心煩中, 想問下你地會點選(對不起, 內容有點長)

circlenfrog

內容比較長, 請大家幫幫手比d意見, 你會選方方定係救世軍

而家我個仔讀緊方方的n班上午, 佢只是一般喜歡間學校&老師(不過同阿仔性格有關, 面皮薄, 唔鍾意比人話, 比人話過或者跟同學有爭執後, 成日會記住係心), 到而家返左一年, 都間唔時話唔想返學, 我曾經同老師傾過, 但佢地話佢平時上堂正常, 都有特別關心阿仔(e.g.見面會抱一下)約1星期, 明顯阿仔鍾意左番學, 不過當老師之後如常, 阿仔又再唔多like間學校

最近救世軍吳國偉收左阿仔讀K1下午, 我掙扎緊轉唔轉 (2間都比哂k1的學費/書簿費啦)

學習考慮: 方方n1的課程深, 阿仔吸收到, 識講英文簡單對答, 認字, 方方做得好; 吳國偉課程應該比較淺, 我怕學術上阿仔會倒退, 不過我有想過自己平時買d英文書教佢做補救(當然未必有方方直接教咁好)

情緒考慮: 方方比我的感覺係睇錢看, 愛心一般, 因為課程行先, 事實上仔仔性格好慢熱, 而家去公園都唔會主動同其他小朋友玩, 即使鼓勵佢去玩, 佢都只係企係小朋友圈外觀看, 好似唔合群咁, 我想救世軍可能多d時間訓練人際關係, 亦會比較喜歡返學

地點時間考慮: (1) 方方係屋企附近, 方便又係上午班, 不過校園細 vs 吳國偉要乘校車同返下午, 怕仔仔唔適應, 自己亦唔可以再帶佢返學, 不過校園大, 我好鍾意(2) 我地plan左約1-2年後搬去另一區, 如果轉去救世軍, 變左差唔多每年轉一次校, 擔心影響阿仔適應學校生活

經濟考慮: 方方要3-4千一個月, 仲有好多雜費 vs 救世軍只係6-7百, 多左的錢可以flexible 處理去上其他興趣班.
仲有另一考慮係, 我怕我同老公份工唔穩陣(過去1-2年都有風吹過話無得做), 萬一其中一個無工作, 另一個份糧只係剛夠全家支出(己預方方學費), 無得做savings, 但如果係救世軍就有每月有2-3千做後備

老公想仔仔好, 覺得辛苦3年, 方方學術教得好比較易上好的小學(我地未有心儀的), 亦近家, 唔駛用校車, 所以傾向方方,不過我反而多d考慮仔仔情緒&經濟考慮, 如果係你地, 又會點選? 謝謝~!

hobby

回復 circlenfrog 的帖子

circlenfrog,

你好, 其實我係方方用家, 我又唔覺得佢哋老師冇愛心或學校向錢看, 亦唔覺以學習為主, 可能因為pn不用做功課, 囡囡每日返屋企都會唱歌, 跳舞, 開心到不得了, 上次去open day, 啲 ee 同護士都叫到囡囡個名, 佢仲叫某個老師做x老師mami, 但就會話另一個老師會罵人(但次次問返都係囡囡唔聽話, 好似唔坐好), 我相信2個老師做唔同roles卦, 不過, 學費等等一定比救世軍貴就係事實,

我想樓主一定要想清楚, 因為一讀就3年, 3年學費都係一個幾大數目; 同轉校都唔知老師是否一定有愛心, 或者可以留意是師生比例, 因為方方依家pn係1:8(囡囡嗰班), 照顧上己經算唔錯, 但如果去到1:1x, 咁老師就冇咁多時間個別照顧小朋友; 或者轉唔轉校, 都要同老師了解多少少; 樓主有冇問過小朋友意願呢? 佢想唔想轉校?

孺子牛

小朋友喜不喜歡救世軍?  有沒有可能試讀幾天, 請假好咩都好, 試吓小朋友點.  

好多時屋企搬可以用校車, 除非好遠, 否則唔需要轉校.

至於學衠, 我個人覺得小朋友最好的老師是家長, 家中教得好或再加上出面駛啲錢, 會好有用.

如果小朋友喜歡救世軍, 咁小朋友開心, 大人有錢, 只是坐吓校車或用多交通費, 何能而不為?.

但救世軍,一定要加强家教或外出學多些東西.  

小朋友仲細, 可能慢熱些, 多些群體生活會好些.

JC_mami

仔仔仲細，性格的陪養比學術緊要！

torunpoland

錢，要計

接送，要計

但計來計去，我想問一個問題，你一定要排次序，不能貪心：

（ａ）你想孩子情緒發展平衡，但學業一般（先說明，不是奇差，只係普通）？

或者

（ｂ）學術能力較高，但情緒不穩？

我知兩者可以並存，但你問心，二選一，你自然懂得選．哪一樣對小朋友才最重要？一生受益？

klm402

如果你係全職媽, 有能力選擇救世軍外可將同方方相差既學費比仔去惡補下學術. 最緊要睇小朋友性格之餘, 你地要留意埋佢小學條路點行. 唔知小學條路點行既話. 依家亂決定只會行更多枉路.

oooasis

如果有金錢上的考量，就一定是救世軍。
屋企無經濟壓力，才能生活安樂，定心教好小朋友。如果因為返幼稚園搞到屋企連儲蓄都無，無必要。