【短片】融合教育有狀元也有欺凌 - 特殊教育

登錄 | 註冊

討論區

教育王國: 教育講場; 使用意見

幼兒教育: 幼校討論; 幼教雜談

小學教育: 小一選校; 小學雜談

中學教育: 升中派位; 中學交流; 初中教育

專上教育: 備戰大學; 選科選校

國際教育: 國際學校; 海外留學

知識增值: 課外活動; 教材閱讀; 公開考試; 深造進修

特殊教育: 特殊教育; 資優教育; 自閉寶寶; 智能評估

徵求專區: 二手市場; 誠徵老師; 組班專區; 徵保母車

聯絡管理員

我的中心

教育王國 › 討論區 › 特殊教育 › 【短片】融合教育有狀元也有欺凌

查看: 3488\|回覆: 6	go 【短片】融合教育有狀元也有欺凌 [複製鏈接]

elbar

翡翠宮

Rank: 13


	77149

1^#

發表於 13-7-20 13:18 |只看該作者 |倒序瀏覽 |打印

http://hk.apple.nextmedia.com/news/art/20130720/18341494

梁耀忠

【隔牆對論】

憑自創唇讀點字方法，弱視考生曾芷君於文憑試摘星，震撼人心。在97年以前，像芷君的特殊教育需要（SEN）學生，只能入讀特殊學校；在融合教育政策之下，芷君得以入讀主流學校，躋身英中英華女學校，融合教育由97年開始推行，爭議不少，做了32年教師的街工立法會議員梁耀忠，曾對班上SEN學生束手無策，批評教育局支援不足，這些學生在特殊學校讀書較好；育有一名智障女兒的工黨立法會議員張超雄則認為要有教無類，融合教育不能開倒車。二人均認為融合教育政策已到了必須檢討的時候了。

記：記者
梁︰梁耀忠

政府由1997年開始推行融合教育，讓有特殊教育需要，包括輕度智障、自閉症、視障、聽障、肢體傷殘、專注力不足、過度活躍症及言語、讀寫障礙的學生，入讀主流學校，至今達16年。

記：如何看靠「唇讀」成為狀元的曾芷君？她被視為融合教育成功例子。

梁：我覺得曾芷君好幸運，但佢係好特殊嘅個案。融合教育本來係好事，但融合教育唔係只有身體傷殘，仲有智障、精神有問題嘅學生，佢哋喺主流學校讀書，成個問題係嚴重同複雜。

曾芷君嘅個案，唔一定代表香港融合教育嘅成功，因為曾芷君唔係情緒有問題，佢係身體有缺陷，透過本身嘅努力同意志去克服，但係有啲同學因為自閉症、過度活躍症，導致情緒出現問題，學校唔係咁容易處理。

記：你做過前線教師，在主流學校處理融合生，有多難搞？

梁：有一次我去代課，一入班房，有個過度活躍症嘅同學，推跌同學，我走埋去問有冇人損傷，跟住另一邊嘅同學就行出位，傾偈、掟嘢，我都唔知顧得邊個，原來成班好多同學都係有特殊學習需要，又自閉、又過度活躍，一個班房有廿幾三十人，一個老師點可以控制到呢？

有特殊學習需要嘅學生，自我規律係好弱嘅，只要一冇人睇住佢，佢就會走嚟走去，唔聽你嘅指揮。佢哋情緒嘅變化好大，你講一、兩句已經可能刺激到佢，佢會發晒竧𣉢，成個人癲晒，有老師只係同佢傾偈，個學生控制唔到自己，一拳打過去老師度，全冇先兆，要發生就發生。佢哋部份會受同學欺凌，幫佢起花名係最常見。

記：但大家會問，曾芷君也是融合生，為何英華女校成功，其他學校卻不能？是否老師推卸責任？

梁：如果學生只係坐輪椅、戴耳機、弱視，要我教好佢，唔係難事，最多我講慢啲，甚至乎我同全班講完之後，我就再埋去另外解畀佢聽。但如果學生係鬧情緒，影響到班房秩序同其他同學，我點幫呢？

