英雄輝開壇教家長 培養子女抗逆

elbar

「英雄輝」將以港足隊長身分，下個月到職業訓練局主講家長講座，分享點樣培養正向抗逆思維。


【明報專訊】香港足球代表隊門將葉鴻輝，喺球隊面對逆境波不失鬥志，上個月佢代表東方龍獅喺亞冠盃雖然以0比7輸咗畀廣州恒大，但連內地球迷睇完都話佩服「英雄輝」嘅不敗鬥志。「英雄輝」下個月會為職業訓練局主講家長講座，分享點樣培養子女嘅正向抗逆思維。


Emily睇番資料先知，「英雄輝」17歲中五畢業後放棄升讀中六，決定做職業足球員，屋企人當時雖然無大表反對，但「英雄輝」都睇得出佢哋唔多開心，為咗可以追夢，又令佢哋放心，阿輝當時就決定同年修讀香港專業教育學院（IVE）運動管理及訓練學高級文憑，當係佢追夢嘅附帶條件。後來唔鍾意讀書嘅佢發覺，原來讀理論都可以幫到佢好好備戰，唔係淨係迎合屋企人期望咁簡單。


「英雄輝」嘅講座係職業訓練局「停一停……聽聽子女的心聲」家長講座系列之一，下月8日喺美孚社區會堂舉行，有興趣參加可以去職訓局網頁登記，或致電2836 1907查詢。