李慧詩踩入教院讀學士

elbar

http://the-sun.on.cc/cnt/news/20130914/00408_007.html







「牛下女車神」李慧詩（Sarah）日前再度為港爭光，於剛結束嘅全運會單車女子凱林賽中摘冠，成為史上首位喺全運會上奪金嘅香港女運動員。呢一粒喺單車場上發光發亮嘅超級體壇新星，已獲香港教育學院（教院）垂青，與其他六位香港精英運動員，一同獲邀入讀該院嘅健康教育（榮譽）學士課程，嚟緊嘅十七日佢就會喺教院亮相，睇嚟，Sarah嘅下一目標除咗更多嘅金牌外，仲多咗一頂四方帽！

現年二十六歲嘅Sarah，自從喺去年倫敦奧運會單車賽中取得銅牌，已經嶄露頭角。佢今年再接再厲，喺世界場地單車錦標賽中勇奪金牌並披上彩虹戰衣，成為首位女世界冠軍，隨即聲名大噪，唔少港人都畀佢嘅堅毅精神感動。當然有名之後就有利，Sarah拍廣告收入豬籠入水。

據悉教院校長張仁良將於下周二喺校園與七位未來同學仔會面，除咗Sarah之外，仲有空手道精英鄭子文、張均樂、李嘉維、李佩琪以及乒乓球手吳穎嵐，而划艇精英駱坤海則要出外比賽缺席。

據講有關課程唔係太艱深，主要學習健康教育嘅專業知識，以協助向社會推廣健康生活教育，相信課程對Sarah日常單車練習影響不大。

金瑪姬

弓喜