檢討教改（左丁山）

elbar

做過教育統籌委員會主席（1997-2001）嘅前財政司司長梁錦松，出席一個教育會議，否認當年提出母語教學建議，講培正中學用粵語教英文書，效果良好，但指粵語非全部香港人母語，用普通話教中文有助寫作喎。

報紙冇刊登梁錦松演講全文，唔知梁錦松說話之上文下理，難以認真評論，不過有女就讀幼兒班嘅小YY就話網上已有好多言論批評梁錦松「普教中」之說，連以前以梁錦松校友為榮嘅英華書院，亦有老師猛批，對梁校友幾唔客氣。

以普通話教中文，是否有助香港學生改進中文程度，左丁山一向有懷疑。前「語文教育及研究常務委員會」（語常會）主席田北辰就話語常會在2003年對此曾深入討論，結論係普教中只有助學生嘅普通話能力，但無助提升中文程度。咪係囉，梁錦松、許冠傑在英華讀書時係用粵語教中文嘅，佢地嘅中文老師陳耀南係著名中文老師，後來更入咗香港大學中文學院做講師、教授，名重一時，學中文與個人讀書態度有關，與用普通話教或粵語教冇乜關係。

梁錦松又話與戴希立校長、程介明教授再度攜手研究現時嘅教育政策，好事也。呢三位曾經被稱為教改三人組，係時候對佢地推動嘅教改提出修正意見嘞。

教改之最大改動當然係三三四學制與大改中學修科結構，推出四科必修及其他選修科，推行十年之後，已見毛病出現，大學理科及工程學院怨聲載道，目前各中學為咗DSE成績，限制學生只准修讀8科或7科，甚至只係6科，於是啲理科生變成天殘地缺，物化生三科未必讀齊，有必修科數學（程度較淺），就冇讀延伸數學，於是入到大學，讀商科醫科就未必有問題，但入咗理學院與工程學院啲學生就令教授頭大，一啲學生唔識微積分、一啲工程生唔熟物理，點教呀？上星期左丁山遇到徐立之，傾咗一輪。徐大教授正全力全面推動香港科學院，佢認為香港有不少土產或外來在本地生根嘅科學家都係「硬嘢」，在世界上任何科學院都可以做院士，但佢好擔心現時大學理工學院嘅收生及新生水平，話大學極度重視在三三四學制下，理科中學生修讀科目不足嘅問題。徐立之出身巴記（現何文田官中），自然贊成三三四學制，但對課程結構受到大改動，對學生晉升大學不利，甚為關切，話一定要研究研究，找出改善方法喎。


左丁山

ANChan59

幾日前在其他帖的回應！

==========

十年母語教學，證明無效。


十年普教中，未能證明有效。

好快又十年334，退步效果明顯。

.......

好快五十年衰退期過去！