過來人分享:有關求位信(字多,慎入)

wwchuifamily

先利申:我家小朋友PN係waiting求位入,家母以前做過幼兒學校同中學職員
我見到好多人問關於求位信,亦有人PM我所以出個post,大家有興趣就參考交流.但寫唔寫點樣寫係好個人嘅,唔係咩都要做/跟.其他人有成功例子歡迎分享鼓勵下所有爸爸媽媽~

咩情況寫求位信?
求位信係俾你真係好心儀嘅學校,唔係大包圍間間寄,就同EK家長成日叫人唔好間間hold哂啲位一樣.想像學校因為你封信考慮返你個申請,到時call到你你turn down,自己誠意同誠信打哂折扣.你可以話反正到時唔要offer都對我冇影響,但難保你PN唔讀K想讀,阿哥唔讀細妹想讀...同時都考慮吓其他真係好想入讀嘅家長心情.
- 自問in得唔差而on waiting嘅會大機會被call中,寫封信去等學校確認你真心想讀,可能會優先call你.
- 未出offer其實寫有啲尷尬,行政書記好難未派offer前處理你嘅信.
- Reject嘅話,你諗清楚小朋友係咪真係適合入讀,好多時學校見到小朋友程度、性格甚至家長表現而唔收,所以reject真係求到都未必係好事.
最後,好多人唔洗寫信都有offer,可能因為學校競爭唔係好大、多班等等因素.

寫幾多封?幾時俾?
無規定幾多封,更重要係重質不重量,如果你講嚟講去三幅被就寄多封校長都嫌你煩.
通常收生有幾個milestones:
- 出offer後有學校會要求希望on waiting嘅家長reply,可能考慮同時send埋信,學校一拆就知你係想讀,而唔係係唔係都reply住先
- 交留位費之後學校會知有咩人放offer,有啲都call下waiting(但有學校係等埋5/6月交大訂先一次過call),如果學校冇要求on waiting小朋友寄reply slip,咁家長就嘗試交留位費前send信
- 通常waiting位係5-7月call,因為到時大部份學校都要交學費、校車、雜費等,大家揀定左啲位就浮返哂出嚟.所以如果真係好想讀就試下5月頭/中寫多封
(而我呢...仲有寄賀年卡俾學校添...)

俾邊個?點俾?
正常抬頭寫校長已足夠(自己check吓校長姓乜名乜啦).如果細校返學放學時間校長會去門口hello/ bye bye小朋友嘅你或者可以試吓親手交,大校(尤其龍校)冇乜可能見到校長就交去學校或者寄啦.個人覺得郵寄其實無所謂,正常學校會明白好多雙職父母唔可能下下親自交.

寫乜?中定英文?手寫定打字?
其實真係寫乜都得,基本要多謝學校俾面試機會,最重要係表達到你好想入讀嘅原因(直接啲可以講你對小朋友教育嘅期望,或者你認識學校比較多就可以解釋下你認同同點配合學校辦學理念).雖然好common sense,但信入面記得一定要有小朋友全名、申請編號同家長聯絡方法,人地都要知係邊個俾信嘛...
如果會寄多過一封,之後嘅信可以update下學校小朋友嘅發展情況,或者你搵機會去學校望下,之後話俾學校知了解後仍然/更加首選呢間學校咁.
校長係外籍人士或學校係英文幼稚園就一定係用英文,其他學校(即使名幼或龍校)只寫中文係唔會有問題.一封情理兼備嘅中文信一定好過一封錯漏百出嘅英文信,反之亦然.講到尾你要清楚表達到想講嘅訊息俾學校知.
手寫同打字係冇分別,唔會有人覺得打字係無誠意,因為誠意來自內文唔係字體...

有冇sample?
冇,你小朋友唔同人地小朋友,你apply嘅學校又唔同人地揀嗰間.基本template EK已有,各位再自行演繹啦.

最後祝所有小朋友都入到心儀學校!

wwchuifamily

回覆 ilmummy 的帖子

你係有心人,學校亦有心~~祝waiting成功!

wwchuifamily

回覆 monacat286 的帖子

恭喜哂你同小朋友呀~多謝你睇哂呢個咁長嘅帖又覺得有用.

wwchuifamily

Hellowae 發表於 16-12-9 23:59
謝謝你的分享。我想請教一下如果我想pm to am.要不要多寫幾封信寄過去呢？其實我已經寫左一封， 回覆說要等 ...

本帖最後由 wwchuifamily 於 16-12-10 10:58 編輯

哈哈，我未試過又求位又要pm轉am呀！你想轉am係咪有好充份理由？小朋友午睡、接送問題呢啲好多K1大校都唔會理，因為可能K2已經硬性規定全部返上/下晝，又有校車安排咁。

所以除非你有非轉不可嘅理由，唔係就唔好又求位又要轉am啦…

如果你已有offer想pm轉am,通常一封都ok,因為都係視乎學校有冇位。

wwchuifamily

Hellowae 發表於 16-12-10 13:23
Yes ar...已經留咗位，只再諗清楚時間安排
係sn

其實SN早出offer都多人放（利申：無去註冊留位），所以如果完全冇辦法諗掂下午接送，不如試吓直接揾學校傾，打去學校話交咗留位費同要求轉am嘅申請，目前未解決到接送問題，因為好想入讀所以打嚟查詢學校有咩方法同建議，一來可以暗示（其實都幾明顯）你接送唔到要放棄，二來學校可能真係同你諗到解決方法咁你咪唔洗煩囉。


可以好肯定佢唔會即刻應承你轉到am,但你有機會因為呢個電話變成排am嘅首位。

wwchuifamily

回覆 Hellowae 的帖子

加油呀~樓下媽媽都俾信心你,好大機會轉到嘅!
p.s.我星期六喺九龍塘見到SN賣旗啲小朋友好乖又聰明,希望你小朋友最終可以成功入讀到上晝班!

wwchuifamily

回覆 充裕 的帖子

問題係你寫小朋友讀另一間n嘅目的係咩?如果而家間n老師對小朋友有正面評語或者你好積極支持學校搞嘅活動,當然可以寫入去俾學校知!如果唔係你只寫小朋友讀緊另一間n對求位基本冇幫助!

樓上講有人夾n班評估入去,係ok嘅.但唔洗再加太多其他嘢,一來求位多數睇誠意(on waiting嘅學校都即係會考慮,唔係已經reject咗),二來小朋友太細家長有太多portfolio其實好怪獸...


其實n升K1轉校真係好普遍(有學校冇pn,有人想讀有資助等等等等),所以唔會有學校介意你由另一間n轉嚟.

p.s.第二封可參考原帖可5月頭學校call waiting前寄,亦有人喺n班一出上學期report就寄.兩者唔大分別.

wwchuifamily

peonychan04 發表於 16-12-15 16:04
求位信用公文袋寄或普通白信封寄？寄平郵或掛号？thx

信封無所謂啦...會唔會諗得太多...唔係抽獎大封啲會易啲抽中喎!學校/校長最尾都係睇同keep信唔係信封.

至於平郵定掛號就自己決定,其實寄平郵都OK,有啲媽媽覺得仲可以製造機會打去學校問吓收唔收到.但如果你係超級緊張萬無一失型媽媽,可能寄掛號買個安心.

p.s.關於寄信同打俾學校,想順便講樣樣都要適可宜止,寄4、5封信打10幾次電話其實冇乜必要 - 誠意多得濟就變成煩,亦有機會嚇怕學校.