而我亦已約左醫生了........
其實...我都唔知可以同誰講...
有時想問下其他媽媽輩朋友, 有無呢D情況..
但又唔敢...我唔想人地覺得, 我個女可能係資優, 而覺得我地"賴叻"咁...
仲要...我根本就唔肯定佢係咪資優................
我只係想...........在這裏, 可以有個地方給我呻呻吧....
同埋, 有無人可以教教我...我可以點做....

hobby

我嗰女見完尤德的兒科醫生，因焦慮問題，有轉介信去排兒童精神科

HahaB

回覆 lillymarie 的帖子

謝謝你呀!

lillymarie

另外，莫以為聰明的孩子就一定會自信心爆棚。我遇過一些孩子，包括我囝，好聰明，好敏感容易心靈受傷。身邊的家人和老師都好小心照顧她的感受，不敢給她壓力。怎知道孩子却好胆小沒自信。其中一位遇上一位老師，他要求高，說話大大聲。老師對媽媽說孩子沒信心，要多鼓勵她，給她機會走出來做事，讓她明白她有能力做到。果然孩子在學校越來越有自信心。

有些孩子有聰明才智，却不自知，沒機會去用亦不懂得怎麼用。久而久之見自己甚麼也做得不好，反而覺得自己好差好笨。

lillymarie

我會建議揀程度高對學生期望高的學校，但功課不要太多，免得囡囡為了做功課用去太多時間，尤其是她對自己要求高，可能會想把功課做到好好。囡囡喜歡操練，可以自己買練習自己做，彈性大些。

焦慮症最好和資優分開處理，她在甚麼環境也一樣要處理焦慮。

但是一間期望低的學校對資優兒是一種磨難。每天上學等放學，沒挑戰，這種悶也是一種壓力。

有位輔導員咁講，太容易和太難的學業都會令孩子感到壓力。因為兩種情況下，孩子都不知道接下來會發生甚麼事，看不見前路而忐忑不安。

hobby

回覆 HahaB 的帖子

CAC 就是你所講的尤德夫人兒童智力中心了

HahaB

回覆 MASAYA 的帖子

謝謝啊, 阿囡的確鐘意睇書, 尤其中文書,
我亦已經盡量將所有野變得正面, 又或變得輕鬆,
心理學家話現階段家長的角色最重要,希望我也能好好堅持下去

HahaB

hobby 發表於 13-12-4 14:34
回覆 HahaB 的帖子

睇到你囡囡的問題, 都算有改善, 真是太好了

CAC其實是什麼? 全名係咩?
我係在阿囡4歲時, 要回健康院做檢查,
我都唔記得檢查D咩, 總之當時我同姑娘講阿女情況,
仲有講埋咬字問題(佢有一個音發唔準),
於是就搞左一大輪, 安排在健康院做言語治療,
見左兩次便搞掂左...
同一時間, 健康院亦幫我排左期去尤德夫人兒童智力中心(大概係咁上下既名...)跟進囡囡情緒的問題,
過左一輪, 尤德果邊約見左我, 當時我已頂唔住自己同囡去左睇私家精神科及做遊戲治療,
我都有坦白同尤德姑娘講...
之後佢地俾左份野我, 叫我搵學校填番寄回去,
仲話會幫我排期約見心理醫生....不過講明要等好耐..
搞左差不多9個月,終於排到阿女,
個心理學家見完阿囡就話想同佢做個智力評估,
不過其實評估完之後, 只係俾我知佢情況,
然後再轉介去聽一D講座,
同埋俾D建議我, 同時亦排下政府兒童精神科,
不過由於阿囡情況明顯改善, 所以心理學家都話姑且排下期, 若到時有人CALL我,
我可以再決定係咪有需要帶佢睇精神科跟進...

hobby

回覆 HahaB 的帖子

睇到你囡囡的問題, 都算有改善, 真是太好了

想請問, 政府那邊, 是CAC轉醫生做測試嗎? 之前要先見CAC兒科醫生嗎? 我囡月中見醫生了, 但知要有什麼準備

我個囡, 有時都令我好擔心, 怕佢大啲好易做傻事
早個幾月去掃墓, 我知佢一定有N個問題會問我, 但估唔到佢會講, 如果佢死咗, 叫我生多個, 啲嘢俾晒個細, 我現在諗返都好驚佢會亂來; 之前佢最多話唔捨得我, 叫我唔好死.... 現在仲得人驚 ...

