中大餐廳漢堡餐「只賣畀精英」 引起嘩然 原來係實驗

elbar

【明報專訊】大學餐廳竟有階級歧視？有網民噚日上載一張中文大學西餐廳嘅宣傳單張上寫住一個「Elite Special」（精英特選）嘅漢堡包餐，講明只限法律系、醫科等「精英學生」先至點得（圖），引來網民嘩然，仲鬧餐廳咁做「太過分了」、「同歧視無分別」。餐廳解釋，原來呢個係同學生合作做嘅社會實驗，希望大家唔好誤會。


同學﹕盼引起討論不同學科標籤


呢張宣傳單張係來自中大鄭裕彤樓西餐廳The Stage，話要推出一個專為中大精英而設嘅漢堡包餐，咁何謂「精英」？單張就話，凡就讀環球商業、國際貿易與中國企業、計量金融學、計量金融與風險管理科學、藥劑學、醫科同法律系嘅學生，憑學生證就可以點呢個餐。


The Stage嘅餐飲經理Fermi見大家咁大反應後話畀Emily知，呢個特選餐係一個同中大新聞與傳播學院學生做嘅社會實驗，睇吓大家對階級觀念有咩睇法同反應，仲話實驗只做一日，餐廳亦無預備呢個漢堡包。呢個實驗嘅發起人係中大新傳學院四年級學生Manyi，佢同Emily講，希望引起社會討論對不同學科嘅標籤，實驗片段噚日已公開，希望唔會影響餐廳嘅聲譽。