用戶登入
用戶名稱:
密      碼:
搜索
教育王國 討論區 教育講場 先進大學(左丁山)
發新帖
查看: 359|回覆: 0
go

先進大學(左丁山) [複製鏈接]

Rank: 13Rank: 13Rank: 13Rank: 13


77129
1#
發表於 17-4-1 11:30 |只看該作者 |倒序瀏覽 |打印


圖片來源:https://knight-hennessy.stanford.edu/


昨日講起科技大學校長陳繁昌教授介紹史丹福大學最新研究基金獎學金,總數高達7億5千萬美元,約58億港元,數目龐大,已經係香港八間公立大學每年總預數嘅一半左右;如果講銀紙,香港啲大學同美國私立大學比較,簡直望塵莫及,只計呢筆單一研究生獎學金,可能已經大過科技大學一年嘅總開支啦。所以左丁山從來唔重視英國QS、Times嘅大學排名榜將香港啲大學抬到鬼咁高,大家老實啲面對現實,美國頭二十間私立大學論資源,論人才,係遠勝本地大學嘅。


美國私立大學勝在有錢兼有人才,兩者互相扶持天下無敵,英國與歐洲好多大學窮過鬼,難以匹敵,只有幾間英國古老大學如牛津劍橋可以吃老本,不致落後太遠。史丹福呢個基金,係由76歲MBA校友Phil Knight(Nike創辦人之一,去年六月底辭主席職)捐出4億5千萬元創立,再搵其他人捐錢嘅,校友回饋母校,本來平常不過,但美國私立大學啲有錢校友捐款,零舍大手筆,世界上最為慷慨,又係令亞洲大學汗顏嘅,據肥仔K講,日本大學生成為富豪之後,捐款回饋母校甚為少見,此則可能與文化及稅務問題有關。史丹福嘅獎學金簡稱KHSP,即Knight-Hennessy Scholars Program,John Hennessy就係史丹福榮譽校長。


KHSP獎學金發放資助嘅準則係鼓勵研究生有獨立思考,願意服務社會,顯示領導才能,換言之,不是讀書蟲及聽教聽話、專注考試成績的學生,而是為人謙卑,尊重多元,敢於創新、敢於挑戰權威,膽敢懷有「拯救世界」夢想嘅學生,必須經過評審教授面試。香港三大學收生制度,目前是純粹考慮成績,憑DSE及IB成績,用電腦排名,大學不同學院或有面試,但非主流,如果考到5科A*而有大學唔收,隨時成為大新聞,學生家長鬧上廉記都似。美國啲私立大學完全獨立,不受公帑支配,就有收生嘅完全自由。


清華大學據講正在籌組一個亞洲大學聯盟,清華講到要挑戰西方大學,話大學之道,唔應該全部由西方大學話晒事,應有亞洲聲音喎。甚麼是亞洲聲音以至亞洲價值?中國全部大學要擁護習核心,聽中央的話辦事,黨委書記要監控學生言行,就是亞洲式大學應有之義?史丹福或美國大學早已走出大學教育在傳授知識呢個框架,鼓勵學生自由思想,獨立思考,挑戰權威,如此方能推陳出新,不斷後浪推前浪。中國科技固然進步神速,但大學仍然留在控制思想階段,點可以持續與美國競爭世界一級人才呀!




左丁山



   0    0    0    0
‹ 上一主題|下一主題
返回列表
發新帖