我囡的升中選校派位回顧

瑩瑩老豆

[ 本帖最後由 瑩瑩老豆 於 14-7-30 10:56 編輯 ]

隨著完成中學註册程序, 整個升中派位階段終告結束, 趁仲記得也好寫下來作分享和日后再玩時的參考.

當年為阿囡選小學, 事前沒有什麼鋪路計劃, 只選了一間在家附近的官校入表, 結果自行15分已獲派學位, 雖然已聽聞小學聯繫中學, 但當年仍沒太在意也沒想這麼遠.
轉眼到了小五, 開始要了解升中玩法, 升中主要關鍵就是成績及/或特異功能, 阿囡雖沒有特異功能, 還好三次評分試沒有大上落, 成績一直保持在 b1a. 除了成績，就只有幾個校內獎和公職等, 因阿囡歡畫畫, 所以有在外面畫室學, 也拿個幾個一些的豬肉獎, 但相信對升中幫助不大.

到小六上學期便開始搜集心儀中學資料, 我囡屬港島南區, 但本區b1 中學只得一兩間(有一間仲要有附小), 而由外區撥到南區的b1 學額則十隻手指都數得晒, 競爭也是相當激烈,最好還是在自行階段就跨出去. 以下是在該段時間對搜集過的中學的一些個人主觀感覺 (實際不一定係咁).

1/ 聖士提反書院SSC - 第一間參觀的直資學校, 位於赤柱, 講座主力介紹其課外活動和IB 課程, 感覺係一間富貴學校, 聽完講座自行參觀, 環境/面積實在一流, 無敵海景, 但學費也一流(1年接近六萬學費), 所以沒打算入讀. 當日也有強國家長發問如在內地讀書的入學程序, 也旁聽到強國家長私下說十多萬學費連寄宿很平宜, 估計可能有唔少強國人申請.

2/ 聖保羅男女中學SPCC - 神級直資學校, 冇去聽講座只係有入表申請, 其實冇想過要入, 因為佢地會選學生見, 所以一心想試下阿囡成績到底夠班未, 如獲面試機會也可比阿囡練習下.

3/ 庇利羅士女子中學BPS - 聯繫中學, 所以好自然以BPS作第一志願，12月帶阿囡去完講座參觀過學校後，聽完校長講話和學生表演, 便自行參觀校舍, 感覺校舍較舊和細, 期間有學生'站崗', 感覺佢地有d cool.

4/ 聖士提反女子中學SSGC - 其實第一次認識ssgc係聽到佢地d學生反對轉直資的新聞. 12月上午去完BPS, 下午就係去SSGC 參觀, 校舍比BPS 更舊但靚, 環境也比BPS 好, 聽校長講話和學生表演, 但好多英文. 聽完講座由學生帶隊參觀, 也讓我有機會跟學生講兩句, 校舍很舊(后來才知原來係法定古績), 學生斯文, 老師也沒有很嚴謹, 而且多活動, 感覺係三間去過最好的一間, 也覺得較適合阿囡.

5/ 瑪利曼中學MSS - 因沒有舉行講座,沒機會去學校了解下, 只能從網上找資料, 好多野都唔知又感覺有點神秘, 而且話宗教占10%, 結果自行沒考慮.

6/ 英華女校 YWGS - 阿囡和C9 去參觀, 話校長口才了得, 也認同教學理念, 但搬了去深水埗臨時校舍離家太遠, 不知何時完成重建重回中環, 也不想日后阿囡失去了中學的回憶, 所以不考慮.

7/ 張祝珊中學 CSS - 沒有去講座, 得知入表不用面試, 將學生成績/活動/獎項等量化計分取錄, 感覺死板唔人性化和死讀書, 所以也不考慮.

瑩瑩老豆

自行塡表階段
一月要向最多兩間心儀中學入表, 基本上沒難度, 在派第二次呈分試成績表時老師評語係報任何一間b1a 中學都是有機會的, 當時考慮的主要是BPS, SSGC, MSS, YW. 老師提過因BPS 為聯繫中學, 按以往經驗不太傾向在自行時收聯繫小學學生, 所以如有其他心儀中學可先放, 另基於上面提過的原因, 最終選了 BPS放自行一 和 SSGC放自行二.
再加上直資的SPCC, 自行時就只報了這三間中學.

