本帖最後由 Angio_radio 於 22-10-24 01:16 編輯
趁有時間,見之前呢個論壇有啲人對呢一課有興趣/問題,所以想好貼地咁講下放射學呢一科。 首先相信如果對呢科有興趣的朋友或者家長,對呢一科都會有少少基本嘅認識同埋資料蒐集,所以我都唔詳細講 基本咁講,放射學分放射診斷同治療兩樣,學生需要選擇其中一個範疇去讀,而我自己作為公立醫院放射診斷師,我會比較多篇幅去講呢一方面嘅野。 首先講大家最擔心一樣野 - 安全問題 好多人都好擔心放射業從業員自己本身健康安全會唔會受影響,我可以好簡單咁總結:如果你跟足所有指引 基本上完全安全!首先我地做野時候,例如照電腦掃描,普通 X-ray,基本上都會喺控制室入面,基本上係完全唔會(準確啲嚟講係無限接近 0)受到任何輻射,所以可以無限個放心。但除左呢類檢查外,其實仲有部分檢查係需要同個病人一齊,例如血管造影, 手術室 X-Ray 等等,但係我哋都有足夠嘅保護,例如保護衣等等,所以都唔需要特別擔心。同場都會有醫生,護士,其他 PCA 姐姐在場,所以都好想同大家講一樣嘢,其實醫院入面除左我地放射師,其實都有好多職員每日面對輻射,例如骨科醫生,石膏師傅,手術室護士,麻醉科醫生等等。其實只要輻射控制得好,同埋有足夠嘅保護,其實絕對唔需要擔心呢個問題,簡單嚟講我哋接受嘅輻射,係遠遠低過法例限制 limit。 之後講另一樣現實小小嘅問題,飽和問題。之前聽到呢度有部分人話呢一科會飽和,30 年後我唔知,但我可以肯定,短時間內,人手需求其實係非常之殷切,而家大部分公立醫院都嚴重缺人,係講緊差 ~ 30% 人手,而退休潮亦都黎緊,服務需求亦都日日增加 (唔難理解,人口老化,加上大家都越黎越注重健康),所以人手需求只會有增無減,飽和問題基本上不需要擔心。 放射師薪酬架構相信大家都好容易搵到,架構好簡單 2 -> 1 -> Senior。不過有樣嘢非常值得注意,放射師個架構好特別,係呈現倒三角。好多其他嘅專職醫療,2 比率高過 1,但放射學岩岩相反,1 人數比率係多過 2,可能呢樣係同工作範疇有關,所以呢樣嘢我覺得係非常吸引,我眼見好多同事,一到五年就即刻升 1 。而因為人手問題,醫管局啱啱更新指引,PT OT RD 2 做夠三年,有足夠學歷 / 經驗,就可以升 1。 當然,我哋呢科都有缺點,就係要返 Shift,基本上大部份公立醫院嘅放射師,都要返 Shift,包括 Night Shift。同埋另一樣嘢就係我地始終都要配合放射科醫生,所以好難好似其他專職醫療咁自己出嚟創業。
好簡單,做個總結,我覺得呢科都算吸引,相比起其他嘅專職醫療,我相信呢一科真係唔算難讀,同埋人工真係吸引,眼見好多同事係個 1 位等緊佢,即係佢第五年就即刻有得升,呢樣我相信係好多其他專職醫療都做唔到。而家仲要三年有得升,更加吸引。 其實好多野想分享,但係就係因為太多,所以好難有系統咁講出嚟,所以大家有咩問題都可以問,我再答。 |