芝大商學院來港（左丁山）

elbar

http://hk.apple.nextmedia.com/supplement/columnist/左丁山/art/20130720/18340838


第二屆文憑試放榜，自然係有人歡喜有人愁。七萬八千人考試，二萬餘人考到有大學入學資格，但達到最佳5科最佳成績共22分嘅，只有一萬二千人多啲，而八間公立大學學位有一萬四千五百個，扣除一啲學位預留俾non-Jupas（非聯招學生）之外，相信有一萬名成績唔錯嘅學生可以入到公立大學，其他人就入私立大學，副學士課程等等。

有人話大學學位太少（入唔到嘅學生與家長一定係咁講，立法會議員例牌係咁講），但亦有人話香港已經學位氾濫，打工人士擁有學位嘅比例已經太高嘞，香港唔需要咁多大學生，例如南華早報專欄作家Jak Van Der Kamp就引用一啲數字：1997時，香港就業人口中有學位嘅佔13至14%左右，到咗2013年呢個比例上升至26至28%，增加一倍，唔怪得咁多年青人話搵唔到好工，因為適合大學畢業生嘅工作職位增加得比較慢吖嗎，直接後果就係一啲畢業生開始時薪水低，最佳例子係筲箕灣東大街有食店請洗碗碟工人，開出月薪一萬二千元，但附近報館嘅大學畢業生做記者或編輯，月入低於一萬者，為數不算少！

紐約市長彭博叫年青人不要讀大學，學做水喉匠更加易搵到高薪工作，其中道理，香港人應該明白。月前搵一個水喉匠到屋企望吓水廁點解來水不止，佢望兩望，揭開水廁儲水箱睇一輪，再動手修理，前後不及半小時，就收咗左太友情價三百元，等於小記者做足一日。

在此時刻，芝加哥布斯商學院Chicago Booth School of Business捨棄新加坡，到香港開辦課程，得政府批出摩星嶺三級歷史建築物「白屋」（殖民時代政治囚犯監獄）為校舍，年租象徵式，芝大話會投資五億元改裝修72000平方呎校園，翻新，配置新電子教學器材等等，每年可收90名學生，每人平均有8年工作經驗，讀畢整個課程要一百二十萬元，學生每六個星期到校舍密集式上堂一星期，學費聽講話包埋來港食宿費。咁貴，有冇人讀呢？係一筆好大投資噃！行政副院長Kooser話學費多數係私人支付，有29%由公司俾錢，在港辦學，可以吸引多啲來自上海、北京、日本、南韓嘅高管就讀，主要競爭對手可能係科大／西北大學嘅EMBA課程，但Kooser話與西北大學在芝加哥競爭多年，大家知己知彼，鬥到嚟香港，驚都未驚過。至於畢業嘅EMBA是否保證有時薪600元，誰也說不定！


左丁山