小學爭辦教育團　難為家長百上斤（東方功夫茶） - 教育講場

登錄 | 註冊

討論區

教育王國: 教育講場; 使用意見

幼兒教育: 幼校討論; 幼教雜談

小學教育: 小一選校; 小學雜談

中學教育: 升中派位; 中學交流; 初中教育

專上教育: 備戰大學; 選科選校

國際教育: 國際學校; 海外留學

知識增值: 課外活動; 教材閱讀; 公開考試; 深造進修

特殊教育: 特殊教育; 資優教育; 自閉寶寶; 智能評估

徵求專區: 二手市場; 誠徵老師; 組班專區; 徵保母車

聯絡管理員

我的中心

教育王國 › 討論區 › 教育講場 › 小學爭辦教育團　難為家長百上斤（東方功夫茶） ...

查看: 780\|回覆: 3	go 小學爭辦教育團　難為家長百上斤（東方功夫茶） [複製鏈接]

elbar

翡翠宮

Rank: 13


	77857

1^#

發表於 14-3-21 12:32 |只看該作者 |倒序瀏覽 |打印

唔知究竟係社會進步，定係港人要求愈來愈高，以前中學同大學先至有遊學團，家陣連小學甚至幼稚園都話要遊學，而且愈來愈豪，團費少則五六千元，多則過萬元，家長少啲財力都唔掂。

唔係功夫茶亂噏。本報收到唔少家長投訴，話子女就讀嘅小學大搞超豪遊學團，參加唔係，唔參加又唔係，簡直進退兩難。其中一間位於港島嘅著名小學，為小六畢業生舉辦四日三夜台灣教育團兼畢業旅行，行程包括參觀國立台灣大學、國立故宮博物館及野柳地質公園，入住三星酒店。校方美其名讓學生認識環保，增廣見聞，實際上團費要五千六百元，比坊間嘅台灣旅行團貴近一倍，連旅遊業界都質疑物非所值。

另一間小學亦唔執輸，為小六生舉辦新加坡五日教育觀光團，盛惠七千大元，令唔少家長左右為難。唔畀子女參加，可能會被同學取笑，產生自卑心理；畀子女參加，價錢實在太不划算，家長負擔百上加斤，尤其經濟條件唔係咁好嘅家庭，更加係有苦自己知。

所以話，今時今日做家長一啲都唔易，唔怪得李麗珊話養大一名子女要四百萬元喇。呢，好多家長唔想自己子女輸喺起跑線，就算經濟能力有限，都要被迫做「怪獸」，搞到兒童由讀幼稚園開始就要學齊十八般武藝，一時補習，一時學琴，一時畫畫，一時跳舞，幾乎冇假期咁滯。家長本來已經唔易負擔嘅喇，家陣連小學及幼稚園都要遊學喎，你話點頂吖？大家只要上網睇吓，就知道遊學團幾咁普遍，幾咁豪華，有小學搞五天北京團收費九千元，有學校搞南韓五天交流團盛惠七千多元，最誇張嘅係有幼稚園舉辦六萬元嘅十天美國團，問你怕未！

可憐天下父母心，家長梗係希望為子女提供最好享受，唔好輸畀同學，但正如教育界人士話齋，去一次海外旅行，唔一定能夠為學生增值，反而可能扭曲佢哋嘅價值觀，小小年紀就識得講享受，識得追求奢華，呢啲所謂遊學團簡直弄巧反拙。

講開又講，遊學團大行其道，互相攀比，鬥豪鬥貴，其實同港府好心做壞事有關。當局以幫助低收入家庭嘅學生參加境外學習活動為名，通過關愛基金向每名受助學生資助三千元，搞到唔少學校及旅行團為求用盡資助額，為遊學而遊學，完全失去學習嘅意義。今時今日，教育一味向錢看，豪華遊學團固然大行其道，而津校就爭相轉直資變成貴族學校，令貧苦學生望門興嘆，咁嘅教育點可能培養真正人才，又點可能有未來吖！

0 0 0 0

解憂店

世界著名大學

返回頂部

Cheeselover

大宅

Rank: 5 Rank: 5


	3700

2^#

發表於 14-3-23 07:11 |只看該作者

回覆：小學爭辦教育團　難為家長百上斤（東方功夫茶）

我還未受此玩意所苦，也難說三五七年會有改變。我未曾為此作統計，有多少學校組織遊學團，團費多少芸芸，另一方面，我亦要疑問傳媒的報導取向，是嘩眾取寵吸引眼球，還是中立報導實況，學界肯定有組織豪華遊學團，但有多少學校組織和費用？我相信自己是大眾一群，不會進貴族學府，所以應該不受之苦惱。
或許現實不如我所料，若然香港學校十之八九有組織物非所值遊學團，而各校內同學亦十之八九參加，那情況確實可悲。

返回頂部

Marco-ma

男爵府

Rank: 6 Rank: 6


	5315

3^#

發表於 14-3-23 12:59 |只看該作者

本帖最後由 Marco-ma 於 14-3-23 12:59 編輯

" 可憐天下父母心，家長梗係希望為子女提供最好享受，唔好輸畀同學 "
<< 份報紙真係好有問題 , 家長做咩要提供最好享受俾子女呢 ? 咩叫輸俾同學呀 ??!!

傳媒嘩眾, 讀者又全單照收, 造就愈來愈多怪獸家長...