玫瑰崗小學

hkpapa852

靚螺頭 發表於 17-5-9 13:55
英文學校啲英文都唔一定好，中文學校啲中文亦不一定好。

對, 不過如果自小習慣咗用英文, 會日漸抗拒中文, 日後想學好中文更難

mcl203

hkpapa852 發表於 17-5-9 14:46
對, 不過如果自小習慣咗用英文, 會日漸抗拒中文, 日後想學好中文更難

我都係偏向英，中搞得掂既水平就得， 個人偏好咋 ~

wcwong888

好快又過左一年，諗返上年我仔考小一，真係一殼眼淚。

話說阿仔抽到間唔係咁心儀嘅學校，但由於競爭大，阿仔面試技巧又好屎，大熱天時辛苦拖住阿仔跑來跑去，叩左幾間小學嘅門，都係白費心機。當時嘅心情梗係好灰，終於明白點解啲阿媽放左榜後成個禮拜都冇心機返工、煮飯。最終響朋友推薦下去玫瑰崗叩門，入咗，心情先叫做好番啲。

當時對呢間學校嘅認知唔多，見到網上嘅評語有好有壞，都係抱住戰戰兢兢嘅心情去開學。而家我哋讀左大半年，為咗其他家長唔使咁迷惘，等我分享下呢大半年嘅體會、觀察。（我上年10月中嘅時候響玫瑰崗版分響過我當時對學校嘅初步了解，依家認識深左啲，加返啲資料）

學校優點：
1. 小班教學，一班只十多廿人，加上雙班主任制，老師支援充足。加上班主任會跟佢哋三年，對學生會比較了解

2. 老師偏向年輕有活力，態度友善有愛心，小朋友返學都幾開心、積極。家長會有老師WhatsApp，有問題可以隨時問。呢樣幾重要下，因為啱啱上小一啲小朋友仲好懵，如果家長可以幫忙問清楚啲功課嘅野，小朋友返學唔怕做漏做錯，少咗心理壓力

3. 功課吾繁重，唔多抄寫，每日最多四樣功課，長假期除外

4. 英語水平高，學校用嘅英文書有啲係比星加坡同澳洲一年班以英文為母語嘅學生用嘅。不過亦即係話你小朋友咁細，返到屋企爸爸媽咪係要支援佢做功課同溫書，除非小朋友英文程度比較高

5. 小朋友一般都斯文有禮，我諗學校家庭响德育方面都教得幾好

6. 學校有教西班牙文同mindfulness靜觀課程，係幾好嘅輔助

7. 學校自設飯堂，小朋友午飯比較新鮮好食，唔使食啲焗到林晒嘅飯餸。仲可以訂下午茶四點鐘食，有時會有啫喱、movenpick雪糕，小朋友好鍾意

8. 學校唔算太嚴，外籍老師（英文加西班牙老師）比例上較多，唔會管得太死，扼殺咗學生思想、發展嘅空間

9. 學校空間大、空氣好（雖然有啲舊），小朋友小息嘅時候有得跑跑跳跳，放下電，幾開心下。要知道好多小學係唔俾跑嘅，對男仔來講有啲難度


學校缺點：
1. 學校缺乏透明度，冇開放日，冇家長會，學校網站資料過時，家長參與學校生活程度低，冇乜家長義工可以做，連開學時嘅家長日亦都資訊麻麻，學校凝聚力一般，呢點我覺得係學校最大嘅致命傷，令人對呢間學校嘅辦學宗旨、教學策略、師資、家校如何合作等等缺乏全面認識，校長係呢方面應該可以做好啲。加上學校位置較偏遠，學生一般坐校車，家長較少機會親身接觸到老師、校長

2. 學術水平要求都算高，如上述英文較深，返咗學頭一個月常識科已經要串facility，三個月串inappropriate， （當時我真係覺得咁嘅要求真係inappropriate)。另一方面學校嘅中文科亦都唔淺，一開學已經用一下嘅練習。所以當時都有啲擔心讀唔讀到，學校係兩科主科唔合格要留班嘅。不過小朋友嘅適應能力真係好強，過咗頭三個月已經跟得ok。另外學校雖然教得幾深，考嘅時候試卷唔算太深，唔會有乜嘢tricky嘅問題，所以考起上嚟都唔太大壓力。不過此消彼長，學生英文較強，中文一般來講都會弱啲，我估計家長要自己睇下點樣幫小朋友加強中文。依家小一仲細，我未睇得好清楚阿仔响中文方面同其他學校學生嘅能力差別

3. 學校冇以前咁國際化，少咗外籍學生，多咗中國人學生，英文語境冇以前咁好。不過阿仔自己成日同啲外籍學生玩，所以呢方面又ok。但話說回來，由於上堂係多用英文，學生嘅英文水平點都係較高

