工作生活皆不順 香港青年最缺夢（東方功夫茶）

elbar

學周星馳話齋，做人冇夢想，同條鹹魚有咩分別？冇錯，做人唔止要有夢想，仲要有行動去圓夢，尤其係年輕人，更加應該對前途充滿希望。可惜吖，香港唔少後生仔對前景悲觀，冇夢想又冇行動，真係灰到爆o架。

一項由香港、上海、台灣及新加坡四地合作嘅調查顯示，香港年輕人喺四地之中最缺乏夢想及圓夢動力，對未來經濟發展感到樂觀嘅淨係得一成咁大把；至於未來可否成功翻身嘅信心咯喎，更係敬陪末席。另外，多達七成一香港年輕人最擔心未來樓價過高；其次係憂慮未能學以致用及人工低於預期，一句到尾，即係錢作怪。反觀上海及新加坡年輕人對前景最樂觀，台灣年輕人則最有夢想。

香港後生仔一諗起置業問題就頭痛，唔係無緣無故o架，呢，香港樓價連升十七個月，又創新高嘞，但人工加得雞碎咁多，點追吖。話時話，置業煩惱唔係香港獨有，另外三地嘅後生仔都有呢方面嘅壓力，不過心態就好唔同嘞，人哋充滿朝氣，對前途充滿希望，好似上海吖，經濟發展蓬勃，跨國企業紛紛進駐，年輕人有機會向上流動，憑努力可以改變命運，心情梗係靚啲；又好似新加坡，創新科技領先全亞洲，年輕人出路增加，點似得香港來來去去就係金融及地產兩味咁單調喎。


冇計喇，香港最大問題就係經濟發展欠缺新動力，年輕人出路狹窄，睇吓每年嘅文憑試狀元一窩蜂爭讀醫科咪知囉，做唔成專業人士咯喎，又冇本事炒樓炒股咯喎，想向上流動簡直難過登天，你話後生仔有乜法子唔悲觀吖。試諗吓，香港百物騰貴，就算有夢想創業都唔容易，淨係租金已經嚇死人，難為特首林鄭月娥輕描淡寫，話青年問題全世界都係一樣喎，弊在人哋有機會改變，有夢想可追，香港冇呢。


講到呢度，又諗起城中某富二代指摘年輕人一年去幾次日本旅行，所以買唔起樓，呢啲咪係典型嘅倒果為因囉。正所謂，有頭髮邊個想做瘌痢，如果去少幾次旅行真係買到樓，肯定冇人去旅行都似，但現實係買一個豆腐膶咁細嘅單位，都要唔飲唔食十八年先至達成，年輕人心灰意冷，今朝有酒今朝醉就係咁解。


今時唔同往日嘞，以前獅子山下嘅香港，連穿膠花嘅基層都有機會發達，家陣早就冇咗呢支歌仔唱，反而港人過去最睇唔起嘅內地就事事超前，愈做愈起，再次應驗風水輪流轉嘅道理。港府話就話協助年輕人置業，仲吹到天花龍鳳添，但如果經濟結構繼續死估估，向上流動階梯繼續阻塞，都係治標唔治本嘅咋。

elbar

華人年輕人調查　港最消極保守　港青擔心樓價高

由香港教育大學、內地《第一財經》、台灣《遠見》雜誌、新加坡《聯合早報》合作進行的「2017兩岸四地華人青年翻轉力大調查」發現，只有12.8%受訪香港年輕人對未來五年經濟發展感到樂觀，有71.1%的人最擔心未來10年會遇上樓價過高的問題，其次是在學校所學不足以應付工作所需，以及薪資過低不符預期。


為了解香港、台灣、上海、新加坡青年對現狀及未來期望之想法，「2017兩岸四地華人青年翻轉力大調查」針對這四個地方的18歲至35歲年輕人進行「夢想力」、「驅動力」、「執行力」、「翻轉力」評比。結果發現，香港年輕人不論在「夢想力」、「驅動力」、「執行力」、「翻轉力」都是四個地方之中最低的，依次分別只有59.2分、53分、54.9分、55.6分，全部得分均低於60分，這代表香港年輕人對於翻轉未來，明顯消極保守，而無論在「夢想力」、「驅動力」、「執行力」皆是華人圈中最冷感的。


只有12.8%受訪香港年輕人對未來五年經濟發展感到樂觀，但有33.1%受訪者認為經濟發展的好壞，對個人完成夢想或達成目標有影響。有71.1%的香港年輕人最擔心未來10年會項上樓價過高的問題，其次是在學校所學不足以應付工作所需（37.8%），以及薪資過低不符預期（36.1%），其他則是資金不足（29.2%）、國際視野不足（26.6%）、機械人時代來臨工作會被取代（11.9%）。


首選成為專業人士


至於10年後最希望自己能成為哪一種人時，有23.9%受訪的香港年輕人選擇專業人士，其次是18.9%的自由工作者，創業者/企業家有17.1%人選擇，至於領導團隊的管理者，以及有固定上下班時間的職員，則最少人選擇。


另外，香港年輕人認為，10年後能擁有一個美滿幸福的家庭（24.4%）是最有價值的目標，之後是找到喜愛的工作（21.6%），以及擁有自己的房子（18.4%），至於成為具有影響力的人；賺大錢；以及有自己的品牌、工作室、店舖或公司，則是最少人選擇。