想問下學校環境?

dudu19812002

各位mummy,daddy:

我個大女今年要選擇小學喇~本身我想佢考主愛既,但聽聞功課好多,test又多,學校比較著重學生既成績!而我係呢個bk網見到有家長講過呢間仁紀係著重小朋友身心發展!我想問下各位家長,呢一間學校既程度係咪真係唔會好"迫"小朋友讀書架??因為我大女讀書都只係不過不失!而活動方面又多唔多呀?老師們又ok嗎???thks

csy_ma

原文章由 dudu19812002 於 08-4-24 23:16 發表
各位mummy,daddy:

我個大女今年要選擇小學喇~本身我想佢考主愛既,但聽聞功課好多,test又多,學校比較著重學生既成績!而我係呢個bk網見到有家長講過呢間仁紀係著重小朋友身心發展!我想問下各位家長,呢一間學校既程度 ...

dudu19812002 :

最初見您post出黎既題目，仲以為您問校園環境添－－呢個好明顯，係仁紀贏晒，尤其是將來學校既小一生，果時校園綠化計劃應已完工，應該係最具環保意識既校園（都係多得家教會常委阿符太每日返工咁返，小息帶領小朋友澆水，兼照顧有機耕種班既作物，幅示範田又整得好靚……)總之，就硬件而言，仁紀係擁有一個A級校園

就軟件而言，您可以去校網睇吓佢地個發展計劃，目標都係著重小朋友既全面發展。

您問功課多唔多？好難答到您，因為每位老師既風格都唔同，佢地亦會因應唔同既小朋友，而有唔同既教學部署。我地有d班既家長，會嫌佢地班既功課長期偏少，而提出不滿既意見。有d家長又會欣賞老師有規律地佈下好多功課俾佢地，令佢地既小朋友吸收得更好。

個人比較鍾意有多d自由既時間，不過覺得我囡果班功課量都算合理。亦識得其子弟有少少學習障礙傾向，極怕抄書既家長，響功課應係稱冠全級既果班，都仍冇乜意見－－因為見到個老師好俾心機，而且多作溝通，又肯鼓勵小朋友，所以咪積極配合囉

老實講，小一適應真係幾唔容易既，我囡由活動教學既幼稚園過渡黎，過程辛苦，搞到我幾乎想轉校，響上網同問其他校家長意見既搜集資料期間先發覺，仁紀既功課量真係唔算多，而且，都發現其實傳統教法，例如做抄寫功課咁，對小一生而言，真係頗見效及有其道理既

其實同一功課量，小一生要用既時間係最多既，愈到高年級愈容易應付。個人感覺係，單就量而言，今年亦較去年少，可能因為校長不斷向老師強調，要著重小朋友全面發展之故（小一就曾有老師想較嚴厲處分欠功課既學童，訂下針對其班既罰則，後經家長反映後，校方作了相應調整）。

個人認為，"迫"小朋友讀書既，好似係家長緊張d喎
仁紀係區內成績較好既學校，重學業係傳統黎既，似乎好難改弦換轍(有冇咁既必要呢？)，重要既係，學校會唔會將資源傾斜響精英學生，而忽略成績略遜既學生？

以我個人所知，肯定唔係。發展方向都唔係咁，假如係"迫"既話，學校更願意去"迫"學生培養閱讀中英文課外書既興趣，在鼓勵閱讀方面花了許多心思。

至於老師方面，其實係人夾人緣，但仁紀既多數老師會諗好多方法去鼓勵學業未如理想既小朋友，俾幾多機會佢地在其他方面發揮，培養佢地既自信。呢方面，有高年級家長分享過，佢地既子弟或者成績略遜，但操行好既話，擔任服務生或班長、風紀既機會，唔會同成績好既同學有分別。

講到活動，單是家教會舉辦既課餘興趣班，已逾六十班，尚有許多老師親自帶既校隊同紀律團隊既活動。我冇詳細同其他學校比較過數量，唔知咁算唔算多，不過都真係識得有同學仔星期一至星期五都會安排課餘活動既（您記得要參加家教會，否則人多要抽籤既話，非家教會會員好難參加到，但會員既就盡量開班滿足其需要）。當然，咁既情況響仁紀唔算多，因為多數家長幾緊張小朋友既學業，而佢地既課後時間真係幾緊張，未必會咁安排。

[ 本文章最後由 csy_ma 於 08-4-26 00:40 編輯 ]

dudu19812002

原文章由 csy_ma 於 08-4-26 00:36 發表


dudu19812002 :

最初見您post出黎既題目，仲以為您問校園環境添－－呢個好明顯，係仁紀贏晒，尤其是將來學校既小一生，果時校園綠化計劃應已完工，應該係最具環保意識既校園（都係多得家教會常委阿符太每日返工咁返，小息帶領小朋友 ...