4. 3測3考，加上差不多每星期都有默書及/或小測，所以要keep住溫書。不過小測嘅範圍都比較少，通常三課，讀起上嚟都算輕鬆，最緊要分配好時間

4. 私校冇咁受教育局嘅限制，但玫瑰崗點都係屬於傳統天主教學校，雖然如上文所說唔太嚴，但亦唔好期望有啲乜嘢新穎嘅教學方法。而家間間學校都搞嘅STEM課程，我唔多覺玫瑰崗有提及，唔知係咪只係我睇唔到

5. 升中學Band 1率唔係咁理想，比盡佢都係30%左右，係學校另一個致命傷。新校長上任五年，佢致力提升學校學術成績，要過多兩三年先睇到真正成果。不過以阿仔現時嘅課業水平來睇，我估計升Band 1率應該有上升趨勢。而且近年收少咗外籍學生，多咗中國人，一般中國人家庭較重視讀書成績，對整體成績嘅拉動應該有所幫助

6. 私校冇政府資助，所以唔會好似資助、直資咁有咁多免費課外活動。呢D大多要自己比錢，不過價錢都算合理，可自由參加

7. 學校行政有D粗疏，有時會出錯，如通告資料有誤、英文有grammatical mistake等。雖然係小錯誤，不過有時我會擔心如果行政出現家長睇到嘅錯誤，會唔會教學都會出現家長睇唔到嘅錯呢？吾知係咪我諗多咗

8. 學校圖書館只開星期二、五，一般學校都注重推廣閱讀，圖書館應日日開。學校吾投放多啲資源喺圖書館度，呢點我好難理解

總括：
當初係因為冇得揀所以讀左玫瑰崗，而家讀左都覺得學校吾錯，有佢嘅好處，尤其見到阿仔讀得開心，英文幾好（有讀中學嘅小朋友見到阿仔嘅課業同佢所識嘅英文，都話佢將來英文會幾好），所以都冇後悔過入咗玫瑰崗。當然，如果學校唔使錢，係一間資助學校就更好啦，不過世事邊有咁完美吖。

阿仔讀呢間學校讀得開心，壓力唔大，可以講話響愉快中學習。放完長假我問佢想唔想番學，佢話好吖，咁又真係唔係個個小學生都咁願意番學喎。

至於話比＄4000學費值唔值，真係見仁見智，＄4000話多唔多，話少唔少，咁見到阿仔讀得唔錯，自細打好咗個英文底，唔使中學入咗英文學校先來追，長遠黎睇都慳返好多英文補習費，所以我哋覺得ok（雖然有時都會覺得少少肉痛）。

我個人覺得响小學階段，重要嘅除咗係學術（為應付升中遊戲規則），德育、培養學習興趣、自信、創意同思考/解難能力其實長遠來講更關鍵，每間學校係呢幾方面有佢強弱之處，家長要根據小朋友嘅興趣、能力同家長嘅教學理念揀學校，實在好複雜。不過如果做咗決定，就唔好太過患得患失，家長同小朋友都要勇往直前，實在大部份學校都有佢值得欣賞嘅地方，等我哋去儘量發掘、吸收同加以運用，未入去讀真係唔會清楚。而且學習興趣、創意、高階思維等係長遠嘅累積，又比較無形、難評估，有時人言人殊，家長自己要小心感受、評估，反正去到間間學校都要有心理準備家長可能要取長補短。

以上純粹係我個人嘅見解，如有錯誤，敬希其他前輩家長包涵、指正。我只係希望小小嘅分享可以幫到大家，因為我經過上年嘅痛苦經驗，我諗各位家長如果有多啲資料在手，唔使咁迷惘嘅話，未來呢半年會好過啲。在此𧫴祝各位小朋友小一入學順利！

wcwong888

唔覺唔覺，原來寫咗咁多

靚螺頭

wcwong888 發表於 17-5-9 15:35
好快又過左一年，諗返上年我仔考小一，真係一殼眼淚。

話說阿仔抽到間唔係咁心儀嘅學校，但由於競爭大，阿 ...

