急!囝囝門牙鬆了,是否要睇牙醫?!

小妮子

今日先發覺囝囝門牙鬆了(下面兩隻),囝囝9月就6歲,我知道係換牙,但係囝囝話有D痛,咁使唔使同佢睇牙醫呀?咁牙醫係咪會同佢剝牙o架,我囝囝好驚剝牙,會唔會有麻醉o架?!希望有經驗o既媽咪能夠幫到我啦!唔該!唔該!     

metoo

如果乳齒已很鬆，你可以嘗試幫佢拔。
但如果不成功或不敢，你便要到牙醫處了，
要不要打針，就要視乎乳齒的鬆度。
我家附近的私家牙科要收150大元一隻。
政府的較平，但要排籌。   

小妮子

metoo,多謝你o既回應,但係我囝囝好驚睇牙醫,我驚佢唔係坐定定,好似今晚咁,佢以經係度喊哂啦!睇到都心痛呀!

kelly_soso

題外話：我想請問下如果乳齒掉了大約要幾耐才會有新牙出，因為我女女乳齒掉了差不多有兩個月了，還未見有新牙出，令我好擔心佢唔知係咪缺少鈣質？

metoo

我唸你要同佢講吓數，威迫 利誘 都要喇。
我個仔細時都係咁，唔見錢不在話，又氹又買玩具，
重要3個人禁住佢。     
    
或者你打聽吓附近有冇愛心多啲嘅醫生。
       

metoo

kelly_soso:

呢点我又唔係好清楚？你個小朋友幾大呀？

fannyyeung

小妮子 寫道:
今日先發覺囝囝門牙鬆了(下面兩隻),囝囝9月就6歲,我知道係換牙,但係囝囝話有D痛,咁使唔使同佢睇牙醫呀?咁牙醫係咪會同佢剝牙o架,我囝囝好驚剝牙,會唔會有麻醉o架?!希望有經驗o既媽咪能夠幫到我啦!唔該!唔該!     

小妮子 ,
你囝囝門牙做乜鬆左呀? 係咪撞親 ? 定係有新牙仔呀? 我囡囡都係6歲個時去過牙醫度分別剝牙2次(係下面側邊2隻), 原因係有新牙仔長出來, 因為我驚舊牙不去新牙出得唔好; 有無打針就唔知, 但好快就攪掂, 見呀囡又好表現唔係好痛咁,只係出左d血食枝雪條就無乜事(*係醫生叫比佢食既*)
我覺得千萬唔好自己用手常試去剝呀, 有咩出錯害左個小朋友。

twokidsmum

係呀, 牙醫話佢哋係用儀器"向上"將乳牙取出來, 家長的方法是"向外", 不小心的話會將已委縮的乳牙牙根弄斷留在牙肉內, 影響下面的恒齒, 所以是兩回事.  

但牙醫說不定要找他, 除非妳發覺下面的恒齒己長出, 上面的乳牙仍未掉出來才需要看牙醫.

我自己的女兒才四歲, 自己未有這方面的經驗, 所以先學一下. :

twokidsmum

fannyyeung 寫道:

你囝囝門牙做乜鬆左呀? 係咪撞親 ? 定係有新牙仔呀? 我囡囡都係6歲個時去過牙醫度分別剝牙2次(係下面側邊2隻), 原因係有新牙仔長出來, 因為我驚舊牙不去新牙出得唔好; 有無打針就唔知, 但好快就攪掂, 見呀囡又好表現唔係好痛咁,只係出左d血食枝雪條就無乜事(*係醫生叫比佢食既*)
我覺得千萬唔好自己用手常試去剝呀, 有咩出錯害左個小朋友。

bee

any one with good dentist for kids in Kowloon East or TKO, 要有愛心，細心及有耐性, tks !

kelly_soso

metoo 寫道:
kelly_soso:

呢点我又唔係好清楚？你個小朋友幾大呀？

七歲幾就快八歲了。

tlwtlw888

囝囝上兩個月下面右邊的門牙位牙隙愈來愈大，後來才發現後面有一隻恆齒長了少少出來，而門牙亦很鬆。問過同事朋友後有兩派說法，一是等乳齒自行脫落，二是交牙醫處理。最後都是帶囝囝去見牙醫，牙醫說如不把乳齒脫出來後面的恆齒便會不夠位長出，故必須要脫。

囝囝之前都是很驚，但在我再三向他解釋如不脫牙會導致什麼後果，例如牙齒會變得不整齊不美觀，以及我自己兒時的經驗，有一次吃香口膠企圖脫去已鬆的下門牙，雖然成功了，但過程是令門牙在牙肉裏抽放了幾吓，痛得眼淚直標。

牙醫並不允許我參與囝囝的剝牙過程，只好在外面等候。囝囝總算勇敢，在裏面沒有掙扎和哭喊，不過姑娘拖著他的手出來時就見他一副很委屈的樣子。囝囝之後對我說出整個剝牙過程，他說牙醫首先叫他張開口、在牙裏噴了一些東西、然後便用工具把牙剝出、再叫他咬著綿花出來，就係咁簡單。在剝牙後兩三小時，便見到原本在後面的恆齒很快地長高了幾 mm 呢！

早幾天又發現囝囝的下左門牙有一點鬆脫（次序就似乎是按他六個月 BB 時出乳齒的先後，先出的先脫落），後面又好像長出新牙，我說又要帶他去見牙醫，他今次十分爽快便答應了我！

metoo

kelly_soso:
如果小朋友已上小學，又參加了牙科保健，
你便可打電話去問下，看看用不用去檢查？
如果去牙科保健會比政府門診平，
又可以預約。
    

小妮子

囝囝下個月就滿6歲,今日都有同佢去左睇牙醫,搞左成9個字,小朋友好驚呀,又喊又掙扎,搞到我同老公都"mum"晒,又話同佢去食肯德記,又話同佢冒險樂園,再加上個醫生都幾好,好有耐性咁等小朋友習慣,又慢慢咁同囝囝解釋,囝囝係出新牙仔,不過佢係一次過有兩隻門牙鬆左,一隻鬆D,一隻冇咁鬆,不過諗住同得佢睇牙醫,不如一次過剝晒佢,不過要落麻醉,打麻醉針時,囝囝喊得最大聲 ,令到我好心痛,唔知點樣可以幫到囝囝,唯有一路咁安慰佢,最後囝囝剝完牙,不知鬼咁精神,仲叫自己係崩牙仔添!