天地畫室, 大家點睇?

carfoon

想問下大家覺得天地畫室如何呀?

我個女四歲, 剛剛報名天地畫室學兒童畫, 已經上左一堂了; 不過唔知點解, 我總覺得佢地好似好 hard sell 咁, 唔知大家有無類似情況呢?

話說之前報名時, 佢地個負責人已經不斷提議我唔好報兒童畫, 而叫我報佢地果個"塑膠彩"抽象畫班了.....咁其實我個女咁細, 我見佢平日好鍾意畫畫, 想俾佢去學下少少技巧, 玩下水彩顏色之類就算......
但第一堂入到課室,我見原來得佢&其他一,兩位小朋友係學兒童畫, 而其他十幾廿個人(年紀較大嘅姐姐)全都係學緊塑膠彩!! 個個都係用水畫嘅!

果刻覺得有D奇怪,有個老師就教下佢地幾個, 咁我個女都乖乖地跟住畫......好嘞, 我喺課室出面又碰到果位負責人, 佢又事提議我 join 塑膠彩抽象畫班, 話好玩d, 個個都有水玩......又話咩可以會考高分D, 專業D....... 我心諗個女得4歲, 幾時到會考呀?? 學畫畫都係想學下技巧先啫!個負責人又話我呢個係"舊思想", 言下之意即係技巧唔重要??

最後佢又再三提議我, 報完一期之後,轉報果個抽象畫班!
最好笑係佢地個單張寫明塑膠彩要5-7歲以上學嘅, 我問佢, 佢竟然話單張係舊嘅, 唔 update 喎!

當然啦, 抽象畫班每堂貴差不多一倍, 顏料都要成千蚊, 佢話"專業"d, 但我真係覺得, 小朋友唔駛用咁 "專業" 嘅顏料呢! 又唔係為左考試!!

請問有無人有類似經歷呀? 雖然我都知呢間畫室好出名, 而且佢地D學生真係畫得好靚, 但咁 hard sell.......
可能揀間小型少少嘅畫室會好d? 我依家都唔知繼唔繼續報落去好?

請大家俾少少意見我呀~ thanks!