今日Juicy媽唔食花生，講講小朋友嘅語言教育。

最近唔同社交媒體都講緊「廣東話係咪母語」呢個話題，其實呢個問題真係有需要問咩？究竟香港發生咩事？（師奶仔都忍唔住出聲）

之後又喺Forum見到，某小學工作紙出現簡體字。有啲人問，係咪連中文都要用簡體字學喇？好多網民都唔希望咁，因為冇「心」嘅「爱」的確令人唏噓。但都有人認為世上用緊簡體字嘅人比用繁體字嘅人多，轉學簡體又唔係咩問題。

 

其實簡體字呢樣嘢，我自己考公開試時都用過，少啲筆劃係寫得快好多。不過既然有繁體，點解唔學好正體先，之後鐘意寫／睇簡體字都唔係問題，好快上手。古文用繁體字嚟寫，冇理由用簡體去解讀。好似「后／後」同「隻／只」明顯係唔同嘅字，但喺簡體就冇分別喇！

 

不過，後尾有人話應該都係老師打錯字啫，冇話推行簡體字教育，家長唔使咁敏感。都係嘅，呢樣嘢應該唔會咁易發生。

 

講開又講，普教中算係而家嘅大趨勢，咁我覺得掌握普通話係好事。不過普通話同廣東話嘅用字都幾唔同，好似我哋會講「番茄」而唔係「西紅柿」。如果個仔連茶餐廳餐牌都睇唔明，我會懷疑佢係唔係香港人囉。

 

就算係唔係普教中都好，我發覺廣東話喺香港地位都係唔高。唔少父母會用英文同小朋友溝通，有工人姐姐嘅就更加唔使講。兩文三語的確係香港人嘅優勢，粵普英都識聽識講真係幾犀利架！但係廣東話變得愈嚟愈唔重要，學好邊一種語言都似乎比廣東話重要。

 

我覺得喺香港呢個語境，都係廣東話為主。更何況父母都係土生土長嘅香港人的話，日常生活用英文／普通話就夾硬嚟咗啲囉。我覺得用最表達到自己嘅語言去傾計係一件珍貴嘅事，好難放棄。英文同普通話叻，小朋友將來就肯定會有優勢嘅。不過叫我為咗仔仔普通話同英文進步得快啲，唔同佢哋講廣東話，我諗我會發癲！

 

親子溝通同語言優勢，我一定揀前者。

 

（利申：師奶仔抒發己見，唔啱聽都和平討論喇吓。）

 

即刻入討論區一齊傾