MASAYA

我只睇左第一篇同最後一篇既字
我諗你囡囡應該鍾意睇書，揀d開心d充滿希望既書畀佢睇，笑話或喜劇之類既書都好
千祈唔好畀人間失格呢類灰到爆既書佢睇...
至於學校，揀間有愛心既傳統學校，我參觀過有資優教育既學校，校長老師keep push d學生，反而壓力好大

HahaB

多謝各位一直以來的意見, 現在UPDATE少少情況俾大家知~

由於阿囡之前的情緒問題, 我地一方面接受私人遊戲治療, 另一方面亦有排政府...終於, 早幾日政府主動安排左個智力測試俾佢, 都係叫"韋氏"...不過果個心理學家話政府呢個係20幾年前的標準來的, 比現時出面私人做果D (應該係指中大6歲以上做果D)係淺少少...不過阿囡評估結果都係「資優」, 但個報告好簡單, 整體來說, 結果顯示 5歲既阿女, 在記憶力, 理解力, 表達能力, 專注力, 抄寫能力等等都係特別好,  姑娘話佢係一個典型讀書叻, 學習快, 兼坐定定既女孩,同佢對話, 簡直覺得係同一個起碼小二程度的小朋友對話, 仲話評估顯示, 佢應該比較喜歡操練式的學習, 唯一問題係個人要求高, 鐘意俾自己壓力...容易出現焦慮....仲有強迫症...重覆咁迫自己去做到某D野.....

事實上....我同阿女去考小學, 雖然只報了4間, 大部份是活動教學(我唔想佢咁大壓力), 只有一間是超傳統的神級學校(純因宗教去報下咋).... 但活動教學果D...佢IN完就話唔鐘意...統統衰哂...反而超傳統果間...佢好LIKE, 仲話好玩(但其實我覺得悶爆),...由於阿女本身係真的零操練, 無CERT無乜額外學習, 所以最後呢間傳統學校竟有2ND, 其實我哋都好驚訝, 當然最終也是衰了...最後是自行派位入左一間區內十分傳統的小學

不過問題又來了......姑娘話佢性格係廣泛性焦慮, 對自己好有要求, 會俾自己壓力......但偏偏佢專長的, 就係學術型方面的資優, 咁即係適合讀傳統學校, 但傳統學校本身就係一個壓力爆煲的地方..............唉...咁即係點呢.....姑娘又話, 若放佢去一個活動教學地方, 佢一定頂唔順, 反而唔開心.....(呢一點單從佢IN小學, 我已經發現...)

我而家好煩惱...咁即係點呢, 要放佢去適合佢的傳統學校(學術唔可以太淺), 要放佢去學術型催谷型的小學....但又要幫佢避免壓力...(呢d學校又點會無壓力)....而佢的壓力來源, 主要是來自佢自己本身...我都唔知點算好, 搞到我都好擔心, 希望佢第日唔好係果D受不住壓力, 自尋短見的人....超矛盾的一個Situation....我完全唔知點做好! 姑娘只係話, 家長要keep住去幫佢舒緩焦慮情緒, 幫佢減壓...希望我做得到....!

LeeCC

我個仔下個月足5歲,最近的情緒忽然改善了

冇咁固執,好少同以前咁堅持上學路線，去街中途加減行程都接受到,無發癲

肯玩沙玩水,氹氹轉,千秋都肯試下

上遊戲治療，姑娘話佢個腦好多嘢諗緊,好唔得閑,沅玩具時個腦諗緊下—件玩具點玩,放鬆唔到,好tense

可能是焦慮原因，好多嘢諗唔掂,令他不安

Radiomama

選校方面，如果傳統=惡老師、重抄寫背誦、不容天馬行空，那根本不應鼓勵。
不過若傳統教學=跟本地課程、老師有愛心、會啟發學生，那就無問題啦。後者學校不是沒有，不過不等於名校，有些地區津校其實有好好的老師校長。每年頒發的優秀老師可見一斑。

gracedolly

HahaB 發表於 13-7-26 16:53
謝謝你呀! 由於我囡現在的情況好轉了很多, 或者正如你所講,
一方面自我調適, 一方面也因為遊戲治療時, 治 ...

我也認為是否資優不重要，只要正常快樂成長就好了。除非影響到學校，否則我應不會去評估。學校方面，個人認為活動教學或行ib的學校會較合適～＾＾
為妳高興哩，一切向好中～

HahaB

gracedolly 發表於 13-7-7 17:31
分享類似情況, 希望令樓主放心一點...

我囡三歲半, 去年九月升K1, 她一向在家表現極佳, 自小極少哭泣. 升 ...

