港青追波慢3個身位 與英國青少年測試

elbar

【明報專訊】賽馬會喺2013至2014年同英國曼聯球會合作，總共為537名13至17歲、來自賽馬會足球發展計劃或本地球會嘅青少年球員做體適能測試，當中參與2014年研究嘅有246人。今次研究與英國同年紀嘅球員相比，發現本港青少年球員做「20米衝刺」時慢0.5至0.9米，即係話如果喺球賽上兩隊碰頭，香港青少年球員追波嗰陣會慢兩三個身位。

「轉向跑」較去年慢 靈敏度減

馬會將95人嘅測試結果同2013年比較，發現16至17歲以下組別做「箭頭轉向跑」時慢過上年時間1%，反映靈敏度倒退。

循環訓練可增肌力速度

馬會最近揀咗3間中學共35名中學生接受「高強度循環訓練」，為期7周，每周兩次，每次15至20分鐘。呢套訓練好似韓國一套減肥熱身操，球員要做下蹲、單腳提臀、雙腳側跳等動作訓練肌肉，完成後發現除咗脂肪比例少咗4.5%，核心肌力同「箭頭轉向跑」速度比冇做呢套訓練嘅學生進步唔少。

研究員陳振坤同Emily講，英國青少年球員每周訓練4次，本港就因為戶外訓練場地唔夠而只得1.5次，體能自然唔夠外國人嚟，建議中學引入呢套高強度體能訓練。

伊利沙伯中學舊生會中學試行咗呢套訓練，球隊教練楊達武話可以幫球員操練好體能根基，加上𠵱家每周因為訂唔到康文署場地，得1次戶外訓練，所以計劃之後每周做3至4次呢套體能訓練當加操，「因為雨天操場都做得」。

letea

香港學生，學校每日比幾時間佢地運動呀!

goodenough

在國際運動場上已清楚顯示出西方人的體能的確比東方人佔優。單憑場地不足和訓練方法就可斷定本地同學的體能唔夠外國人黎，是否粗疏了一點。說穿了，還不過是推銷緊自己和他自己的訓練方法！