創校者政治考慮原欲棄辦 港大文學院險難產

elbar

■校友陳方安生、導演張婉婷、羅啟銳前年同徐立之告別文學院百年大樓。

多年來孕育好多社會精英嘅香港大學文學院，創院超過一世紀，港大文學院出版一本「世紀刊物」，圖文記載由1912年創院至今嘅點點滴滴。文學院近日通知校友可供訂購，每本150蚊。書中透露港大文學院身世坎坷，創校者原來一度想放棄創辦文學院，擔心學院煽動異見聲音，可見殖民地時代，港英政府同樣想消弭反對聲音。


■1941年港大前教務長Stanley Boxer同學生喺馬鞍山參與戶外活動。

許仕仁謝安琪都讀過


港大文學院嘅校友星光熠熠，高官政務官一大籮唔使講，當中包括剛被判罪成嘅前政務司長許仕仁、著名導演許鞍華、張婉婷、歌手謝安琪、填詞人林夕及今屆學聯秘書長周永康等。

呢本記載文學院百年歷史嘅書，名為《Faculty of Arts100: A Century in Words and Images》，共有七章。第一章就講到港大文學院身世點樣悽慘，如何遭受白眼：「大學創辦者起初對成立文學院十分猶豫，擔心它會煽動異見聲音，在開課前的幾星期，文學院並沒有足夠的全職人員。」


■香港大學

書中透露，當年社會氣氛重理工輕人文，文學院地位向來都差過醫學院、工程學院，直至二次大戰後，文學院先開始受到重視，寥寥數句已經睇到當年要做文青真係唔容易。


呢本書刊載唔少舊相，其中一張係1941年，前港大教務長Stanley Boxer同大班學生喺馬鞍山一齊參與一個戶外活動，另一張唔少得嘅係2012年，校友兼前政務司司長陳方安生、導演張婉婷、羅啟銳一齊回校，同前校長徐立之告別文學院嘅百年大樓。


李八方