面試階段
到二三月開始收到中學面試信, 第一間收到是SPCC (選學生面試), 3/1面試, 本來只是想找機會練習下面試, 所以沒太大壓力也沒什麼準備(其實唔知應準備乜), 面試時主要是考學術(中英數), 阿囡說不太容易, 結果也沒被取錄.
第二間是SSGC (全部學生面試), 3/8面試, 面試時也是考學術, 也有些常識, 阿囡只說比SPCC容易, 但不算太理想.
最后的是BPS (選學生面試), 3/22面試, 面試時也是考學術, 阿囡說見得比SSGC 好. 其后收到電話通知進行第二輪面試(4/4), 那次是見校長以全英語對話, 主要是談論日常知識, 課外活動等.

大抽獎階段
多得教統局不提早先行公佈自行收生結果, 學生就算自行已獲派位, 四月仍要再交一張大抽獎表.
塡三間甲部沒難度, 將兩間自行的放落去, 阿囡去見完SSGC和BPS 后, 較鐘意SSGC, 所以將SSGC放甲一, BPS放甲二, 其實甲二和甲三塡B1A 學校都係等於白塡, 所以'隋便'加一間MSS 放甲三.
最煩的就是塡三十間乙部, 班主任要求先交一個初稿, 我們的塡法是先塡B1a..1b..1c 學校, 頭二志願自然就係BPS 和 SSGC, 然后其他外區B1中學, 再到同區B1中學, 再到B2, B3 唔塡就收工交表. 結果比老師打回頭話甲部冇問題, 但乙部第二志願以后的外區B1唔會再有機會派到, 一跌會跌到好后的志願, 要改!
今次抽起部份外區B1塡落去正式張表交回去, 結果收到老師電話話仍太進取, 南區B1 位不足, 不能放太多B1學校, 要早D 放B2, 再改!
最終只改了一部份, 頭四志願堅持不改, 第五以后改到七彩, 張表都劃到花晒, 仲担心教統局會唔會入錯機.
經過自行交表, 呈三考試, 面試和大抽獎交表后, 升中要做的事基本上都做完, 接下來可暫時放鬆下等7月結果了.

準備叩門階段
隨著放榜日來臨, 本來放鬆了的心情而開始緊張起來, 主要担心派得唔好要點, 阿囡明言派唔到頭二志願就要去叩門, 為怕派得不好, 所以六月尾七月頭開始從網上捜集各校的叩門方法, 但大部份都沒有公佈詳程, 只好直接打電話去中學問, 部份明言不設叩門(例如ssgc), 一般都係要求到時呈交成績/獎項資料/派位證和即場派表塡. 這段期間另可以做的就是影定成績/獎項的副本準備.

放榜日
7/8, 十年寒窗就為這一天, 小學要求學生如常8:20 回校, 家長則可以9:00 回校等消息, 我當日叫阿囡如知道結果, '儘量'用whatapps 發個通知, 結果約 8:45 食完早餐回校途中已收到 ss 兩個字母, 即獲派 ssgc, 成功了! 終於可放鬆的緊張心情了, 雖已知結果, 不過仍回校恭喜阿囡,到9:00 左右學生拿著結果到禮堂, 即時熱鬧起來, 聽聞今年派得都唔錯, 我們順便影返幾幅相留念, 然后學校話可以由家長簽走放學, 致此, 升中派位階段正式劃上句號.

后記
註册日
7/10, 所有獲派學位學生都要去所派或成功叩門學校註册保留學位, 當日c9 同阿囡去, 過程都好簡單, 註册證話要帶派位證, 相, 身份證, 成績表, 但結果只要派位證+身份證. 另學校派左幾張通告, 即場有書局攞檔可以買書, 但唔足要后補, 差不多四千元, 校服自行出去買.


附錄:
自行申請表格


大抽獎表格

irenec

寫得好詳細恭喜你囡囡派到第一志願，諗番呢段等待既日子真係

austism

感激不盡，比我下年報升中作準備！

VICTLEUNG

Owl2014

好難捱好但又好快過的一年。恭喜樓主。

wwyee

輕鬆既小學生涯，又獲派理想中學，恭喜瑩爸

aeiou_drm

恭喜。謝謝分享。

施爾歐

恭喜恭喜

小木偶媽咪

恭喜

cellon

恭喜獲派心儀中學！

jemom

恭喜晒

PCCW2319

原帖由 瑩瑩老豆 於 14-07-11 發表
自行塡表階段
一月要向最多兩間心儀中學入表, 基本上沒難度, 在派第二次呈分試成績表時老師評語係報任何一 ...

恭喜。 我2個契女都讀呢間中學。家姐今年畢業，應屆DSE考生。妹妹9月升中2。見佢地都讀得開心。

simonkawah

恭喜

dotcom

vincher

misoko

恭喜恭喜