培訓當然需要，但培訓唔係萬靈丹，唔係培訓咗就乜嘢都處理到，因為學生出現情緒問題，一定要處理，老師係上唔到堂、教唔到書。呢個唔係老師專唔專業嘅問題，而係人手問題。

好多老師對要照顧呢類情緒大起大落嘅學生，係痛苦、非常痛苦、無望、絕望。最慘係呢類融合生大多數都係去咗成績第三組別（Band3）嘅學校，原本班學生已經難教，學校仲要應付殺校壓力，你話老師慘唔慘呢？係感到完全冇前景。

教育局每一年會向中、小學提供12萬元資助以推行融合教育計劃，照顧該校首一至六名的融合生，每多一名會再多2萬元，上限為100萬。

記：是否資源不足導致學校照顧學生出現問題、請不到人？

梁：支援就係（每個月）一萬蚊，一萬蚊可以有乜嘢用呢？錢又唔夠，同時課程配套唔多。加上香港只係接受手寫評核，但有啲國家接受有特殊教育需要嘅學生，考試時用口答。

其實照顧呢類學生嘅教育心理學家、言語治療師、有相關經驗嘅老師極之唔夠，教育局請人都有困難，所以學校登報請人都好難請到，有時一個專家係負責照顧幾間學校。由於呢類學生近年越來越多，呢類專家直情出去掛牌做生意，政府培訓咗嘅人，學校都請唔到。

記：你是否認為，融合教育應剔除自閉症、過度活躍症的學生呢？

梁：如果大家唔想標籤學生，希望佢哋可以融入主流學校，政府一定要畀好多資源，做好配套、要小班、小組教學，總之唔好畀一大班學生聚埋一齊，多啲專業人士幫手，例如言語治療師、心理學家幫手輔導。

但如果家長同學生願意同明白，其實佢哋返去特殊學校教育係仲好，以往都有成功例子，佢哋會覺得自己讀書嘅環境受到尊重，教嘅程度、方法亦可以遷就佢哋，讀得都會開心啲。𠵱家有學校慢慢轉型，專門收讀寫障礙嘅學生，成間學校有三、四成都係讀寫障礙，入面嘅老師反而仲有心機去教。

0 0 0 0

解憂店

世界著名大學

返回頂部

elbar

翡翠宮

Rank: 13


	77149

2^#

發表於 13-7-20 13:20 |只看該作者

張超雄斥政府只重慳錢

http://hk.apple.nextmedia.com/news/art/20130720/18341498

張超雄

■集視障、弱聽、觸感障礙於一身的曾芷君，憑自創的「唇讀」在文憑試考取三科5**的佳績。

【隔牆對論】

記：記者
張：張超雄

記：曾芷君成為狀元，能否證明融合教育成功？

張：芷君係特殊教育加埋融合教育，佢初中以前在心光學校，接受專為視障學生而設嘅教育，一般學校冇呢方面訓練。芷君冇呢個基礎，係入唔到主流學校。英華對佢支援好，心光又繼續支援佢，加上佢自己努力，芷君係成功例子。

記：如果無融合教育，芷君在學環境會否不一樣？融合教育有何好處？

張：佢讀書、社交經驗相對會窄好多，學校環境係整個社會縮影，所以融合本身係好事。融合教育本身理念係好，有教無類，學校應接受唔同學生，唔應該排拒有特殊需要學生。

記：教育界批評融合教育為教師帶來沉重壓力，你是否認同？

張：班上有自閉、過度活躍或情緒問題學生唔易控制，老師一班對住30人或者更多，如果有一兩個呢類學生，佢已經搞唔掂。融合教育理念高尚，所有學校唔能夠歧視學生。於是平均每校會收到七種特殊學習需要學生，聽障、視障、肢體同學習障礙都有，學校根本唔識處理，老師甚至未聽過，點樣去幫都唔知道，變成好多誤會。基本上學生係融合入個大海度，自浮自沉，有乜嘢叫救命，佢掟個水泡畀你，但個水泡穿晒窿。如果自己唔夠力，家長唔夠惡，學生沉咗落去算數。

記：有些家長將智障小朋友也送入主流學校，是否不理性？

張：評估為輕度智障，智商得50至70，在主流學校一般好難跟到。可能畫嘢好叻、體育好叻，但喺學科會好困難。如果夾硬入主流學校，學唔到嘢，亦會容易被欺凌。家長一方面要聽教育心理學家建議，另一方面要睇細路仔實際情況。如果教育心理學家認為得，可以畀佢試吓。

