青協搵張經緯拍電影 代90後講心底話

elbar

前日先攞完大紫荊勳章嘅立法會主席曾鈺成（右二）及嘉賓都有去睇青協嘅電影首映禮，仲即場欣賞大會安排嘅「香港敲擊」獻藝。

【明報專訊】專注年輕人服務嘅香港青年協會，原來都唔後生，已經成立咗55周年。為慶祝呢個日子，佢哋特別請嚟第29屆香港電影金像獎新晉導演張經緯，執導全新青年電影《少年滋味》，講述9個「90後」青少年嘅成長故事同心聲，希望透過鏡頭喚起公眾對青年更多嘅關心同愛護。

Emily噚日去咗睇首映，電影中9個人來自不同階層，有不同價值觀，佢哋喺偶然下相聚於香港體育館，同上萬名陌生人合唱貝多芬嘅《歡樂頌》，刷新咗健力士紀錄。而喺音樂會嘅餘韻中，9人分別講述關於校園、家庭、朋友甚至故鄉嘅故事，有笑有淚，呈現新生代對當下社會嘅所思所想。

青協總幹事王䓪鳴話呢套電影係特別獻給年輕一代，希望可以代佢哋講出藏喺心底嘅說話，非常有意義。不過，《少年滋味》嘅播放安排遲啲先有公布。