「自己香港自己研究」 教院開香港研究學院

elbar

【明報專訊】近排成功爭取可正名為大學嘅香港教育學院，最近成立咗「香港研究學院（The Academy of Hong Kong Studies）」，由專門研究香港社會現象嘅教院香港社會研究講座教授呂大樂擔任總監，曾出書《香港革新論》嘅教院亞洲及政策研究學系助理教授方志恒就出任常務副總監。方志恒噚日喺facebook公布學院「正式開張」，仲形容間學院係「全港首間專攻香港研究嘅大學研究所」，嚟緊會請研究員同埋大搞研討會。

方志恒喺facebook公布學院嘅臨時網站，仲叫大家廣傳，話「自己香港自己研究」，佢仲話學院遲吓會設立民調中心，又會請專注香港研究嘅研究員，之後會大搞以香港為主題嘅研討會同培訓課程。消息公布之後有唔少人關心，亦有網民問會唔會研究一下去殖民化等等問題，方志恒就話，一定會研究身分認同及中港關係，但具體題目仲要再商討。