謝謝你呀! 由於我囡現在的情況好轉了很多, 或者正如你所講,
一方面自我調適, 一方面也因為遊戲治療時, 治療師教曉了她一些方法.
同時, 治療師也讓我們明白了女兒的"特性",
讓身為父母的我們, 也學會相應的處理方法 (我覺得呢樣都好重要~ ),

囡囡還有兩個月便5歲了, 現在情緒平穩了很多,
雖然我們唔知佢係咪真的是資優兒...(因為還未打算做評估..或者等足左6歲才做吧),
但我們發現, 每一位教過佢的老師, 或者興趣班的導師,
都會話阿囡學得好快, 專注力很強, 記性很好,
有些興趣班導師還主動幫佢「跳級」.....

其實我知道我們已十分幸運,
因為阿囡情緒已受控制, 而且當她控制到自己的消極思想時...
她真的各方面也平均地表現得唔錯....
我知道相對好多小朋友來說, 佢的情緒問題已經算小兒科吧...
我同老公都覺得, 唔理佢係咪資優, 總之佢唔好再一次情緒崩潰,
繼續這樣順其自然發展, 便已很不錯~

我現正為阿囡煩惱小一問題...她的幼稚園是非常傳統的一間學校...
我都正在諗緊, 係咪應該俾佢讀一D活動既小學~
(國際學校我讀唔起了...)
很怕會幫她揀錯了學校.....
ANYWAY, thanks so much!

stylishma

我剛看到你女兒的情況。我唔知佢係咪資優，但我以前學過九型人格，我估計你女兒可能係4號仔，多愁善感型。這類人的性格，是外冷內熱，情感特別豐富。但想法比較悲觀，很多時候也不開心。很多作家、藝術家都是4號仔。王菲、梁朝偉等也是4號仔。你可以從這方面了解一下你女兒。

LeeCC

去咗小童群益會見姑娘，初步話有亞氏features
又話就算係,應該係mild case

但最重要係先處理焦慮問題,安排遊戲治療

hobby

回復 gracedolly 的帖子

我還沒有見過兒童心理學家, (因想省錢), 但家庭兒科醫生, 也叫我們check吓, 之後見過健康院醫生及讀等殊兒童教育的朋友, 也說認知,語言, 理解等等超2年, 但未算是資優, 因一班學生, 1/3有如此能力

知道學校未必完全滿足到她的需要, (因照顧問題, 除非明年又再出現嚴重問題, 相信不會轉校的了), 現在一星期中有三日放學後直落興趣班, 星期六話劇, 8月會開加入第一個學術興趣班, 我們都感覺到, 她比之前開心了, 情緒問題也沒有了, 雖然社交還是不能跟同學一起玩耍

gracedolly

分享類似情況, 希望令樓主放心一點...

我囡三歲半, 去年九月升K1, 她一向在家表現極佳, 自小極少哭泣. 升全日班後竟差不多在學校天天哭, 情緒不穩, 偶有引發會大吵大鬧, 但放學回家後又表現正常.我當時也曾擔心她有焦慮症.

直至十月, 老師叫我面見, 主任說她有時很奇怪, 說話用詞像大人, 於是我自行提議約見兒童心理學家, 最後Dr.見過她兩次後, 診斷她認知和語言比同齡高兩年以上. 情緒不穩原因大致和樓主情況相似, 她無法和同學溝通, 我把報告交回學校, 老師明白了她的情況, 她的社交也改善, 同學固然也漸長, 她也適應了, 現時情緒回復正常, 問題解決了.

想勸勉樓主的是, 說不定令嬡也像我囡會自行調適, 我見過心理學家也是得個知字, 後來是囡囡自行調適加老師幫忙, 樓主不要太擔心.
學習上, 由於我囡學校是分組學習的(國際學校), 老師比較會依孩子能力教學, 而且可以活動及自行學習, 確是比較適合這類兒童的, 坐定定的傳統教學會令資優兒遊魂? 對, 我是小學老師, 教過一些資優兒, 其中一個的例子是:在傳統教學課室, 這位學生簡直神遊天外, 永遠只取乙等, 應是由於缺乏學習興趣, 因為他有興趣的課外書都是很深奧的, 他現於國外從事科研. 所以個人覺得某類的資優兒(資優也有不同範疇)考慮國際學校或活動教學(較便宜)應較好.

不要為孩子資優而煩惱, 可能因我教過的孩子眾多, 每個小孩的能力也是不同的有高低的, 做媽媽的盡已所能, 讓孩子健康快樂就好了~見招拆招吧...
樓主不要太擔心和煩惱~

其實我囡出生不久, 職業原因及遺傳的可能性使我很早察覺她能力上的差異, 所以很早便排國際學校...

LeeCC

我4月中另外自己去小童群益會排,7月中見姑娘做評估