04年9月入讀小一家長請進！

麟媽媽

我個仔星期三先第一次上美勞課，老師叫帶墊枱紙，吩咐不要用膠枱布(食飯用個種)，因為好長好容易有人行過時一拉便將所有野都拉晒落地！佢叫我地用報紙，但我覺得dirty，而家諗住用明報週刊中間內頁做墊枱紙，size啱啱好，用完如果烏糟左可以掉左去。你地小朋友要用美勞袋嗎？我仔學校要有的，睇見就慘，書包已好重，仲有一斜揹袋放食物盒及水樽(校方指定要用)，美勞個袋又大到不得了，可平放入一張大畫紙的！我仔拿住個美勞袋拖晒地咁滯…
今日亞仔第一次上電腦堂，頭先跟我說：「媽咪今日上電腦堂，老師教我地點開電腦，之後點可以上網，其實我地個個都識喇~~使咩學喎！我同學話合埋眼都識….」唉！而家D細蚊仔真係招積…..

Astrid

麟媽媽,

我女學校有儲物櫃, 可以張個美勞袋放係學校, 唔使個個星期都要拎出拎入 ....... 因為, 真係人仔細細, 顧得頭就唔顧得髻    

joey1010

我想問一問妳們今天小朋友第一次在校吃飯，情況如何?

我囡囡今天順利過渡。   

joey1010

MingMing626

我也有填小朋友因支氣管炎入院，但老師沒有要我交病歷表。

Xanthe

me too!! 安落哂！

joey1010 寫道:
我想問一問妳們今天小朋友第一次在校吃飯，情況如何?

我囡囡今天順利過渡。   

麟媽媽

你地D小朋友自己照顧到食飯又真係放心晒了。我仔間學校是分上、下午校的，唔使係學校食飯但好早上堂，7:25am上堂，12:20pm已放學。呢兩日好頭痛，因太早上校車，亞仔6:00am便要起床。琴日同今朝佢都喊，話好眼訓，唔肯換衫，又喊晒唔比工人開燈，話睇唔到野….攪一大輪先收聲，兩朝都成屋人嘈醒晒，四個大人一齊服侍佢…我琴晚未到9:00pm已放佢上床，都訓左9個鐘喇，我都唔知點好？

Astrid

第一日係學校食飯就無問題 .....

今日第二日就出事啦 ..... 佢唔記得拎個餐袋返黎 ...... 因為淨係掛住拎老師俾佢個條 "值日生" 帶       :evil:  :evil:  :evil:

麟媽媽

我仔咪又係，第2日已唔見左本”牙牙語”，係一本每日都要帶的祈禱小冊子。本來我寫了小字條給老師睇下搵唔搵到，原來留左係校車！佢竟然係校車教其他小朋友唱詩歌，因佢有去教堂咪識唱，仲學人教人添，跌埋本書佢都未知呀！！

肥仔媽咪

你地D小朋友自己照顧到食飯又真係放心晒了。我仔間學校是分上、下午校的，唔使係學校食飯但好早上堂，7:25am上堂，12:20pm已放學。呢兩日好頭痛，因太早上校車，亞仔6:00am便要起床。琴日同今朝佢都喊，話好眼訓，唔肯換衫，又喊晒唔比工人開燈，話睇唔到野….攪一大輪先收聲，兩朝都成屋人嘈醒晒，四個大人一齊服侍佢…我琴晚未到9:00pm已放佢上床，都訓左9個鐘喇，我都唔知點好？

麟媽媽,

我個仔都係返半日而佢地學校規定小一返下午小二返上午, 起初我都唔係好鍾意因覺得時間唔好用, 但現在發覺咁嘅安排都幾好, 至少唔洗憂心佢因唔想返學而搞到大家一早都唔開心. 我相信你多點跟仔仔傾試試他是否除了因瞓唔夠或其他原因, 我覺得雖然到目前我仔仔都未有話唔想返學但唔多唔少也感到有壓力, 我仔仔昨天亦因聽唔到老師的說話而回來後有點悶悶不樂, 小一新生的媽咪這段日子真要多留意和多傾談.