記：教育局也知道前線教師遇到的困難，但仍堅持融合教育政策不變，你認為有何原因？

張：我覺得同成本有關。因為特殊學校學生單位成本，係主流學校兩三倍，推一個學生去主流學校，教育局就慳番十萬八萬，呢個思維令教育局想多啲融合。

教育局將個閘設喺特殊學校嗰邊，如果被評估為可以入特殊學校，家長想入但係好難。最近有個案，心理學家評估個學生智力有限，但未到輕度智障，學生喺主流學校讀咗一年好痛苦、家長好痛苦、老師好痛苦，校長認為佢應入特殊學校，家長同意、學生冇所謂，但教育局話唔得。如果一個被評為輕度智障學生，想入主流學校，教育局就話冇問題。你睇到教育局個考慮，就係錢！入主流學校平，入特殊學校貴。

記：現時特殊學習需要學生在中學分佈如何？情況有幾惡劣？

張：SEN學生十個有八個成績都麻麻，Band1點解要收你？就算入到門口都勸退你、畀難題你。Band2掙扎緊，想升做Band1，收得太多會令其他家長擔心唔入讀。Band3為咗生存乜嘢都收，真係有教無類，但有冇咁嘅能力？呢啲學生作為佢哋生存工具，都唔會擺到心機落去。

有啲學校真係有心，但一個教育心理學家要走10間學校，黐線，完全支援唔到。𠵱家融合教育大致上可以話係災難性，部份有特殊需要學生喺融合環境學唔到嘢，唔係俾人欺凌就係佢欺凌人。教育局隻眼開隻眼閉，話校本，自己搞掂。

記：應否取消融合教育政策？抑或只列明部份特殊教育需要學生才可接受融合教育？

張：整體融合概念無法取消，我哋唔應該歧視，應該畀學生有主流社會經驗，有教無類。

記：肢體殘障學生，可靠相關儀器協助幫助，較易適應主流學校。可否規定智障和情緒問題學生必須入讀特殊學校？

張：如果硬性規定，邊類型學生一定要入讀特殊學校，未必一定好。因為專業評估有時失手、錯漏，亦冇可能一次評估，就定你終生，評估要不斷做，學生會變化。家長選擇亦應獲得尊重。

記：有何建議既保留融合教育，又可改善混亂局面？

張：教育局應該畀資源學校，去發展成特色學校。如果學校有心收特殊學生，應畀佢發展取錄某一兩種SEN學生，例如只幫聽障，老師要識讀唇、手語，一般學生要學手語，等佢哋可用手語溝通。好似𠵱家咁散，好唔掂。

解憂店

世界著名大學

返回頂部

Charlotte_mom

王國長老

Rank: 14

醒目開學勳章王國長老


	59252

3^#

發表於 13-7-20 16:16 |只看該作者

回覆：【短片】融合教育有狀元也有欺凌

我只唸起前排幾多家長話band one學校又點會有SEN

返回頂部

pocoyo123

大宅

Rank: 5 Rank: 5


	4461

4^#

發表於 13-7-20 19:23 |只看該作者

亞仔表哥咪又係SEN (band 1)生, 其他家長唔知姐, 唔代表無, band 3又好多普通生一樣.

咁多sen學生, 如有情緒問題而讀主流係最慘, 大部份老師要顧全一大隊, 唯有欺新佢地利益, 聽過, 有叫學生搬枱椅坐課室門口, 就是不想他阻礙其他人上課, 試問咁樣小朋友仲點會想返學, 真係多得香港教育政策

返回頂部

Olympian

男爵府

Rank: 6 Rank: 6


	5302

5^#

發表於 13-7-21 14:32 |只看該作者

回覆：elbar 的帖子

其實我覺得每班或每校收sen的人數要設上限，覺得一班25人收2-3個sen教合理，多於3個老師已經好吃力

返回頂部

checkylam

大宅

Rank: 5 Rank: 5


	3866

6^#

發表於 13-7-23 10:01 |只看該作者

學校收SEN 學生一定要有相關配套, 老師, 教材, 教育心理學家等, 又一間學校最好收1-2類的SEN, 因為這要才可以集中資源配合到學生需要, 如果有聽障, 又視障, 又讀寫障礙等, 咁咪要好多唔同的教材, 老師又要學習唔同的技巧去教導SEN, 咁樣就要浪費資源, 又唔可以做到教育局想做到的教育方針