焦急媽媽急問意見，需要退學嗎？

twingirlbabies

我女女兩歲多，2歲時插班N, 頭兩個月返學完全冇問題，會自己行返班戶搵返自己位坐，晌農曆新年期間我接到學校通知佢果班的雙班主任同時離職，因女女剛適應老師，我唔係咁好受但都要接受。

問題出現晌假期開學後，我女女如常快樂咁自己行入班房，佢一入到去坐好後問我“Miss xxxx”（舊主任）去左邊呀，我話放假咁我就離開左課室，跟住第2日返學未入班房就喊，之後直頭收埋自己晌床底我根本扯唔到出黎換校服，我亦唔想迫佢因怕佢對返學討厭，所以我就問下新老師佢晌學校有冇事發生過，老師話冇，一切正常。

如事者我自己幫佢請假三星期，因佢情緒差到連房門都唔出，我完全唔知佢發生咩事，連我話公園都唔去，等左幾星期佢好啲我就帶佢出多啲街。

到4月我決心帶佢返學，夾硬換校服，抬佢行返學，入到學校課室佢大喊話好驚，要走，我忍心離開。點知佢返左2個星期啦，抗拒程度每日提高，我每日送完佢返學都聽到佢大喊尖叫，而收聲的時間亦每日需時更多，我可以話佢係一日比一日更驚返學。

我問過女女點解妳唔想返學，佢只答好驚學校，好驚哥哥，好驚老師，話返學唔開心唔好玩。我正煩惱究竟我應該繼續迫佢日日返學，定幫佢退學等9月先讀另一間K1? 究竟呢個係佢適應期定同學校唔夾？我宜家放棄係咪半途而廢? 定係佢係超細b所以未能喜歡返學？但點解頭2個月又適應得好好?

我想講教有經驗媽媽比意見我，見到女女每日咁尖叫式喊法又咁驚學校好心痛，點先對佢最好呢？

twingirlbabies

學校說只是適應期，覺得係我過份緊張。

但我做媽咪覺得唔係咁簡單，因為佢頭兩個月唔係咁，係換左新老師後返左一日學之後突然既轉變。

我從學校問唔到任何野，我問個女佢只話好驚老師同學校，驚同學，我剛送完佢入課室佢仲係大喊大叫，老師走埋來話抱佢佢仲喊得更大聲，狂叫“好驚，好驚，媽咪救我”，個心真係好痛

twingirlbabies

老師，學校同屋企人都話佢係摟計唔返學，叫我放手比時間佢適應，所以我想睇埋今個星期。

但佢復課兩星期，每一日只係驚得更多，我覺得佢唔係適應緊，係根本適應唔到，宜家決定退學我都被評為怪獸家長

twingirlbabies

其實佢返過3個月學前班先正式返N

之前既學前班都係分離式，佢自己拉龍入班房，我在大堂睇monitor等佢觀課，佢從第一日都冇喊過，直到返呢間幼稚園N頭2個月都一樣冇喊過，返屋企仲會講下食過咩，唱咩歌，邊個同佢玩，邊個同學有喊等等，總之一切正常。

轉捩點係轉班主任後返學之後既第2日出現大抗拒。佢宜家見到任何校服，書包都會叫我掉落垃圾桶，校服佢偷偷想擺入厠所沖走佢

twingirlbabies

其實退學我所憂慮係:

1。究竟係我女自己情緒出現問題，定學校問題。
2。轉左校係咪會出現同樣情況
3。呢間幼稚園近家，升小ok,退左學冇得上K1