我好開心呀!你好有心機答我既問題~~~睇你打得咁詳細,真係好多謝你呀!! 我依家更加清楚呢間學校既野喇!不過,我已經好擔心我大女喇!因為佢真係讀書又唔ok,近期係學校既操行又唔係好好,所以依家我都好多時擔心到訓唔到喇~

我聽你咁講,睇到間學校唔迫小朋友讀書!!!我真係好想女女可以入到去!其實佢依家係中華基督教會既學校架,入聖公會既學校會唔會真係好難呢??而且聽聞仁立,仁紀係難入既學校!我又想請問下,選校有冇咩好心得,有多d機會可以提升入仁紀既機會率呀???

csy_ma

原文章由 dudu19812002 於 08-4-26 20:11 發表



我好開心呀!你好有心機答我既問題~~~睇你打得咁詳細,真係好多謝你呀!! 我依家更加清楚呢間學校既野喇!不過,我已經好擔心我大女喇!因為佢真係讀書又唔ok,近期係學校既操行又唔係好好,所以依家我都好多時 ...

dudu19812002：

擒晚其實我寫咗好多俾您嫁，不過錯按掣冇哂，就放棄咗

最主要係想問：您個囡都未讀小一，您點知佢讀書o唔ok？唔通佢做過專業評估？

假如佢只不過響幼稚園成績唔好，咁好可能係智力年齡未到咋喎 阿囡有個同學仔，係級前列位置，但佢媽咪就話俾我聽，阿囝K3時叫佢串一至十既英文生字，佢串咗成年，都成日唔記得，點知過咗六歲後，要佢再串，佢一下就串到了  

所以，點解教局唔鼓勵幼稚園有默書測驗，就係咁解。當然，會有d小朋友較早熟，響呢方面好得，但又唔代表唔得既小朋友唔正常喎，不過係唔能夠做揠苗助長既苗咁話啫，未必好有問題。假如家長因為對小朋友冇信心，佢會感覺到，可能會因此而對佢自己冇信心，咁幾易做成惡性循環

幼稚園既學生，似乎只要鍾意聽父媽講古仔，肯邊聽邊睇字，已經好ok（我囡就只鍾意聽故事，唔肯睇字 ）。我囡幼稚園係活動教學，我地又冇乜教佢超前認字，小一適應冇錯係幾辛苦，但係到咗下學期，最遲到咗小二，就轉到直路了。您唔好咁心急，對自己個囡有信心和耐心，可能好過窮擔心吧？

至於點先較有機會入仁紀，呢個我真係答唔到您。因為老公係舊生，我地第一輪已有入場卷。我囡係幼稚園係聖公會既，佢果屆有逾廿個同學仔一齊上呢間小學，其中有幾位係第三輪面試入到既。其實呢d，都幾靠抽獎運，之後，就要睇父母既誠意

我識得有位爹地，每日俾一個唔同既email，一個fax同一個電話俾目標學校，求副校俾個佢個囝一個面試機會，結果入到出名難入既荃灣浸信聯 （果位爸爸後來問副校點解會收咗佢個囝，副校就話：因為佢有一個好爸爸囉！都真係幾感人）

仁紀既面試好似要見埋家長（聽講都有筆試），我諗誠意同態度都好重要，俾個貼士您：仁紀幾著重培養小朋友既中英文閱讀興趣，前此最好為此多作準備，又或強調佢地響幼稚園期間有豐富既課外活動，可能機會會高ｄ

祝好運

[ 本文章最後由 csy_ma 於 08-4-26 21:56 編輯 ]

csy_ma

父母普遍相信只要貼身監察子女的功課，孩子的成績便會進步。其實最影響子女成績的是"情緒"這一環，父母與子女的關良好，家庭氣氛和睦，子女情緒自然穩定。但若然父母情緒不穩，我們又怎能奢望孩子的成績卓越呢？誠心祝福媽媽先掌管健康，再重建親子關係。

