大學富者愈富（左丁山）

elbar

八月中，賽馬會宣佈捐款十三億元港幣俾中文大學作興建中大醫療中心（CUHK Medical Centre）之用，左丁山以為以銀碼計，呢筆捐款好可能係2014年全球最大一筆向大學捐款。十三億元就肯定係香港教育史上最大一筆單項捐款。

點知道恒隆地產大股東家族仲大手筆。恒隆創辦人陳曾熙兩位公子陳樂宗、陳啟宗兄弟聞名世界，無人不識，陳啟宗係南加州大學校友，南加大校友會在香港及亞洲非常活躍，陳啟宗功不可沒。南加大校友多的是富家子弟，有錢學生多不勝數，但好似陳啟宗咁努力推廣南加大，為南加大到處宣揚嘅，就非常罕見。陳樂宗呢，就係哈佛校友，哈佛放射物理學博士，平日對地產發展興趣不甚濃厚，自己在1984年就成立一個直接投資基金Morningside Group（故此佢兩兄弟捐款一億俾中大成立一間新書院，就叫做Morningside College晨興書院），專門投資於生物科技，癌症研究及科技公司，多年來十分成功。陳啟宗搞恒隆賺大錢街知巷聞，陳樂宗嘅「晨興集團」悶聲發大財，香港就比較少人知。

今次陳樂宗捐款三億五千萬美元（相等於27億港元以上）俾哈佛大學公共衞生學院，一雷天下響，闊綽豪氣驚人，創哈佛378年來單一捐款紀錄，哈佛於是將公共衞生學院命名為Harvard T. H. Chan School of Public Health（哈佛陳曾熙公共衞生學院），成為哈佛第二間私人名稱學院，與Kennedy School of Government（甘迺迪政府學院）相輝映，以後在哈佛大學，陳曾熙與甘迺迪並稱。

大學愈出名，愈有錢，捐款愈容易。「穆迪投資者服務」曾做統計，2013年，208間美國私立大學之中，已有投資及現金儲備達十億美元以上嘅大學，佔去總大學捐款嘅67%，比2003年嘅62%還要高，「窮大學」（即係只有投資及現金一億美元或以下嘅）只係分得總捐款嘅3%，換句話講，大學籌款所得，十分貧富懸殊，正是貧者愈貧，富者愈富，一間大學不能因為自己某年籌款成績驕人就慢下來，否則就會向「下流」，好似哈佛咁，已經係世界最有錢嘅大學，但每年發動籌款，成績必然名列前茅，點會念及甚麼財富差距（wealth gap）吖！


左丁山

skkeung

這些人，賺香港人錢但捐錢外國，值得鼓勵嗎？

annie40

elbar

莫問出處

九月十六日本欄講及「大學富者愈富」，指陳啟宗陳樂宗兩兄弟樂於捐輸俾大學，捐完巨款俾哈佛，又捐二千五百萬美元俾南加大，名揚美國學界，香港大專教育亦受惠。左丁山知識淺，只知道陳啟宗對南加州大學非常熱心，對南加大校友活動，歷年出錢出力，熱心見南加大新生之家長，感動佢地捐錢俾南加大。

有一位讀者EX來電郵告知：「陳先生1967年入讀加州州立大學洛杉磯分校California State University, Los Angeles（CSULA），得生物學學士及碩士學位，後來在USC（南加大）得MBA。CSULA在2000年向他頒授傑出校友榮銜。」

CSULA與UCLA當然不同，加州嘅州立大學有兩大系統，其一係UC（University of California），下面有柏克萊、UCLA、UC Davis、UC San Diego等等分校，皆在US News and World Report之美國大學排名前五十名內，一般稱之為名校。而California State U（CSU）係二綫大學，算不上是名校，左丁山孤陋寡聞，竟不知道陳啟宗就是CSULA學生，不過英雄莫問出處，叻人在邊度讀書就無所謂，始終會一飛沖天嘅，譬如田氏兄弟，大佬田北俊係San Jose State碩士，細佬田北辰係哈佛MBA，你話邊個更叻仔呢？好難分得出啩。

得讀者EX提醒，左丁山上網查CSULA網頁，查到該校在1999年（不是2000年）頒發傑出校友榮銜俾在72及74年畢業嘅陳啟宗。陳先生說話素來率直，佢去完烏茲別克參加一論壇回港，講到明係參加咗一個二流論壇，捐錢要捐俾哈佛呢類一級大學先至可以產生長期成果，因為呢類大學生至有一流天才去好好運用捐款做研究，佢講得都啱嘅，如果一間大學嘅世界排名不斷下滑，意味影響力減少，咁就難以吸引到世界級人物嘅大筆捐款咯。大學一旦向「下流」未必容易翻身，大學校長及校董會有責任𥄫到實也！

名牌大學可以吸引到一流捐款、一流學者與超級學生，哈佛係其中之一。最近一宗誹謗官司透露，有學生入唔到哈佛而入咗史丹福，感到「心碎」，「夢想破滅」，你話哈佛幾巴閉吖。但入唔到哈佛，又未係咁大陣仗嘅事，左丁山最近見到林奮強「黃金五十」一個暑期工，醒目到極，呢位女孩子原來係女拔尖子，考SAT得2400分滿分，但哈佛拒收，結果入咗普林斯頓讀政治，都唔知讀得幾開心，早已忘記甚麼哈佛咯！


左丁山

nicemelody

原帖由 skkeung 於 14-09-17 發表
這些人，賺香港人錢但捐錢外國，值得鼓勵嗎？