由停課到提早暑假，疫情下嘅學生哥日子真係唔易過，唔好話影響學業，就連興趣班都一樣無得上，當然你會話有咩重要得過健康，之但係成日流流長留家抗疫又應該點樣過？對於呢個問題，真係令唔少父母都相當頭痛，想小朋友可以從小培養個人興趣，又唔係樣樣自己都識教，咁視像上堂又行唔行得通？

另一方面，唔少興趣班同外補中心因爲疫情關係，都要作出唔同嘅應變措施，事出突然計劃趕不上變化，各種唔同嘅措施加上營運壓力，又係咪可以完全保障到已經報名嘅家長同佢哋嘅小朋友呢？

最近家長們都紛紛討論緊呢個咁特別嘅暑假應該點樣幫子女安排先係最好，外補中心都向視像教學形式入手，但視像教學又係咪真係學到嘢？如果已經為仔女報名嘅你，比你自己揀你寧願退錢定係繼續Zoom?

「依家除咗唔補之外，都無得揀。」

「有上Zoom英文堂，我覺得都ok，有件事比佢做吓，好過整日玩。」

「太細唔建議用zoom，成效唔太高；11、12歲以上會好啲，理解能力同集中能力都稍好，先比較學到嘢。」

「退而求其次⋯⋯個人覺得應該冇咁快會外出上堂，自己又教唔到，比佢上zoom學下野，感覺上唔係hea足全個暑假！」

討論區熱話：小朋友每日留在家有咩搞作？
討論區熱話：其實多唔多人zoom學嘢？

討論區熱話：小朋友每日留在家有咩搞作？
討論區熱話：其實多唔多人zoom學嘢？

綜合家長們嘅經驗同討論，鯊魚太覺得大家喺決定係咪幫仔女報讀視像課程嘅時候，都可以試著從以下幾點作出分析：

1. 小朋友年齡及性格

視像教學比真人版教學更需要專注力，若然小朋友年齡較細，加上專注力麻麻，或者就要從選擇上咩興趣班著手，純粹比佢放下電，唔好過於期望佢學一個暑假就變成音樂奇才、跳舞高手、藝術家等等...

而對於較為內斂嘅小朋友，視像教學可能會令佢哋較容易接受，始終喺自己屋企多咗份安全感，令佢哋更勇於去嘗試，至於向來心野嘅小朋友就會變成引誘處處！

2. 課程類型

以上提到年齡同性格可能影響家長應該為仔女揀啲咩類型嘅外補、興趣班；首先家長應該要釐清自己為咩幫仔女報讀呢啲課程，係協助課程需要？純粹放電？定培養興趣？

若然需要作出課程協助，相信小朋友都相對比較大個，而且部分課程內容，可能連家長自己都無十足把握幫到佢哋，所以需要外補；講到興趣班，唔同類型嘅「興趣」都需要唔同嘅配合，家長應該要考慮到該興趣係咪好需要肢體指導，去分折視像教學係咪真係應用到，好似話學毛筆書法，手勢揸筆都好重要，係咪從語言上就可以完全矯正到呢？

3. 家中學習環境

即使係輕輕鬆鬆嘅手工班，一個較為寧靜嘅學習環境，對小朋友嚟講絕對有影響，興趣班除咗學習興趣之外，守規則、聽從老師指令都係相當重要；如果生於多人家庭，呢邊小朋友上緊堂，嗰邊屋企人又追緊劇，那邊細佬妹仲玩緊玩具笑到哈哈聲，比著你都專心唔到啦！

呢種咁奔放又多元化嘅學習狀況，最怕就係發生喺年齡較細嘅小朋友身上，萬一習慣咗以為學習係咁放任式就多多時間都調教唔返！