- 在線時間
- 2 小時
- 最後登錄
- 11-9-5
- 國民生產力
- 6
- 附加生產力
- 8
- 貢獻生產力
- 0
- 註冊時間
- 05-4-27
- 閱讀權限
- 10
- 帖子
- 39
- 主題
- 7
- 精華
- 0
- 積分
- 53
- UID
- 44626
|
近日, 發覺為何我在星期四/星期五由保母家接孩子回家時, 家姐總是對細佬有極大的厭惡感覺; 不是口中不斷投訴細佬好曳, 甚至細佬在途中跟我說話(也不是特別大聲), 唱歌, 她也會投訴細佬好嘈…. 有趣的是, 這些情況在星期一至三由公公揍他們, 或星期六及日在家是不會發生的… 我的意思是, 雖然他們仍偶有吵架或爭玩具, 但整體上他們是較為和氣和融洽的, 這個狀況就令我想起以往孩子交由保母家在周日全面照顧時, 我在地鐵接孩子回家時, 最難挨的時間就是由接他們至回家之後一段時間; 因為他們總是好像貼錯門神的, 特別是家姐對細佬; 總是裝出一張討厭的面容, 細佬因為家姐的反應, 也因而對家姐不甚友善! 但由周五到周日, 他們兩姐弟的關係又會慢慢的改善, 變得十分和諧呀….兩姐弟玩得十分投契, 家姐更對細佬禮讓有加, 有時甚至主動幫助細佬, 細佬亦會對家姐亦十分有禮及尊重。
我們對此一直甚為不解, 不明白為什麼會如此? 而且, 在這些日子, 家姐還常常會跟我說, 「如果我做細果個就好啦… 佢可以XXXX」…
接觸過少少正向管教及少少6A教肯的理念後，我們心中開始有一些想法; 會不會是大人的處理手法構成了一個關鍵的影響? 而且我們要先從孩子的感受, 孩子的情緒入手處理..
有一晚，家姐在回家途中又出現上述狀況，外子問家姐; 「你地係阿姨(他們是如此稱呼保母的)度有無爭野呀?」
家姐回應「有呀, 細佬爭左我個XXX…佢好曳呀…」
由於我心中已有一個想法, 故我亦想藉此機會證實一下是否屬實, 故我再問她
「咁點呀? 阿E有無叫你地唔好爭呀?」
家姐回應「阿E無話細佬, 佢淨係叫我玩過第二D野…」
我再問「咁你點呀? 有無好嬲細佬呀?」
家姐「細佬好曳呀….」
我說「咁你當時想唔想俾果樣野細佬玩架?」
家姐「我玩先架, 佢搶我架…我以後都唔俾D野佢玩啦..」
我說「呀…平時呢, 你地係屋企咪都有爭野既…」
想了一會, 回應「係呀..」
「咁媽媽有無叫你一定要讓俾細佬玩架?」
她搖搖頭…
「咁果時你會唔會嬲細佬架?」
她想了一想, 回應一句「少少啦…」
「有無宜家咁犀利呀?」
她又想了一想, 在搖頭…
「媽媽好多時見到你之後反而仲會主動讓俾細佬玩添
喎…」
她這次想得較耐, 最後回應「係呀…」
「係呀, 讓人係好既品德, 不過當媽媽無迫你一定要讓既時候, 你反而發揮左呢個美德出來, 好有家姐既風範!」
她笑了一笑….
點到即止。外子聽罷, 看看我, 大家心中也有了一個確認; 即我們的想法並沒有錯….我要先特別強調, 保母一向是我們心目中的超級保母, 她照顧得孩子的起居飲食非常好, 而且對孩子疼愛有加, 孩子亦十分喜歡這位超級保母的....不過也明白, 要求孩子大讓細及對細的包容大些是大部份人的做法…這並不是錯....
