田北辰就「學生自殺問題」發言 [複製鏈接]

田北辰議員在2016年3月21日教育事務委員會特別會議上就「學生自殺問題」發言

田北辰：記得年半前我喺立法會，動議《還學生快樂童年》，當時湯家驊議員有句說話，令我好深刻，佢話「有個快樂童年，就解決到所有問題咩？快樂未必係一個用嚟教下一代嘅適合指標。」講版權法、政改，我一直都覺得湯家驊係泛民英雄，但佢對快樂童年嘅睇法，我真係好失望。我唔敢擔保有快樂童年，就一定有豐盛人生，但冇快樂童年，有豐盛人生嘅機會會大大減少。

我要申報，由參與教改到今日，我見證好多教育問題都係「走哂樣」。TSA係咁，初初話係系統評估，到而家每間學校都有資料，教育局一日唔做不記名不記校，我一樣會唔順氣，講到下任局長上任我都照講；小學全日制又係咁，99年教統局局長王永平話，小學全日制原意係「學生在校內完成家課及溫習，使學生回家後能有多些時間休息，培養自己的興趣。」「學校可利用上午的時間教學，下午則安排不同類型的課外活動如文藝、體育、音樂等，培養學生的創作力及多方面的潛能。」學生留校7小時。今日如果全日制係咁正，啲學生洗乜叫救命？

我見啲家長網上分享，學校功課欄日日新鮮日日甘，功課多到唔夠位填；有學生同我講，有學校1晚派18份畫畫功課，因為唔同學科老師冇協調，係咪離哂譜？局長，我要求教育局即刻發出強烈指引，還我當日支持小學全日制原意，功課一律喺學校搞掂。學生有學習差異，你喺學校拔尖補底，幫佢哋清哂啲功課，係政府應該負嘅責任；科科爭住畀功課，你叫啲老師諗吓學生承受力，協調點樣「封頂」。每個學生返到屋企，有1個鐘自己玩，1個鐘睇書、睇戲，同爸爸媽媽傾吓計。

其實嶺南大學都做過「兒童快樂指數調查」，功課愈多，學生愈唔開心；扣哂返學、做功課嘅空閒時間愈多，佢地就愈開心。呢個係我第2個要求，你哋搞掂「回家零功課」之後，大可以請教專家，同每間學校嘅學生做快樂評估，追蹤功課量同壓力嘅關係。呢兩點局長會唔會做？

田北辰：點解我咁緊張講返教改全日制原則，點解零功課咁重要？首先應付學生差異，係咪真係屋企搞得掂，呢啲係學校嘅責任，你係應該透過唔同輔助，小班乜都好，搞掂學習差異，令學生返到屋企，做返小朋友應該做嘅嘢，佢發吽哣有咩問題？我最鍾意發吽哣，點解每一分鐘每一秒都要有productivity? 細路仔需要呢啲空間。小朋友種種唔開心嘅嘢，佢同同學相處唔開心、佢有學業壓力，如果佢唔係淨係掛住做功課，家長唔係淨係同佢補習，家長就有機會接觸佢，聽佢講邊到開心邊到唔開心，做好家長教育。我好同意議員同事講，你而家返屋企，淨係補習都攞小朋友命，咁你同佢講咩家長教育？聽到都做唔到。如果小朋友喺學校搞掂家課，家長上過堂，知道要聽吓小朋友有咩開心，有咩唔開心，咁家長就可以幫小朋友解決到佢唔開心嘅嘢。佢喺互聯網受到啲批評，佢會唔會返學校同人講？定係夜深人靜，更加願意同媽媽講？大部分家長其實唔了解小朋友困擾啲乜，知道亦唔識處理，但佢至少識求助。每件事源於佢返屋企冇功課，等佢多啲自己接觸家長，我想問局長，你會唔會回復原本教改原意，做到零功課？

吳克儉局長：去年10月30日我出咗張通告，清楚講明功課應該喺校內進行，呢個好清楚，再要求家教會商討家課政策，學校要有透明度，每年更新家課政策，等大家都睇到，就係希望減除呢方面壓力。校長、老師呢方面着力，返到屋企有時睇吓書都要。

田北辰：你係呼籲定係強烈指引？發現有任何一間學校，畀好多功課學生帶返屋企，你會唔會出警告信？

吳克儉局長：我同學界討論時，佢地話：「局長，你唔好用威嚇式話畀我哋聽。」有好多學校已經進行緊，作為一個專業教育工作者……

田北辰：唔係，對唔住，你教改原本係唔諗住有功課返屋企做，點解你政府唔落實呢樣嘢？呢個何之為高壓？你半日制轉全日制個構思係咁嘛。

吳克儉局長：我想同田議員分享一個情況，最近問一個家長，佢話小朋友功課多，有3樣功課、4樣課外活動，所以功課好多，我哋就問點解課外活動係功課一部分，所以家長教育好多方面要做。

田北辰：對唔住，我係問點解你唔畀學校叫學生帶功課返屋企，係屬於高壓？點解你唔強烈規範？

吳克儉局長：我理解，學校本身對家課嘅定義、同家長嘅默契都有好多種，我好難話你一定唔可以有嘢帶返屋企。

田北辰：點解好難呢？你教改原本係零功課架嘛。有咩難，你而家呃咗我呀？

田北辰：我第3次追問，當年半日制變全日制，7個鐘喺學校學嘢、上堂、做課外活動，做完功課，返屋企做自己鍾意嘅嘢，返屋企同父母相處傾計。今日嘅情況，學生上堂連課外活動要留校10小時，平均返屋企要做7-10樣功課，有學生放假更獲發23樣功課，完全摧毀全日制教育原意。局長，作為一個行政主導政府，我要求你還我「回家零功課」嘅小學全日制制度，你啱啱話會呼籲，對唔住，呼籲唔係行政主導。行政主導係你當初去改革時所講嘅目標，你今日就要規定學校做得返呢個目標，佢唔夠資源，你就商討要點畀資源佢。你係咪想做返個行政主導嘅政府？

吳克儉局長：因為呢個係一段時間以前，中間發生嘅事我可能要啲時間做多啲分析，拎返少少資料，但目標同我頭先講、10月底出嘅文件政策方向、目標係相同，我哋真係唔希望見到有返功課。我文件係寫咗唔可以，但有校長返返嚟，佢話個別同學真係學習困難，而我啲老師同其他同事，願意用自己時間幫佢地做，你覺得有問題咩？第2樣嘢，頭先課外活動都變為功課，呢個係一個大問題。第3，如果真係有學校，23項功課，拎出嚟。

田北辰：即係你會強烈要求學校，除非有特別需要嘅學生，否則大部分情況下，都係返屋企果陣係零功課。

吳克儉局長：我可以咁講，係。

田北辰：因為你頭先講果啲係少數例子丫嘛，學習問題各方面。係咪你確保學校會做到？

吳克儉局長：正如我所講，議員你提到有個個案係23個項目，拎出嚟。點解我咁講，最近有家長講，2、3項，3、4項，跟住有12項，我哋追查返，係12日假期12項。有證據，我哋可以查查。

田北辰：最重要，你今日係確認，對絕大部分學生嚟講，喺小學，你唔會畀佢地拎返屋企做功課，學校7小時會做完，啱唔啱？

吳克儉局長：喺行政主導入面，我寫得好清楚，係不可以呀。