直資不強求 審計署批評直資學校之管理,引起貧富之爭,都幾令人莫名其妙,一啲議員指責社會與教育局拒絕支持領綜援學生入讀直資學校,「剝奪綜援生升讀優質學校機會」,更加無理由。啲議員咁講,等於為直資學校塗脂抹粉,直資即優質。純粹為批評而批評,譬如香港兆基創意書院,會優質過喇沙(非直資)與體藝中學(非直資)咩?
假如議員們真心為綜援學生着想,就應該放棄佢哋嘅左派思維,支持學券制,叫教育局每年派學券,學券價值等於每年一名官津補校學生之平均成本(包括教師薪水、學校雜費與其他支出等等),等學生揸住張學券,自行申請入心儀學校,不必由電腦派位決定,到時每間學校可設入學試,憑成績決定,現在沒有了升中試,入直資憑面試決定,坦白講,優質綜援生要靠面試擊敗富家子弟,機會梗係差一啲啦。
但我哋嘅議員最憎升中試一類考試,一味話要有賴平時成績、活動教學,哎吔,講到做 project,參加活動,有錢學生嘅優勢更大,綜援生更加不利。請記住,哈佛耶魯普林斯頓等收生有 need blind政策,絕不歧視窮學生,但絕對着重申請人之學業成績(因膚色而不利黃種亞洲人,則源於美國大學嘅優惠黑人政策)。其實,優秀基層學生未必要入讀直資學校先至得嘅啫,一位八十後嘅直資名校教師,畢業於中大,自幼住在公屋,年幼時阿媽話:「我哋冇錢,供唔起你讀名校」,於是佢自小讀地區學校,考入中大,咪一樣獲得名校教席,所以佢同朋友講:「點解講到窮學生一定要讀直資名校,先至叫做平等呢?唔通窮學生讀其他中學就一定爬唔到上去?」唔,呢啲就係一些議員嘅心態,家長千祈唔好附和,呢個世界一定要靠自己。現實上,綜援生入得到直資亦未必好,粵語片早有訓示,充大頭者,必然傷害兒童心理,加強佢嘅自卑心態,成長後性格不平衡,到時對父母有好多埋怨,何苦來由哉。今年恒隆數學獎得獎人來自八間學校,冇一間係直資,可見直資學校係可能好啲,但非直資學校未必一定輸蝕,請議員唔好助長錯誤心態。
|