強迫阿仔開口講野

littlelittlebe

想下想下, 真係好擔心!我仔衣家21個月, 只係講到"媽媽""波波""要"的單字, 加上行為又有問題(去公園見到其他小朋友會咬人), 咁經醫生寫信已經轉介CAC(20個月開始排), 見左第一次姑娘, 仲要多等半年先見醫生再做全面評估。早幾個星期經這裡的JM介紹, 我搵左個私人言語治療師(A姑娘)想睇下可以點幫下阿仔, 但A姑娘用的手法都幾強硬, 一路玩玩具一路迫阿仔遘個"擺"字, 我仔又驚又大哭, 哭足全程30分鐘的治療, A姑娘話係要咁做, 唔想浪費時間慢慢TUM小朋友! 做媽媽的我坐係隔離真係好心酸, 係咪真係要用D咁硬的方法去迫小朋友講野??!!咁樣會唔會令小朋友更害怕說話???~ 請問有無媽媽可以分享下? 係咪頭幾次做治療都係咁, 慢慢就無野.......
我身邊又無人同我分享, 爸爸又成日覺得阿仔無事, 大大下就識講野.......

monkeydiary

如果我係你，我一定唔會再俾佢跟A姑娘上堂，因為好明顯你個仔唔接受佢個套。我自己經驗係要氹小朋友講野，例如你想佢講個"奶奶"，你可以攞住樽奶，再攞係自己眼睛附近，同佢講"奶奶"，頭幾次只要佢出聲，無論似唔似，都要讚佢，慢慢佢就越講越好，而且我認為迫小朋友，只會令佢反感，唔肯同你合作，又點學到野呢？
介唔介意pm間機構的名稱和姑娘的名稱給我?因為我都同女女揾緊訓練。

MamaQQB

仔仔只有21个月，我觉得不用急。我的也是这样，完全明白大人说什么，但自己不想说。但是她一过两岁生日就开此说话。一说话很快就是说句子了，现在比同龄说得更多。

carol0302

你個囝囝21個月識講爸爸,波波呢D單字, 都已經搵左言語治療師,
我個囡又係21個月大, 都只識講爸爸, 我係咪都要開始做評估同搵治療師呢...
會唔會係我心急, 因為周邊既朋友, 同事, 屋企人都話遲D就識, 唔洗擔心

muimui5

過來人經驗，好細又未太會同人玩的小朋友適宜先上幼兒導師訓練，都習慣了一對一以遊戲互動，有眼神接觸才開始上言語治療。因為前者的basic training比較着重保持兒童情緒穩定，引起互動同應付行為問題，收費又較後者經濟，可以為兒童學習溝通上做了「鬆土」先。

MamaQQB

回復 carol0302 的帖子

我觉得真的不用担心。我的女儿就是一个好的例子。

haizitama

回復 carol0302 的帖子

我女女都係啊，21個月大，會講爸爸，媽媽，媽咪，，this。。。
   其他就唔識啦。不過她聽得明白我講野。
  一句話。。。。擔心。。。我都穩評估師咯。。看下評估下會不會好些。。。

ChattyST

每位言語治療師的手法都不相同. 我自己對年幼的孩子的做法是, 著重教爸媽引導技巧, 爸媽學會了技巧, 便可以隔一段時間再來覆檢孩子進度.

sochi81

我自己覺得要佢講同迫佢講分別係語氣同態度。我仔唔肯講我要佢講。佢有時都會喊。但我都由佢喊一陣先俾。因為佢唔講都有就無動機開口。但一定唔好鬧，發到類似聲音要即俾同讚。個人做法供參考。如果我今日令佢喊係對佢將來發展有益，有時恨心係需要。但話說回頭，哩個姑娘態度如何？如一開始同小朋友建立唔到關係就要考慮下。或試多個治療師比較下

littlelittlebe

回復 sochi81 的帖子

我仔最鐘意食野, 衣家要佢開金口只能用食物, 但佢只講媽媽, 點都講唔到包包/餅餅。佢知我想佢講, 但叫多兩叫, 阿仔就大喊。我都已經多鼓勵, 但進展仲係好慢.

sochi81

會否考慮做私人評估。貴但快些。我細仔剛檢查是自閉症，說話慢只是表徵。不過言語障礙成因很多，未必自閉，評估左再對症下藥。加油。你仔仲細，如果只係唔講但同你有眼神接觸交流，明白你指令，有反應，唔擔心。我大仔25個月先識講野，而家三歲半不停口。相反佢少望人，表現比較冷漠，你就留意下。

chengemily

回復 littlelittlebe 的帖子

我阿仔都係21個月, 但就咩都唔肯講...樣樣都明, 但要佢開口就難過登天, 只係偶然會無意識叫"dad dad, mum mum, mui mui(屋企隻狗), 姐姐..."媽媽"就點都唔叫)
之前有打去私人的言聽中心查詢過, 個治療師叫我唔使擔心, 睇多幾個月等到兩歲先, 佢再唔肯講先同佢做評估都未遲, 因為佢話阿仔唔講野可能同佢的固執性格有關, 而家可以做的就係成日同佢傾計+多d身體語言引導佢講野...其實近排我覺得阿仔開始有D進步, 需然仲未識講野, 但就多左出聲同埋會駁嘴(不過唔知佢講咩)...