用本深少少既課本就可以提升學校學術水平？咁樣會唔會太天真？
似乎你校校長開左張對兌唔到既支票！

我只知道多人想讀嘅學校唔一定係好學校，但好嘅學校就一定好多人想讀。
而貴校收生基本上係來者不拒...

mcl203

wcwong888 發表於 17-5-9 15:58
唔覺唔覺，原來寫咗咁多

関於缺點(6), 官津都唔係資源充足，大部份課外活動都係自費㗎 ~

taxibird

多謝樓上位家長咁詳細介紹間學校，令準備報名的家長對學校有更深認識。我都偏向學校著重英文多點，畢竟中文可以自己教，英文係要靠浸淫。
一間學校多唔多人報唔係重點，最緊要係學校適唔適合、比到d咩小朋友。我都幾欣賞一d所謂易入的學校，佢幫到好多迷茫的家長，比小朋友一個機會接受良好教育。
入到名校就一定好？我中小學都係讀一間神校女校，至中六七就去左band 3學校，我想話神校都有唔少人會考得幾分，甚至0分，band 3學校都會出到廿幾三十分之人。讀書最緊要係靠自己，態度先係決定性因素

mcl203

靚螺頭 發表於 17-5-9 16:15
用本深少少既課本就可以提升學校學術水平？咁樣會唔會太天真？
似乎你校校長開左張對兌唔到既支票！

何以見得多人想讀=/=好學校，好學校=多人想讀，可否分享多D ~~~

hkpapa852

taxibird 發表於 17-5-9 16:52
多謝樓上位家長咁詳細介紹間學校，令準備報名的家長對學校有更深認識。我都偏向學校著重英文多點，畢竟中文 ...

建議大家唔好以為自己母語係中文, 就以為自己真係有能力教到小朋友中文.

去書局攞D小學中文科補充練習睇吓, 自己係咪真係有能力教吧!

如果你本身唔教師, 諗住真係可以教到小朋友既中文, 其實呢個諗法係有D天真

taxibird

hkpapa852 發表於 17-5-9 17:01
建議大家唔好以為自己母語係中文, 就真係有能力教到小朋友中文.

去書區攞D小學中文科補充練習睇吓, 自己係 ...

放心，我大學讀中文的。當然如果其他人就....睇自己能力吧！

ok3

須則話論壇上, 大家都有言論自由, 可以暢所欲言. 但有時係咪都應該照顧下他人感受?!

記得小時侯, 亞媽同家姐去完街買條裙返嚟. 我覺得好肉酸, 彈到一錢不值. 結果係攪到家姐唔開心時, 我又俾亞媽鬧到pk. 佢話條裙係著係家姐身上, 又唔係你著. 最緊要佢自己鍾意. 況且條裙買咗返嚟又冇得退, 我左彈右彈只會攪到家姐唔開心. 于我又有何益?!

ppmmbb

taxibird 發表於 17-5-9 17:02
放心，我大學讀中文的。當然如果其他人就....睇自己能力吧！

sorry, 我笑咗三下！

ok3

hkpapa852 發表於 17-5-9 17:01
建議大家唔好以為自己母語係中文, 就真係有能力教到小朋友中文.

去書區攞D小學中文科補充練習睇吓, 自己係 ...

呢樣真. 好多小朋友嘅母語係廣東話, 但中文聆聽(廣東話)就.....

manmangerger

wcwong888 發表於 17-5-9 15:35
好快又過左一年，諗返上年我仔考小一，真係一殼眼淚。

話說阿仔抽到間唔係咁心儀嘅學校，但由於競爭大，阿 ...

感激你的詳盡分享！我都對玫小有興趣，你的分享十分清晰、有用！

mmwwpp

靚螺頭 發表於 17-5-9 16:15
用本深少少既課本就可以提升學校學術水平？咁樣會唔會太天真？
似乎你校校長開左張對兌唔到既支票！

本帖最後由 mmwwpp 於 17-5-9 21:14 編輯

FT_mom_2011

hkpapa852 發表於 17-5-8 09:57
重英輕中, 除非諗住一定唔係香港讀大學, 否則遲早後悔

絕對同意，其實中文比英文更難學好

sangria

wcwong888 發表於 17-5-9 15:35
好快又過左一年，諗返上年我仔考小一，真係一殼眼淚。

話說阿仔抽到間唔係咁心儀嘅學校，但由於競爭大，阿 ...

多謝詳細分享。我都有興趣玫小。將來有機會再請教。

SingMom

wcwong888 發表於 17-5-9 15:35
好快又過左一年，諗返上年我仔考小一，真係一殼眼淚。

話說阿仔抽到間唔係咁心儀嘅學校，但由於競爭大，阿 ...

多謝分享! 你寫得好詳細又中肯

964000

hkpapa852 發表於 17-5-5 15:30
根據官方資料, 升中時無人出國或者讀國際學校喎?

2015年升中派位:

國際學校中學通常小五之後便轉，不會讀埋小六，所以升中數據未必反映到。

cfbwong

wcwong888 發表於 17-5-9 15:35
好快又過左一年，諗返上年我仔考小一，真係一殼眼淚。

話說阿仔抽到間唔係咁心儀嘅學校，但由於競爭大，阿 ...

可否請教一下，想知道有關西班牙(國際班)同普通班的分別？國際班好嗎？有乜要留意？因為我快要為兒子選擇。謝謝