早前睇新聞, 見到聖家校長邵婉芬下下為政府及TSA 護航,睇到我火滾, 不吐不快!
其實好多人以為聖家係名校。作為過來人,我可以講,根本就唔係!大家都神化左佢喇,唔係位於九龍塘就等於人人趨之若鶩的神校囉。
教學方法或模式
1. 學校的功課量好多,但老師唔多教。例如就咁睇一個專題報告,表面上是要3年級學生可以對運動有較深入的認識。可惜學校只派指引,要包括什麼內容等.....但家長就要做到份份有幾十頁紙,有圖和不可手寫只可打字落電腦。不過現實上,學校根本冇教過小朋友中文打字、冇教小朋友怎樣搵資料。老師只有派、同收功課兩個動作!專題報告係要有簡介及總結 ,就好似我們大人做project 一樣。但當中有幾多程度係小朋友有能力參與?由此, 你可以想像這些表面功夫,有咩open day 或者介紹學校時,便可以拎出黎宣傳囉。唔知就以為學生有幾叻。不過, 當中有幾多成係來自學校培育先可以有咁精美的project?
師生關係
2. 我慶幸自己個女未試過被奚落。不過聽唔少,其實學校是好睇重學術成績的。所以學生唔達標咪想辦法令你走,但奈何又係津校, 唔可以直接勸退, 所以咪只能用説話奚落,例如,「她咁樣都係讀唔掂,你有冇出去補習?你係咪應該轉校.?」....之類
TSA 操練情況
3. TSA 其實對於我來講,都係功課問題。如果將操練、功課負擔建築在TSA 的基礎上面,我就好反感。 如果好似吳局長話,我前校長話,呢D只係基本能力的測試,如果係咁,即係話基本上學校教的野, 係應該有足夠應付,根本無需要add on 在功課上的操練。
學習障礙支援
4. 我只知有學生有讀寫障礙,學校唔會幫,零support。成績唔好,咪勸喻離開囉。
功課量
5. 功課量: 每日8-10樣。幾耐完成?好depends, 校長自己都做個調查,話8成學生可以6點前完成,其他唔能夠完成既係自己有問題。而呢份文卷調查係由小一生在課堂上填寫, 作為家長的我未曾收過任何問卷咨詢意見。聖家有功課堂的,不過好多時候用來教書或其他活動。
離校原因
6. 當我想離開或者有怨言時,身邊D媽媽曾經話:「你個女唔驚啦,她應付到,成績又好,但我其實仍然係好反感,縱然女成績係ok, 但唔代表我贊同這間學校的教學方向和老師的態度,以及他們對學生的奚落。雖然我囡這些年未受到這些待遇,但唔代表我可以繼續接受這間學校的教學模式。校長和老師當日亦同我講:「你女完全應付到學習上的野,成績好。」但都係果句,她這刻所謂handle 到,唔代表我覺這些就係好,所以我們最終決定走。
我其實唔反對傳統學校,但我希望學校老師都係教學生,而令小朋友學到野,並唔係將功課量以量取勝,將每樣野流於表面...
對聖家,我唔係最反對她對TSA 的態度,而係D老師根本唔教野,這個先係最大的concern。唔教,再加好多無謂的功課,我先最反感!
#嘉諾撒聖家小學九龍塘
#唔係位於九龍塘就等於人人趨之若鶩的神校
#家長有SAY
#香港革新教育家長同盟