- 在線時間
- 312 小時
- 最後登錄
- 25-11-6
- 國民生產力
- 3653
- 附加生產力
- 46073
- 貢獻生產力
- 0
- 註冊時間
- 07-11-25
- 閱讀權限
- 10
- 帖子
- 27812
- 主題
- 12609
- 精華
- 0
- 積分
- 77538
- UID
- 168291
 
|
小學壓力也爆燈 快樂童年何處尋（東方功夫茶）
日本動畫大師宮崎駿曾經講過，童年係為咗體驗做細路至可以體驗嘅事物而存在。可惜吖，香港地大人有大人搵食壓力，細路有細路讀書壓力，少年已經識盡愁滋味，仲邊有樂趣可言。
唔係誇張o架。有團體訪問一千四百名小四至小六學生，發現近一成受訪者表示壓力去到最高分嘅七分「爆燈」水平；又有六成人評估壓力指數處於四至六分偏高水平。至於壓力來源，唔使問阿貴梗係嚟自學業，除咗測驗考試功課多，近六成學生話感受到升學及前途壓力。嘩，小六學生得嗰十一、二歲，幾時擔憂得到大呀？
想知學生壓力有幾大，除咗睇調查數據，仲可以睇吓尋日深水埗三太子及北帝文昌開筆禮，活動未開始已吸引幾百名家長同小朋友排隊，有家長跟足傳統，帶埋課本同文具嚟開光，亦有孕婦為BB祈福，場面不知幾墟冚。據活動主辦單位講，近年參拜人數節節上升，可見依家嘅學業競爭有幾激烈。
冇計喇，教育制度一味着重考試，求學只是求分數，學生有乜法子唔壓力爆燈？最慘係教育制度五時花六時變，學生家長無所適從，淨係小學嘅全港性系統評估（TSA）都已經玩死人喇。
咪以為淨係細路有壓力，做家長嘅一樣唔輕鬆。早排有調查發現，逾九成家長會喺暑假期間帶仔女去旅行，不過唔係為咗叉電，有人為製作求學面試檔案，有人為視察海外學校環境而來。咁都未算，有家長安排三歲小朋友同時學五種外語，結果弄巧反拙，小朋友連一句完整句子都唔識講，問你怕未。鬼咩，家陣小朋友升讀名小學、名中學仲難過升大學，琴棋書畫少一瓣都唔掂，有人形容家長催谷子女就好似軍備競賽咁，大家不斷增加投資，唯恐執輸行頭，可謂一針見血。
香港社會就係咁畸形嘅喇，年輕人出路狹窄，上流無望，大學畢業生收入尚且不斷縮水，如果連入場券都攞唔到，後果更加不堪設想，咁就難怪家長愈來愈早催谷仔女，由中學到小學，由小學到幼稚園，甚至有人話要「贏在射精前」添。其實站喺學校角度，你估又好想操練學生咩？唔操練學生冇好成績，冇好成績派位表現差，派位表現差影響收生，跟手學校被殺，飯碗不保，惟有人操我又操。講到底，操練文化正正係社會集體焦慮嘅產物！
清代作家沈復喺《童趣》裏面記述自己細細個觀察花台雜草，小蟲相鬥，輕鬆開心又一day。對於競爭激烈嘅香港學生嚟講，有時間都學多門外語，呢啲童趣只能成為奢侈品嘅咋。
|
|
發表於 16-9-4 14:38
