我暑假都有補過幾個英文程度唔太高/徘徊危險邊緣嘅小學生,程度連一個 K3 都可以爬頭。有時候教到好灰心,尤其係佢地唔係好學努力嘅學生。我其中有一個升小二,好似完全冇學過英文咁,連一句 “Do you know how to play basketball” 都唔明,jump、laugh 都唔識串,對答都要家姐幫手,更莫論文法,佢仲要係心散唔願做練習嘅小朋友。我唯有慢慢教,從頭開始,畢竟父母交託小朋友畀我,我就要盡我所能去幫佢。有一日突然之間佢講 “I finish this one (練習)and can I learn fold star?” 同埋 “Can you draw Pikachu on here?” 我聽到之後好開心,佢從來冇正面同我講英文,次次都要家姐翻譯。自此之後,佢有唔識嘅字,只會問家姐 “XX 英文係咩”,然後自己表達返成句。雖然文法都係唔多得,但係起碼佢有進步,肯講,證明我冇白費心機。依家諗起都好大感觸!