搵工學科（左丁山） - 教育講場

登錄 | 註冊

討論區

教育王國: 教育講場; 使用意見

幼兒教育: 幼校討論; 幼教雜談

小學教育: 小一選校; 小學雜談

中學教育: 升中派位; 中學交流; 初中教育

專上教育: 備戰大學; 選科選校

國際教育: 國際學校; 海外留學

知識增值: 課外活動; 教材閱讀; 公開考試; 深造進修

特殊教育: 特殊教育; 資優教育; 自閉寶寶; 智能評估

徵求專區: 二手市場; 誠徵老師; 組班專區; 徵保母車

聯絡管理員

我的中心

教育王國 › 討論區 › 教育講場 › 搵工學科（左丁山）

查看: 567\|回覆: 2	go 搵工學科（左丁山） [複製鏈接]

elbar

翡翠宮

Rank: 13


	77504

1^#

發表於 17-7-29 12:32 |只看該作者 |倒序瀏覽 |打印

七月二十一日本欄講大學選科，有老友睇完，批評左丁山市儈，認為讀大學應該追求理想夢想，不應該一開始就諗住畢業便搵銀，令大學教育變成職業教育，佢話：「譬如你哋新亞書院，成日講新亞精神，新亞精神唔係搵銀精神啫！」

老友係啱嘅：新亞書院創辦之時，由文史哲大師主導，新亞精神係源於中國文史哲，講求儒墨道。偏偏少講（根本唔講㖭）商鞅法家，學陶傑話齋，咪唔夠現實囉，所以新亞校歌有得你唱：「手空空，無一物」，學校唔識搵銀，捱窮數十年也。

現今拜金主義盛行，讀大學唔講搵銀科目，又會俾人批評堅離地嘅啫，左丁山講馬雲讀英文系，咪又俾另外一位朋友批評：「你唱高調啫，搵個萬中無一嘅人物嚟做例子，容易誤導細路！」

哎吔，讀一啲畢業後唔易搵到工嘅學科，對基層子弟來講，確係堅離地，7月19日華爾街日報有專文報道南韓大學生畢業後搵工艱難，大財閥（如三星、現代）公司請人，一百個選三個，中小企請人，一百個請十七個，競爭之激烈，香港學生見到怕會嚇死。南韓於1980年代經濟高速增長，每年GDP增長平均有8.6%，大學生容易有工做，但現時經濟體積大兼漸趨成熟，2016年GDP增長只有2.8%，於是百幾個大學生爭幾個飯碗，今年就有一萬七千個大學生延遲一年先至畢業，以免雙失。

今年六月，南韓失業率係3.8%，有一百萬人失業，其中一半係介乎15至29歲之間，年青人失業率在六月份升至10.6%，比全國失業率高出近2.8倍，可知畢業生就業艱難，好難怪大學選科時要「市儈」一啲，特別係對基層學生而言。

文史哲科學地理學新聞學呢啲科目，又真係搵工冇讀會計財務咁易嘅，通常文學院畢業生（做香港教師除外）嘅平均薪金都係低啲嘅嘞，最近統計數字講自資院校之中，東華學院畢業生薪水平均兩萬，比其他自資院校高好多，點解呀？東華學院有護理課程吖嘛，畢業就有醫院請，自不然爽神啦。

講到自資院校，一位保險界前輩特別話俾左丁山聽，恒生管理學院下學年開設新學士課程：主修保險學，不是培養保險經紀，而係保險後勤人才如理賠師、核保師等等，學額約有三四十名。

呢位前輩話：「我敢寫包單，讀完恒管保險學學士課程，未畢業就有保險公司請。」

左丁山

0 0 0 0

解憂店

世界著名大學

返回頂部

elbar

翡翠宮

Rank: 13


	77504

2^#

發表於 17-7-29 12:39 |只看該作者

讀書向錢看

建築邦覺得屋企雜物太多，冇地方擺放，丟棄又唔捨得，於是心思思去搵迷你倉，一搵之下先知問題複雜，幾驚防火出問題。同佢四姐夫講起，方知英雄所見略同，傾傾吓，覺得不如合資去工業區買一個幾百呎至一千呎單位，用作儲物室兼小型辦公室，以備他日退休之用。

一放聲氣，經紀立即來電：「火炭工廈，行路距離火車站七分鐘，交吉有匙」。於是趁周末一齊去睇樓，兩個單位分別在一條街不同工廈，相距甚近，一間係新鴻基起嘅，一間係華懋昔年興建嘅，當然係三十年以上嘅舊樓啦，睇完問價，經紀回覆：華懋嗰間呎價三千餘，新鴻基嗰間約四千零。咦，地點街道無分別，點解價錢會相差咁多？一千呎就相差一百萬元噃！經紀話：「你睇完樓應該明白，發展商唔同吖嗎，你懂的，我唔敢講嘢！」

睇完樓，兩親戚走去駿景園商場麥當勞飲杯茶，撞到一位家姐嘅好友L太，問L太：「點解會響呢度呀？」L太話：「我個孫女考DSE成績好好，我特登買份禮物嚟駿景園送俾佢。」成績好，入大學讀邊科呢？不出所料，L太話：「孫女喜出望外，現在話一定要申請入港大讀醫科喎！」又係讀醫科，成績梗係五六科5**嗰隻，建築邦話：「嚡，點解我未見過啲考試星級人物入港大讀土木工程或結構工程嘅呢？我去邊度搵接班人？」呢個問題會考起好多工程專業人士，因為8大之中有5大有工程學院，偏偏每一間工程學院都係只有（大部份係）21至25分（最好5科計）嘅DSE學生報讀，讀醫科法律環球商業嗰啲，要有30分以上，連四姐夫專長嘅新聞系，都有28分以上，難怪建築邦話要考慮加入工程師學會專業小組，希望監察一下近年工程學畢業生嘅專業考試嘅水平，以盡把關之責。四姐夫就話千祈唔好教人讀新聞系，呢系學生特多，除中大浸大新聞系夠老資格係皇牌學系之外，樹仁珠海有更多新聞系學生，恒管已開設呢系，港大不知何故，亦開埋同類課程爭飯食，搞到新聞系畢業生一年有幾百人，新聞界邊度有咁多飯碗呀，畢業生前途不明朗，人工又低，中英文成績好嘅學生不如去讀英文、中文或繙譯，就係唔好選新聞系！醫科有政府及醫生組織合謀保護，令到供應少人工高，向錢看嘅尖子，梗係要讀醫科啦，但真有大志，想真正發大達向錢看，要學馬化騰、汪韜嘅，不如進入工學院讀電腦科技，讀醫科或環球商業，只會做到高級中產，與馬化騰差好遠好遠！另一隻馬，馬雲係讀英文系嘅。

左丁山

解憂店

世界著名大學

返回頂部

Stillgood2