當晚睡前, 家姐跟我說「媽媽, 我覺得做細真係好呀..」
我問她何解, 她說「做細既咩都得, 做咩都唔會俾人話….」
我直覺知道她是在說今天發生的事，所以我再問她「你係唔係講緊你地爭野玩既事呀?」
她點點頭…
我問她「細佬搶你D野, 但係反而係你俾人話? 所以你好唔開心, 所以覺得做細既就好, 做錯既都無人話佢呀?」
她沒看我, 見到淚水從她的眼中流出….
「媽媽明白你一定好委屈啦….」
她用被子靜靜地擦眼淚….我的心也在輕輕的抽動…
「係呢, 晴晴呀, 今日你咪好嬲細佬既, 係唔係因為細佬搶
左你D野, 但係大人就要你讓俾細佬, 你唔讓就俾人話, 話完件野依然要俾左細佬, 所以之後你就覺得細佬好曳, 係地鐵度就算聽到細佬把聲都覺得好煩好唔仲意呀?」
她點點頭….
「媽媽呢, 其實覺得大唔一定要讓細既, 細既其實都要讓大既, 意思係不論大定細, 都要互相禮讓既。當然, 大讓細係一個美德, 如果你做得到, 媽媽當然會好欣賞, 但如果細既係用搶既方法, 而大既亦次次都讓佢, 咁樣對細果個唔係一件好事, 因為佢唔會學到用適當既方法去表達; 搶並唔係一個好既方法，所以之前你係屋企, 你做得好好呀…
她看看我…我繼續說
「呢..上次細佬搶你D野果時, 你同佢講, 你發脾氣同喊我係唔會俾你既, 但你有同佢講要唔喊, 同有禮貌問你, 你先俾佢, 咁當細佬真係唔再發脾氣, 有禮貌問你果時, 你又真係有俾佢… 咁樣細佬先學到野, 如果下下佢一搶, 就可以有人幫佢得到手, 咁樣對細佬唔係好事…」
不知她明不明白, 我繼續說…
「媽媽想問下你呀, 如果今日呢, 大人唔話你, 唔一定要你將D野讓俾細佬, 你估你會唔會咁嬲細佬呢?」
她想了一想, 在搖頭…
「媽媽覺得你做得好好架啦, 好多時我見到你都好主動去幫細佬, 好多時仲會讓細佬, 而細佬都好錫你呀…有時佢得一件野食, 佢都會分一啖俾你食….咁其實除左呢件事之外, 你錫唔錫細佬呀?」
家姐已抹乾了眼淚, 在點頭…
我再問「咁你覺得細佬錫唔錫你架?」
她再次點頭….
我抱抱她, 拍拍她輕輕笑著跟她說「夜啦… 訓啦… 無事架啦…」
她看著我, 笑了一笑便閉起眼睛睡覺去了…
翌日, 她一早起身已在找細佬一起去玩了~
這件事令我反思了兩個問題;
第一
一如我在此網誌中常提及的, 孩子的反應其實好多時會受大人對該事的看法及做法所影響; 就如處理孩子糾紛之事情上, 若沒有小心處理, 孩子的手足關係就會被影響… 所以我們在怪責孩子不和氣之時, 可以先停一停, 想一想, 究竟問題的徵結在哪呢?
第二
以往有時若孩子投訴另一方時, 我們做家長很多時會直接的嘗試以說話及道理嘗試去改變孩子的想法; 包括在孩子一說對方不好時就會替另一方辯護; 嘗試拿一些以往的經驗去遊說另一方對投訴者是那麼的好, 意圖是希望勾起孩子的回憶, 要不, 就是說孩子不應有那些想法(不應該說不喜歡對方云云), 但往往就是愈說孩子愈鑽得深, 最後甚至「嬲埋」我們, 他們並沒有因我們的遊說, 解說或勸諭改變想法… 反而, 若我們嘗著去了解孩子說那些話背後的原因, 真誠的表達了我們明白他們的感受後, 情緒得以息懷了, 結就會自自然然的解開…. |
|
發表於 11-4-29 13:54