－－以上摘自<經濟日報>鄧藹霖 "會笑的媽媽"專欄四月廿四日。鄧從長子眼中的巫婆走到現在，其教訓都寫在她自己的書上，希望您有空也去看看。

dudu19812002

csy_ma:

次次睇到你打咁多野俾我,真係好鬼開心~~~ 你仲俾埋貼士我添!!
其實你都講得好對,依家我個囡又未讀小學,幼稚園只係一個比佢地適應讀書生活既一個起點,我聽你咁講完,我都發現自己呢幾排都開始緊張個囡既成績多左,攪到自己都開始失眠!!而個囡又真係情緒上面失控左好多,我真係要檢討一下先得!!可能我聽得太多其他家長講小學既恐怖野,成日都怕個囡到時會好辛苦,不如依家去俾佢慢慢適應,但整整下我就加強左~~仲令囡囡辛苦左添!!
其實我真係好緊張,真係好怕囡囡唔知派左去邊度呀?我真係唔想佢要去咁遠讀書,好辛苦!!放心,我會同囡囡一齊努力~~希望囡囡真係有呢個運氣,可以做到你囡囡既小學妹啦~~~

ck43420

現住石梨,下月搬到葵涌邨,小女今年9月升小五,想找一間全日制的小學(葵涌及荃灣),現讀石籬天主教下午校,全級153人考3X.(很多小學也沒有位) 謝謝

csy_ma

原文章由 dudu19812002 於 08-4-29 11:24 發表
csy_ma:

次次睇到你打咁多野俾我,真係好鬼開心~~~ 你仲俾埋貼士我添!!
其實你都講得好對,依家我個囡又未讀小學,幼稚園只係一個比佢地適應讀書生活既一個起點,我聽你咁講完,我都發現自己呢幾排都開始緊張個 ...

唔好話未上小學，我讀緊小二既囡，呢頭默完書，唔夠一個星期都唔記得哂啦  ，與其花時間谷佢短期記憶，不如培養佢閱讀既興趣，等佢到大d既時候肯自發學習

我以前既方法用錯咗 ，同佢一齊睇同讀高小學生都未必識晒既中英對照古仔，雖然因為阿囡幾個月都鍾意睇同一本書，搞到識背咁滯，但佢就完全認唔到d字．

今年，俾其他學校既家長醒，教我由多圖少字既書開始，效果就好好多 英文書如Oxford Stoy Tree係唔錯既選擇，一套6-8本書 (彩色)+6-8細workbook(雙色)+CD，都係$200左右 （荃灣三聯有賣，不過教協最平，盛惠$180左右 )．唔好以為套書每頁得幾個英文字，買黎好徙，因為圖多字少，小朋友好易猜出字既字義，而且個字會不斷出現，唔覺唔覺，小朋友就自己認到．

您不妨由Blue Book開始 (8本)，每晚臨瞓就開CD邊睇書邊聽，堅持咗三個月，包保效果好過您每日逼佢背生字．而且，學習時間可以平和又愉快 （好辛苦，我囡到小二先至培養到閱讀既習慣，因為我屋企唔俾自己開電視，佢假日一起身，通常就會跑到”圖書閣”睇書，要我地倒轉催佢先肯放手，所以佢最差果科中文都響冇乜溫書下進步咗 ）

另外，假如家長響屋企忙緊，開英文既VCD小朋友睇，亦係一個省事既學習方法．我囡自細都鍾意睇Teletubbies同Tweenies，一隻碟睇成百次咁滯，就算唔睇字幕，都會猜到字義同記得d音，到大咗聽到個字（小一係讀卷既），就唔會咁陌生，所以佢英文成績通常都OK（我地8字頭已收貨，但中文之前點努力都唔到！ ）

另外，多d玩網上遊戲，亦係一個方法，詳情請參考http://forum.baby-kingdom.com/viewthread.php?tid=1238032&extra=page%3D1(我將仁紀某次家長講座既講義打咗上去)

dudu19812002

csy_ma:

等我都要去書局先得!其實我個女都好喜歡去書局架!!不過,我因為1對3,所以都好難去時時配合佢囉~以前我一到左星期四就會帶佢去D博物館,科學館,太空館架喇(因為免費MA )不過,依家就好難去喇~
我又好多口咁問你一下,你住邊架???

dudu19812002

原文章由 ck43420 於 08-4-29 11:46 發表
現住石梨,下月搬到葵涌邨,小女今年9月升小五,想找一間全日制的小學(葵涌及荃灣),現讀石籬天主教下午校,全級153人考3X.(很多小學也沒有位) 謝謝

