學子爭過獨木橋　學位不足嘆奈何（太陽報太一叮） - 教育講場

登錄 | 註冊

討論區

教育王國: 教育講場; 使用意見

幼兒教育: 幼校討論; 幼教雜談

小學教育: 小一選校; 小學雜談

中學教育: 升中派位; 中學交流; 初中教育

專上教育: 備戰大學; 選科選校

國際教育: 國際學校; 海外留學

知識增值: 課外活動; 教材閱讀; 公開考試; 深造進修

特殊教育: 特殊教育; 資優教育; 自閉寶寶; 智能評估

徵求專區: 二手市場; 誠徵老師; 組班專區; 徵保母車

聯絡管理員

我的中心

教育王國 › 討論區 › 教育講場 › 學子爭過獨木橋　學位不足嘆奈何（太陽報太一叮） ...

查看: 891\|回覆: 3	go 學子爭過獨木橋　學位不足嘆奈何（太陽報太一叮） [複製鏈接]

elbar

翡翠宮

Rank: 13


	77523

1^#

發表於 14-7-11 16:23 |只看該作者 |倒序瀏覽 |打印

寒窗苦讀，望門興嘆，對於香港嘅莘莘學子嚟講，呢個係最殘酷亦係最無奈嘅現實。嗱，中學文憑試下周就放榜喇，同往年一樣，到時肯定又係有人歡喜有人愁。大學學位僧多粥少，千軍萬馬過獨木橋，就算成績符合資格，亦唔代表可以如願以償入讀大學o架。

有升學輔導機構提醒考生，要做好多手準備，根據自己成績擬訂唔同應對方案，以免到時入唔到大學踢晒腳，作出錯誤嘅決定；而家長亦唔好期望太高，以免對子女造成不必要嘅壓力。係人都知，香港升學難，接受高等教育變成奢侈品，唔少學生望天打卦，甚至遺憾終生，問題愈來愈嚴重。呢，由於競爭激烈，今年有兩成七受訪學生面對放榜有感壓力爆煲，簡直可憐又可悲。

點解香港升讀大學咁難？咪就係因為港府靠害囉。過去二十五年，本地適齡學生接受高等教育嘅比率一直停留喺一成八，而喺美國，四十年前已經達到五成，可以講係蚊髀同牛髀。學位嚴重不足，梗係爭崩頭喇，舊年文憑試，全港八萬考生中二萬八千人考獲入讀大學最低資格，但只有一萬二千位幸運兒入讀本港八大院校，其他學生只能夠喺大學嘅高牆外徘徊，家庭經濟條件好嘅學生就話可以去外國留學啫，冇條件嘅學生惟有接受現實，唔係入讀銜接課程，就係提早投身社會。

最離譜就係，大學資助學位長期不足，當局唔肯增撥資源不特止，仲反其道而行之，搞乜鬼「教育產業」，不斷增收外地學生，導致外地生比例短短幾年就由百分之五激增到百分之二十，結果唔止令學位短缺問題雪上加霜，本地學生擠入大學門檻嘅機會愈來愈渺茫，而且令社會嘅排內情緒進一步激化。即係咁，香港係國際都會，吸引外地生嚟港就讀無可厚非，問題係，喺整體學位冇增加嘅情況下，外地生比例提高，等於剝奪本地生升學機會，你話係咪本末倒置吖？港府又唔係冇錢，點解始終唔肯增加教育資源尤其係大學學位呢？

眾所周知，投資教育就係投資人才，亦係投資未來。本港人口僅有百分之十八擁有大學或以上學歷，喺全球發達地區中屬於比例最低之一，勞動人口質素無法提升，唔怪得競爭力每況愈下喇，尤其係同新加坡相比，更加係望塵莫及。近年青少年怨氣上升，紛紛走上街頭，而且愈來愈激進，除咗因為不滿港府施政，更加因為睇唔到未來。咪話太一叮唔提醒，青少年升學無門，就業選擇又少，條路愈行愈窄，怨氣遲早爆煲嘅咋！叮！