- 在線時間
- 312 小時
- 最後登錄
- 26-2-13
- 國民生產力
- 3710
- 附加生產力
- 46243
- 貢獻生產力
- 0
- 註冊時間
- 07-11-25
- 閱讀權限
- 10
- 帖子
- 27905
- 主題
- 12610
- 精華
- 0
- 積分
- 77858
- UID
- 168291
 
|
與一位局長及佢嘅同屆同學吃午飯，局長偶然講起，要到養和醫院排期檢查身體，時間都幾長。左丁山乘機發難，要求局長瞭解一下，市民強烈要求香港輸入醫生護士。局長話講其他話題好過！
人所共知，養和醫院日日全院滿座，一床位難求，院內到處都聽到普通話，無他者，養和在內地聲名最大，有錢內地人來港檢查身體、睇病，皆爭住入養和，但其實養和亦未必有足夠醫生與護士來應付龐大需求。
小市民到公立醫院求醫，排長龍已是司空見慣，做手術喎，等夠一年，已是常事，公立醫院缺乏醫護人手，現職人員做到失魂落魄，故此久唔久就有蝦碌事件出現；可幸香港專業精神猶在，入住過公立醫院嘅，無不讚好。呢日舊夥計W君知道左丁山最近聲音沙啞，買咗三包中藥送上來辦公室，多謝佢之餘，問佢身體健康。W君話去年因病入咗瑪麗醫院一個星期，住大房，床床滿座，有人長咳，有老人在床上瀨屎瀨尿，搞到佢自己精神不振，要求調房，護士話：「冇辦法，成間醫院搵一張空床都冇。」幸好醫護人員對W君幾好服務，稍為紓解佢嘅情緒；出院找數之時，嘩，幾張紅底就搞掂，W君話：「以後我都唔敢投訴香港醫療福利。」
親戚嘅姨甥、姨甥女在英國讀醫，因返港不能就業（除非考試及格），現於英國公立醫院服務。呢兩位「英國醫生」最近回港到聯合醫院探有病嘅阿公，事後向姨媽講：「聯合醫院明顯係醫護人手不足，但服務態度與效率好過英國公立醫院好多，真奇怪。」呢啲咪係香港精神囉。
原來局長同學嘅女婿亦係英國大學畢業嘅醫生，在彼邦行醫數年，下定決心回港，參加執照考試。局長同學話：「我女婿已是專科醫生，但考試範圍好廣泛，女婿考到咬牙切齒，卒之及格，現於公立醫院服務。」愈係專家，回港考試愈難，難怪好多港人子弟在英國讀醫之後，不願回來，例如李國章兩位公子（劍橋醫學院畢業生），所以最近有文憑試尖子話唔去劍橋讀醫，明智之舉也。港人子弟在英國讀醫行醫返嚟香港是否唔識醫香港病人？改政策讓佢地回來執業，點解唔得？梁特話民生無小事，唔該佢認真治理呢件事先。
左丁山
|
|
發表於 15-8-4 09:27