咦..其實我聽聞天主教既學校係好D架!其實葵涌村有部小巴去石籬架喎~有冇諗過唔轉校呢?因為你女女都升小五,呢個時候要佢從新適應,會唔會好辛苦呀??

csy_ma

原文章由 dudu19812002 於 08-4-29 15:03 發表
csy_ma:

等我都要去書局先得!其實我個女都好喜歡去書局架!!不過,我因為1對3,所以都好難去時時配合佢囉~以前我一到左星期四就會帶佢去D博物館,科學館,太空館架喇(因為免費MA )不過,依家就好難去喇~
我又好多 ...

我住深井（好遠，冇校車同保姆車到 )

好羡慕您有三個，一定好熱鬧了？而家大果兩個應可以一齊睇圖書了？再大d，仲可以請姐姐講古仔俾細既聽，既俾佢有滿足感，又可令佢更愛書．全職媽媽嗎？仁紀都幾多全職媽媽，住附近既話，可搵到唔少同道

我囡最鍾意果兩套卡通，都響以下網站搵得到，假如您部腦夠快既話，上去睇仲好(因個畫面細，注意力會轉移去睇字，download需時，可順便問佢聽唔聽得明)
http://www.bbc.co.uk/cbeebies/

csy_ma

原文章由 dudu19812002 於 08-4-29 15:06 發表


咦..其實我聽聞天主教既學校係好D架!其實葵涌村有部小巴去石籬架喎~有冇諗過唔轉校呢?因為你女女都升小五,呢個時候要佢從新適應,會唔會好辛苦呀?? ...

ck：

我地又唔係校方，實則又唔係好清楚您想問乜？真係好難回應您。

就像dudu所說，升小五先黎轉校，除非您囡囡適應力過人，否則分分鐘得不償失。其實石籬離葵涌邨都唔係好遠啫，我地學校好好似都有幾多同學仔住石籬，總好過我由深井返學 。

仁紀係我老公既母校，唔係我既心水，當初阿囡適應有困難，加上遠，我都有考慮幫佢轉校（仲搭到路，有機會去到離屋企最多15分鐘車程，升學率又拈既區內最熱門學校添），不過最終因為唔願意冒轉校既危險（隔咗一年，人地個個都熟，適應順利既話，小二轉去，都起碼到下學期，甚至小三先融入啦），加上阿囡又對仁紀好有歸屬感，又覺得呢度既老師好唔錯，學校發展方向又啱我，所以就冇轉到。

除非您個囡好唔鍾意現時讀既學校，否則，關鍵時候轉校真係有幾大既風險……何況，如果唔係top10，到呈分試先黎插班，校方似乎都會好謹慎咁考慮 (聽講仁立小一小二留返好多位，等小三黎收街外top既學生，但係係小三) ，我都聽過仁紀收過小五既插班生，但似乎係少數特例，您想試，可以試吓，最好先徵求阿囡既意見，若果唔係佢黎個消極抗拒或者唔適應，分分鐘成績大跌

csy_ma

係喇，唔記得講：套Oxford Stoy Tree既blue book中有幾本亦係學校既指定課外讀物，響堂上都有得教，之前有睇過，梗係著數d

此外，除咗極名校外，好多小學校係用Longman Express做英文課本(部分名校會讀高一級)，本書街外有CD同CD-ROM版賣（CD響荃灣三聯就有，CD-ROM要去到旺角天利行，約$200蚊上下)，如果真係想快人一步，不如買隻CD-ROM返屋企，等小朋友得閒聽吓唱吓玩吓遊戲，唔覺唔覺背晒課文仲好啦

以下係其他英文故事遊戲網推介：
http://www.hkedcity.net/resources/vgal/　(ETV)

http://www.go4english.com/ffk/index.php?lang=en

http://www.storyplace.org/preschool/preschool.asp?themeid=1

http://www.mightybook.com/

http://www.rif.org/readingplanet/content/read_aloud_stories.mspx

不過最多似乎都係製作咗好多得獎兒童節目既:
http://www.bbc.co.uk/cbeebies/(之前介紹過)

每日去睇一篇，成效包好過每日背生字 (高年級既經驗係：佢地或者唔難響默書度攞高分，但響考理解既卷一同考應用既卷二就易遭滑鐵盧）

[ 本文章最後由 csy_ma 於 08-4-30 10:35 編輯 ]