carollam310

我個女都係讀半日制下午班呀,D時間唔好,11點幾上車,放學返來成7點,今個星期六要返早添,6點幾要上車,我都有D擔心大小姐會發脾氣,

麟媽媽

肥仔媽咪，
我都有問下個仔的，都怕佢有壓力，但見佢都幾開心，琴日佢仲同工人講好開心因只得男仔無女仔，因女仔好麻煩！之後我笑住同工人講:”I am sure he’ll be sorry when he’s old enough…”哈哈！！

Carollam310,
咿呀….返開下午班長週要佢咁早起，實喊扭計喇~~ 睇怕禮拜尾都要佢習慣下早D起身先得囉！

肥仔媽咪

麟媽媽,

咁就好囉, 因我曾有朋友個仔都是上了幾個月才表露出來, 總之多些跟他們溝通是很重要的, 尤其是男仔, 若然不引導佢他講好多時佢他都唔識講而放在心裡.


Carollam310,

我個仔今個星期六都是長週, 唔知到時又係起唔到身呢?

麟媽媽

其實開學第2日我已跟班主任傾過電話，她跟我說亞仔多口呢！我同老公都有點擔心，以前幼稚園因有外籍班主任，D小朋友慣左鐘意便開口回應！老師都說慢慢來。
前日個仔同我講老師讚他進步了，佢都幾開心。琴晚佢同我講班主任叫他做副班長，我表現出有點奇怪！之後亞仔即說老師話比佢試下咋！我便同個仔講要乖D喇，更加要唔好傾咁多計，做班長要做好榜樣，班長都唔乖其他同學仔都一齊唔乖，到時老師唔比你做架喇~~到今早佢起身初時都有賴床，之後我叫他：「副班長想遲到？！」佢便乖乖的起身洗面了。
我跟老公說副班長的事，老公第一句便說：「乜真係曳到咁呀！？老師多數搵曳的做副班長，等細路仔自覺有責任做好D。」我都信我老公講的是事實，不過老師咁做不失為一個好辦法呢！我會繼續鼓勵個仔的。

Astrid

今日又拎多把傘 ..... 都唔知會唔會又漏低係學校

evelyn317

請問各位媽咪畫畫應該用邊種桌墊，我係Ikea買了兩款，一款係膠，另一款係布，本來打算食飯用。點知訂飯有桌墊跟。膠個款唔係正方形，我估畫畫唔o岩用。我見有媽咪話花園街有得買，但我係香港區返工，我估放工去到都收檔。請問有無其它提議？我都唔明點解學校又唔早講！

謝謝。

麟媽媽

evelyn,

我仔間學校只是美勞堂先用墊枱紙的。學校叫我地唔好用膠墊，可以用報紙。我怕報紙烏糟，所以用明報週刊中間內頁，環保D啊。
我見過在日本城有些一卷剪開黎賣的膠枱布，比較軟身可以摺埋，你可剪成啱書枱的尺寸，得唔得呢？

Astrid,

今早無喇喇落雨，今日已多野，又書包、又美勞袋、又斜揹袋仲加多把遮....我都怕會留低。
其實用遮定雨衣好呢？因如果雨衣好濕，返到學校唔知點攪，上校車又使唔使除？落車又要著番，我怕佢攪唔掂。

Monita

Hi! Fungbaba,

My daugter is studying in 1C and I read other topic and know that your son is studying in 1E.  Monitor and Monitress in her class has been selected on last Friday, but teacher mentions additional monitor/monitress may be selected according to the needs and situation in the class. (My friend told me there were 4 monitor and monitress in a class previously)

I'm delighted that most teachers would speak English with the students and they do request students to reply and speak English with them.  Of course, this is an English Primary School.  Fungbaba, don't worry, children can able to adapt to the new environment very quickly.  Just give him some time and I'm sure your son would have no problem on speaking English........He is a smart boy!        

Astrid

麟媽,

我都買左件雨褸俾阿大 ..... 不過, 好似你咁講. 如果坐校車, 真係唔知會唔會成身濕哂 ...... 我諗諗下又想俾把縮骨傘佢放係學校個儲物櫃 ..... 但又唔知佢識唔識開 & 收 ..... 真係好煩    

麟媽媽

死囉！出面好大雨啊！！仲有10分鐘放學，亞仔要上條鈄路仔先上到校車，大劑....

Cheung

各位媽咪:

我今早送個囡囡返學果陳大急忘記帶庶,一出站再就傾盆大雨,好狼狽 :evil: . 好彩遇到一個好好心的媽咪庶埋我個囡囡 : 如唔系都唔知點搞.