疫情爆發第四波，之前幼稚園同初小已經因為上呼吸道感染及疫情情況再度暫停面授，同時亦有唔少高小局部改為網上上學，以保障學生安全；其實疫情斷斷續續都差不多維持咗成年，正當大家都以為無論小朋友同大人對「防疫」都有一定程度嘅意識嘅時候，早幾日竟然就有JM發現有幼教導師喺個人社交平台分享大量同學生「除罩自拍照」惹來家長關注！
相關嘅「除罩自拍照」，師生都以特色打扮示人，估計係萬聖節期間所拍，對於呢位幼教導師嘅做法，普遍網友都認為係相當不合適，一來欠奉防疫意識，二來將學生嘅樣放上個人社交平台做法亦好有問題，而根據JM分享呢位幼教導師，都唔係第一次將學生合影或者影片分享至個人社交平台。
討論區熱話：好嬲！接唔接受到老師叫小朋友除口罩面貼面自拍？
討論區熱話：好嬲！接唔接受到老師叫小朋友除口罩面貼面自拍？
Juicy媽睇咗呢個post幾日，事情好似依然係沒完沒了，發酵至今有人認為JM將事件放上網某程度都係一種警惕，但亦都有人覺得私下處理比較好，依家變成網絡公審，對呢位幼教導師造成一定程度嘅壓力...
另一方面，有自稱同校家長話（節錄）：「件事已（經）嘈上教育局，而且後來已有定案，老師已向班上家長道歉同自願離職，但一直覺得依個老師好好，雖然做得真係錯，但都想學校比（畀）次機會佢改過，仲有家長幫老師寫求情信。」不過出post嘅呢位JM就話：「至於學校，由此至終只覆過我一至兩次email，將解釋責任完全推卸比老師，之後無再就追問作任何回覆。校方連記者都無回覆到！」
誰是誰非Juicy媽覺得就只有親歷事件嘅當事人先知，不過作為父母將小朋友交畀學校，希望佢哋得到一個健康又快樂嘅學習環境，相信就係每位家長都認同；至於係「公審」定發聲，其實網絡世界係公平，你匿名時我匿名，以往都有唔少「公審」被反吞，反正公道自在人心，道德高地有時候真係唔易企。
