留英回港補習（左丁山）

elbar

香港考緊中學文憑試（DSE），一開始，已有甚麼「補習天王」大賣廣告，話貼中今年中文卷作文題目，真巴閉，睇嚟以後考DSE必定有類似馬經版貼士出現，中咗就大肆「燒炮仗」（即如果中咗，次日就以較大篇幅自吹自擂）。

補習係一門大生意，雖然香港補習社規模恐怕難與日本、南韓、台灣相比，總之有「亞洲價值」嘅地方，就有補習，乜都有得補，市場不知幾靈活。

前星期與總裁S飲茶傾閒偈，先知道佢曾經一時興起，俾錢老婆與名太C搞過補習社，在中環設立上堂地方，專替英童學校、國際學校學生補習，項目係考IB與GCSE A Level課程，開辦後一年，已有錢賺，但就因為生意太好，股東對如何經營及分配紅利，有「基本性分歧」，太太團互不相讓，最後竟然不歡而散，補習學校收檔。總裁S話一般人以為國際學校嘅功課冇咁緊，讀書壓力細過本地學校，其實係誤解，佢嘅千金就在山頂著名國際學校讀書，考IB試壓力不知幾大，咪一樣要有補習先生跟到實！咁又係噃，左丁山寫字樓樓下就有一間不知係公司或是補習社，有不少口操流利英語嘅外籍學生、本地學生出出入入，有時搭𨋢時聽見佢地講SAT、SAT Subject Test，應該係上補習課嘅學生啩。

香港學生最叻係考試，英國學生有所不及。幾個月前英國學校放假，就有兩位朋友家長搵左丁山搵「補習老師」，價格無拘，為回來渡假嘅兩位女學生補習，一位係大學生，有一科肥佬要補考，及格先至可以畢業，一位係立志要入牛劍嘅學生，立志要考幾條「火箭」入牛津。結果前者搵到一位中大碩士同佢惡補十小時（回英考試及格，開心到極），後者就由父母親戚介紹外籍老師操練，講到尾，英國GCSE高考程度低於香港以前嘅高考，在英國讀書返香港補習考GCSE A Level有競爭優勢。

考試成績好，就可以申請英美名校，有不少留英學生喜歡去美國讀大學，特別係哈耶史丹福普林斯頓之類，史丹福位於西岸，天氣好校園靚，附近嘅科技公司多到不可星數，更係Dream School，依家有好消息呀，逢係得到史丹福取錄嘅（5%機會），如家庭每年收入少於十二萬五千美元，可以免學費，少於六萬五千美元嘅，宿費都免埋，有錢仔女當然要交到十足，咁慷慨，只有美國一流私立大學先至有條件做得到！


左丁山

Unclejt

GCSE A Level...

Derdad

elbar

申請入學

昨日講起史丹福大學優惠中產階級，每年家庭收入低於十二萬五千美元嘅學生，可以免學費，當然，申請入讀史丹福，只有5%機會，入得嘅必定係考試、讀書尖子，如果佢地為咗經濟理由而入讀美國其他州立大學，攞獎學金一定十拿九穩，從呢個角度諗，史丹福提供學費優惠，係唔想流失一啲學生精英俾其他學校啫。我地香港人往往讀書求學校名氣，但美國人比較實際，往往要睇埋一個學位（degree）之「性價比」，所謂value for money，不一定盲目追求名氣嘅。


不過咁，在香港申請入讀史丹福，欲想提高入學機會，最好唔提申請獎助學金之類。名校通常要學生填表時選擇：（一）要，（二）不要財政援助（financial aid），如果填寫「要」，條隊就夠晒長咯，成績要加零一咁好先至有希望獲得取錄。過去幾年左丁山有幾位世姪女自史丹福畢業，佢地父母都係高薪專業人士，家庭收入超過十二萬五千美元，淨係睇女兒讀書在校及考SAT成績，係好有希望昂然進入史丹福嘅，但事前有彼邦人士俾貼士，如果填表時，講明不要financial aid，入學機會更加高啲，當然依計行事喇，因為排第二條隊（即不要財政援助）嘅學生人數會少啲吖嘛。


輔導學生申請入讀美國大學嘅，最初本是中學校長／老師嘅責任，但本地香港中學呢方面嘅（名校除外）經驗比較少，往往無意見俾到學生，令學生不懂竅門。隨住香港家庭愈益富裕（比起三十年前），輔導升學逐漸成為一門生意，如有窿路，近年更成為發達生意。窿路就係同內地有聯繫，有關係網啦，內地富裕家庭之多，超乎想像，而佢地對美國認識之淺，亦超乎想像，於是升學輔導成為一啲海歸派（特別係長春藤畢業生）之搵錢良方，收費往往要三至五萬美元一位，左丁山聽見，真係嘆息自己生長在香港溫室，以前不知道做升學輔導中介人都可以咁商業化。


現在已經係四月，美國各大學已經發出晒今年九月嘅入學通知，現在讀緊中五嘅學生就要預備暑假後申請美國大學嘞，考定托福，SAT當然係例行公事，還要寫定一份「入學目標書」（statement）（字數視乎大學要求），寫完一改再改，搵老師校長批改，指導，甚為必要。




左丁山